CAB. XIV

1Eiyr-jee da graih [Creestee], as yeearree-jee dy jeean giootyn spyrrydoil, agh erskyn ooilley dy vod shiu bun y choyrt er goo Yee. 2Son eshyn ta loayrt ayns chengey yoarree, cha nee rish deiney, agh rish Jee t’eh loayrt: son cha vel dooinney erbee dy hoiggal eh; ga ayns y spyrryd t’eh loayrt folliaghtyn. 3Agh eshyn ta preacheil, t’eh loayrt rish deiney gys nyn ynsagh, nyn goyrle, as nyn gherjagh. 4Eshyn ta loayrt ayns chengey yoarree, t’eh gynsaghey eh-hene: agh eshyn ta preacheil, t’eh gynsaghey yn agglish. 5Baillym dy loayragh shiu ooilley lesh glaraghyn, agh bare lhiam shiu dy phreacheil: son ny s’ooasle ta eshyn ta preacheil, na eshyn ta loayrt glaraghyn, mannagh vel eh coyrt bun y ghlare, dy vod yn agglish ’ve ynsit liorish. 6Nish, vraaraghyn, my hig-yms hiuish loayrt lesh chengaghyn joarree, cre-woad share vees shiu, mannagh loayr-ym riu, edyr liorish ashlish, ny liorish tushtey, ny liorish phadeyrys, ny liorish ynsagh? 7As eer reddyn gyn vioys ta jannoo feiyr, edyr ad ve feddan ny claasagh, mannagh bee caghlaa ayns y vingys, quoi oddys toiggal cre ta cloït er y feddan ny’n chlaasagh? 8Son my ta’n cayrn coyrt kiaull neu-chooie, quoi nee eh-hene y chiartaghey son y chaggey? 9Myr shen myrgeddin shiuish, mannagh vel shiu lesh y chengey loayrt goan aashagh dy v’er ny hoiggal, kys vees baght er ny ghoaill jeh shen ny ta loayrit? son loayree shiu rish y gheay. 10Te taghyrt dy vel fud y theihll whilleen caghlaa shen dy ghlare, as cha vel veg jeu fegooish meanal. 11Shen-y-fa, mannagh vel mee toiggal yn ghlare t’er ny loayrt rhym, bee’m dasyn ta loayrt rhym myr barbarian; as bee eshyn ta loayrt rhym myr joarree dooys. 12Er yn aght cheddin, fakin dy vel shiu dy jeean geearree giootyn spyrrydoil, shir-jee dy ve ny s’breeoil ayndoo gys ynsagh yn agglish. 13Shen-y-fa lhig dasyn ta loayrt ayns chengey yoarree, guee dy vod eh bun y choyrt er e ghlare. 14Son my ta mee jannoo padjer ayns chengey yoarree, she my spyrryd t’ec padjer, agh ta my hoiggal neu-vessoil. 15Cre te eisht? Goym padjer lesh my spyrryd, as goym padjer lesh my hoiggal myrgeddin: Goym arrane lesh my spyrryd, as nee’m arrane y ghoaill lesh my hoiggal myrgeddin. 16Er-nonney tra t’ou bannaghey lesh y spyrryd, kys nee eshyn nagh vel dy dty hoiggal, gra Amen tra t’ou coyrt booise, fakin nagh vel eh toiggal cre t’ou dy ghra? 17Son dy firrinagh t’ou coyrt booise dy mie, agh cha vel y jeh elley veg share jeh. 18Ta mee coyrt booise da my Yee, dy vel mee loayrt ny shlee glare na shiu ooilley: 19Ny-yeih ’sy cheeill bare lhiam queig focklyn y loayrt dy v’er my hoiggal, dy voddin feallagh elley myrgeddin y ynsaghey, na jeih thousaneyn dy ocklyn ayns chengey yoarree. 20Vraaraghyn, ny bee-jee nyn gloan ayns tushtey: ny-yeih ayns olkys bee-jee myr cloan, agh ayns toiggal bee-jee deiney. 