CAB. XVI

1Nish mychione y chaglym son ny nooghyn, myr ta mee er n’oardaghey da kialteenyn Ghalatia, jean-jee shiuish myrgeddin. 2Er y chied laa jeh’n chiaghtin, lhig dagh unnane eu coyrt dy lhiattee ayns stoyr, myr ta Jee er vannaghey eh, nagh bee feme chaglym y yannoo tra hig-ym. 3As tra hig-ym, quoi-erbee nee shiuish y lowal jeh liorish nyn screeuyn, ad shen ver-yms dy choyrt lhieu yn ghiastyllys eu gys Jerusalem. 4As my vees feme orrym’s dy gholl neesht, hed adsyn mârym. 5Eisht hig-ym hiuish, tra vee’m er n’gholl trooid Macedonia: (son ta mee ry-hoi goll trooid Macedonia.) 6As foddee dy vuirr-ym as dy geau-ym yn geurey mêriu, dy vod shiu mee y choyrt er my yurnah, raad erbee dy jem. 7Son cha jig-ym dy yeeaghyn shiu nish er my yurnah, agh ta mee treishteil dy vaarail tammylt dy hraa mêriu, lesh kied y Chiarn. 8Agh fuirr-ym ec Ephesus derrey’n Chingeesh. 9Son ta dorrys mooar as vondeishagh er ny osley roym, as ta ymmodee dy hassoo magh m’oï. 10Nish my hig Timothy hiu, jeeagh-jee dy bee eh sauchey ny mast’ eu: son t’eh jannoo obbyr y Chiarn, myr ta mee hene. 11Ny lhig da dooinney erbee er-y-fa shen beg y hoiaghey jeh, agh cur-jee eh er e hoshiaght ayns shee, dy vod eh cheet hym’s: son ta mee jeeaghyn er e hon marish ny braaraghyn. 12Mychione nyn mraar Apollos, lhie mee er dy chion dy heet hiu marish ny braaraghyn: agh cha row eh aignagh edyr dy heet hiu ec y traa shoh; agh hig eh tra vees caa jesh echey. 13Bee-jee er nyn arrey, shass-jee shickyr ’sy chredjue, ymmyrk-jee shiu hene myr deiney, bee-jee dunnal. 14Lhig da ooilley ny cooishyn eu ve jeant ayns graih Chreestee. 15Ta mee guee erriu, vraaraghyn, (shione diu lught-thie Stephanas, dy vel eh yn chied-vess dy Achaia, as dy vel ad dy arryltagh er ghoaill orroo dy hirveish er ny nooghyn.) 16Dy der shiu arrym da nyn lheid, as da dagh unnane ta cooney lhieu, as gobbraghey [ayns y sushtal.] 17Ta mee goaill boggey dy vel Stephanas, as Fortunatus, as Achaicus er jeet: son shen ny va shiuish ergooyl ayn, t’adsyn er n’yannoo magh. 18Son t’ad er gherjaghey my chree as y cree euish: shen-y-fa jean-jee soiagh jeh nyn lheid. 19Ta kialteenyn Asia dyn mannaghey shiu. Ta Aquila as Priscilla dyn mannaghey shiu dy jeean ayns y Chiarn, marish y cheshaght Chreestee ayns y lught-thie oc. 20Ta ooilley ny braaraghyn dyn mannaghey shiu. Oltee-jee yn derrey yeh yn jeh elley lesh y phaag dy hee. 21Ta mish Paul dy vannaghey shiu fo my laue hene. 22My ta dooinney erbee nagh vel graih echey er y Chiarn Yeesey Creest, lhig da ve Anathema Maranatha. 23Dy row grayse nyn Jiarn Yeesey Creest mêriu. 24Dy row my ghraih mêriu ooilley ayns Creest Yeesey. Amen.