CAB. IV

1Lhig da dooinney myr shen soiaghey j’inyn, myr jeh shirveishee Chreest, as stiurtyn jeh folliaghtyn Yee. 2Ny sodjey, te currym er ny yerkal rish ayns stiurtyn dy bee dooinney er ny gheddyn firrinagh. 3Agh er my hon hene cha vel mee coontey jeh agh red feer fardalagh, dy beign’s er my vriwnys lieriuish, ny liorish briwnys dooinney erbee; dy jarroo cha vel mee briwnys mee hene. 4Son ga nagh voddym coyrt nhee erbee gys my lieh hene, ny-yeih cha vel mee liorish shoh er my heyrey; agh eshyn ta dy my vriwnys yn Chiarn eh. 5Shen-y-fa ny jean-jee nhee erbee y vriwnys roish y traa, derrey hig y Chiarn, ver chammah lesh gys soilshey folliaghtyn y dorraghys, as nee soilshaghey magh smooinaghtyn ny creeaghyn; as eisht yiow dy chooilley ghooinney moylley veih Jee. 6As ny reddyn shoh, vraaraghyn, ta mee ayns co-soylaghey er ghoaill orrym pene, as er Apollos, er y ghraih euish; liorin dy voddagh shiu gynsaghey, gyn dy smooinaghtyn jeh deiney erskyn ny ta scruit, nagh bee veg eu boggyssagh ass lieh fer erskyn fer elley. 7Son quoi eh ta coyrt dhyt’s yn vondeish erskyn fer elley? as cre t’ayd nagh vel oo er gheddyn? nish my hooar oo eh, cre’n-fa t’ou boggyssagh, myr nagh beagh oo er gheddyn eh? 8Nish ta shiu jeant magh, nish ta shiu berchagh, ta shiu er reill myr reeaghyn nyn vegooish: as dy baillish Jee dy jinnagh shiu reill, dy voddagh shinyn reill myrgeddin mêriu. 9Son ta mee smooinaghtyn dy vel Jee er hoiaghey magh shinyn ny ostyllyn er-jerrey ooilley, myr deiney faagit mooie son baase. Son ta shinyn shilley yindyssagh da’n seihll, as da ainleyn, as da deiney. 10Ta shinyn goit son ommydanyn er coontey Chreest, agh ta shiuish creeney ayns Creest: ta shinyn annoon, agh ta shiuish lajer: ta shiuish ooasle; agh ta beg er ny hoiaghey j’inyn. 11Gys y traa shoh hene, ta shinyn chammah accryssagh as paagh, as ta shin feme coamrey, as er nyn mwoalley, as cha vel cummal shickyr ain ayns boayl erbee; 12As ta shin laboragh, gobbraghey lesh nyn laueyn hene: tra ta shin oltooanit, ta shin bannaghey: tra ta shin tranlaasit, ta shin dy ymmyrkey eh: 13Tra ta scammylt er ny choyrt dooin, ta shin coyrt goan mie: ta shin myr trustyr y theihll, as breinid dy chooilley nhee gys y laa t’ayn jiu. 14Cha vel mee scrieu ny reddyn shoh dy naaraghey shiu, agh myr my chloan shynney lhiam ta mee cur coyrle diu. 15Son ga dy vel eu jeih thousane fir-ynsee ayns Creest, foast cha nhimmey ayr t’eu: son ayns Creest Yeesey ta mish er gheddyn shiu trooid y sushtal. 16Shen-y-fa ta mee guee erriu, eiyr-jee orrym’s. 17Son yn oyr shoh ta mee er chur er chaghteraght hiu Timotheus, ta my vac graihagh, as firrinagh ayns y Chiarn, ver shiu ayns cooinaghtyn jeh ny raaidyn aym’s ta ayns Creest, myr ta mee gynsaghey dy chooilley raad ayns ooilley ny kialteenyn. 18Nish ta paart er n’aase mooaralagh, myr nagh darrin hiu. 19Agh hig-ym hiu dy gerrit, lesh kied y Chiarn, as toig-ym eisht, cha nee yn ghlare ocsyn ta mooaralagh, agh y phooar. 20Son cha vel reeriaght Yee [shassoo] ayns taggloo, agh ayns pooar. 21Cre sailliu? jig-ym hiu lesh slatt, ny ayns graih, as ayns y spyrryd dy veenid.