21Ayns y leigh te scruit, Liorish deiney jeh glare elley as jeh meillyn elley, nee’m loayrt rish y pobble shoh: as foast er son shoh as ooilley cha jean ad m’y chlashtyn, ta’n Chiarn dy ghra. 22Shen-y-fa ta glaraghyn cowrey, cha nee dauesyn ta credjal, agh dauesyn nagh vel credjal: agh cha vel preacheil shirveishagh dauesyn nagh vel credjal, agh dauesyn ta credjal. 23Shen-y-fa my ta’n slane cheeill er nyn jaglym cooidjagh ayns un voayl, as ad ooilley loayrt ayns glaraghyn joarree, as dy darragh stiagh adsyn nagh vel toiggal yn ghlare oc, ny credjal, nagh jir ad dy vel shiu ass nyn geeayl? 24Agh my ta ooilley phadeyrys, as dy jig stiagh fer nagh vel credjal, ny gyn ynsagh, t’eh coyrlit lieriu ooilley, t’eh er ny vriwnys lieriu ooilley; 25As myr shoh ta folliaghtyn e chree er ny hoilshaghey; as myr shen, tuittym sheese er e eddin, ver eh ooashley da Jee, as nee eh fockley magh dy vel Jee dy firrinagh nyn mast’ eu. 26Cre te eisht, vraaraghyn? tra ta shiu cheet cooidjagh, dy vel ec dagh unnane eu er-lheh arrane spyrrydoil, dy vel echey ynsagh, dy vel echey glare yoarree, dy vel echey ashlish, dy vel echey dy chur bun er y ghoo. Lhig da dy chooilley nhee ve jeant gys ynsagh yn agglish. 27My ta dooinney erbee loayrt ayns chengey yoarree, lhig da ve jeant liorish jees, ny ec y chooid smoo liorish three, as shen fer lurg fer; as lhig da fer elley bun y choyrt. 28Agh mannagh vel fer erbee ry-hoi toiggal y choyrt, lhig da ve ny host ’sy cheeill: as lhig da loayrt rish hene, as rish Jee. 29Lhig da jees ny three jeh ny phadeyryn loayrt, as lhig da’n vooinjer elley briwnys. 30My ta nhee erbee er ny hoilshaghey da fer elley ’sy cheshaght, lhig da’n chied er ve ny host. 31Son foddee shiu ooilley phadeyrys fer lurg fer, dy vod ooilley gynsaghey, as dy vod ooilley v’er nyn gherjaghey. 32As ta spyrrydyn ny phadeyryn fo reill ny phadeyryn. 33Son cha vel Jee ny Yee dy vee-reiltys, agh dy hee, myr ayns ooilley kialteenyn ny nooghyn. 34Lhig da ny mraane eu ve nyn dhost ayns ny kialteenyn: son cha vel eh lowit dauesyn dy loayrt; agh t’ad sarit dy ve fo biallys, myr ta’n leigh neesht dy ghra. 35Agh my saill-lhieu gynsaghey nhee erbee, lhig daue fênaght jeh ny sheshaghyn oc ec y thie: son te neu-yesh da ben dy loayrt ’sy cheeill. 36Cre? nee veueish haink goo Yee? ny nee hiuish ny-lomarcan haink eh? 37My ta dooinney erbee smooinaghtyn eh-hene ny adeyr, ny spyrrydoil, lhig da goaill rish ny reddyn ta mee dy scrieu hiu dy ve saraghyn y Chiarn. 38Agh my ta dooinney erbee mee-hushtagh, lhig da ve mee-hushtagh. 39Shen-y-fa, vraaraghyn, bee-jee dy jeean aignagh dy ockley magh y goo, as ny jean-jee lhiettal dy loayrt ayns glaraghyn. 40Lhig da dy chooilley nhee ve jeant dy feeudagh as cordail rish yn oardagh.