CAB. III

1As er my hon’s, vraaraghyn, cha voddym loayrt riuish myr rish sleih spyrrydoil, agh myr roosyn ta fo reill ny foalley, dy jarroo myr rish oikanyn ayns Creest. 2Ta mee er veaghey shiu lesh bainney, as cha nee lesh bee lajer: son eisht cha row shiu er y hon, chamoo ta shiu foast. 3Son ta shiu foast fo reill ny foalley: son fakin dy vel nyn mast’ eu troo, as streeu, as anvea, nagh vel shiu foalley, as gimmeeaght myr deiney? 4Son choud as ta fer gra, Ta mish son Paul, as fer elley, Ta mish son Apollos, nagh vel shiu fo reill ny foalley? 5Quoi eisht ta Paul, as quoi Apollos, agh shirveishee lioroo ren shiu credjal, dy jarroo myr ta’n Chiarn er choyrt da dagh unnane e ghioot hene? 6Ta mish er hoiaghey, ren Apollos gushtaghey, agh Jee ren bishaghey. 7Myr shen eisht, cha vel eshyn ta dy hoiaghey jeh coontey erbee, chamoo eshyn ta dy ushtaghey: agh Jee, ta dy vishaghey. 8Nish eshyn ta soiaghey, as eshyn ta gushtaghey, cha vel ad agh unnane: as yiow dy chooilley ghooinney e leagh hene, cordail rish e laboraght hene. 9Son ta shinyn co-obbreeyn fo Jee: ta shiuish farrysthie Yee, shiuish troggal Yee. 10Cordail rish grayse Yee t’er ny choyrt dooys, myr ard-vasoonagh creeney, ta mee er hoiaghey yn undin, as ta fer elley troggal er. Agh lhig da dy chooilley ghooinney kiarail y ghoaill kys t’eh troggal er. 11Son undin elley cha vod dooinney erbee y hoiaghey, agh shen ny ta er ny hoiaghey, ta shen Creest Yeesey. 12Nish my hroggys dooinney erbee er yn undin shoh, airh, argid, claghyn costal, fuygh, traagh, stubble: 13Bee obbyr dy chooilley ghooinney er ny hoilshaghey: son ver yn laa lesh eh gys soilshey, er-yn-oyr dy bee eh er ny hoilshaghey liorish aile; as nee’n aile obbyr dy chooilley ghooinney y hrial, cre’n sorch te jeh. 14My ta obbyr dooinney erbee t’eh er hroggal er, shassoo yn aile, yiow eh leagh. 15My vees obbyr dooinney erbee losht, yiow eh coayl: agh nee eh-hene scapail, agh myr dy beagh eh trooid yn aile. 16Nagh vel fys eu dy nee shiuish chiamble Yee, as dy vel Spyrryd Yee baghey ayndiu? 17My nee dooinney erbee stroie chiamble Yee, eshyn nee Jee y stroie: son ta chiamble Yee casherick, yn chiamble shen ta shiuish. 18Ny lhig da dooinney erbee eh-hene y volley: My ta dooinney erbee ny-vud eu goaill er hene dy ve creeney ’sy theihll shoh, lhig da ve ny ommydan, dy vod eh ve creeney. 19Son ta creenaght y theihll shoh ommijys marish Jee: son te scruit, T’eh goaill yn vooinjer chreeney ayns y chroutys oc hene. 20As reesht, Shione da’n Chiarn smooinaghtyn yn vooinjer chreeney, nagh vel ad agh fardail. 21Shen-y-fa ny lhig da dooinney erbee boggyssagh ayns deiney: son lhieuish ta dy chooilley nhee: 22Edyr eh ve Paul, ny Apollos, ny Cephas, ny yn seihll, ny bioys, ny baase, ny reddyn ta nish ayn, ny reddyn ta ry-heet; lhieuish ad ooilley: 23As ta shiuish lesh Creest: as ta Creest lesh Jee.