CAB. V

1Te goo cadjin dy vel maarderys nyn mast’ eu, as lheid y vaarderys as nagh vel wheesh as er ny enmys mastey ny Ashoonyn-quaagh, dy jinnagh fer goaill da hene ben e ayrey. 2As ta shiu sheidit lesh moyrn, tra by-yeshey diu dy ghobberan, dy beagh eshyn t’er n’yannoo yn obbyr shoh, scarrit veih nyn mast’ eu. 3Son ta mish dy firrinagh, ga nagh vel mee kionfenish ayns persoon, agh mêriu ayns spyrryd, er vriwnys hannah, myr dy beign kionfenish, mychione eshyn t’er n’yannoo yn obbyr shoh; 4Ayns ennym nyn Jiarn Yeesey Creest, tra vees shiuish er nyn jaglym cooidjagh, as y spyrryd aym’s, lesh pooar nyn Jiarn Yeesey Creest, 5Dy livrey lheid y fer shen da’n drogh-spyrryd dy stroie yn eill, dy vod yn annym ve er ny hauail ayns laa yn Chiarn Yeesey. 6Cha vel y boggyssagh euish mie: Nagh vel fys eu dy vel red beg dy hoorid sooraghey yn slane theayst? 7Glen-jee magh er-y-fa shen yn chenn soorid, dy vod shiu ve nyn dheayst noa; myr ta shin hene gyn soorid. Son ta Creest yn Eayn-caisht ain er ny ouralley er nyn son: 8Lhig dooin er-y-fa shen freayll yn feailley; cha nee lesh y chenn soorid, chamoo lesh y soorid dy ghoanlys as olkys; agh lesh yn arran-millish dy ynrickys as firrinys. 9Hug mee screeuyn hiu, dyn dy reayll sheshaght rish maarderee. 10Ny-yeih cha nee ooilley-cooidjagh rish maarderee yn theihll shoh, ny rish ny sayntoilee, ny ny tranlaasee, ny roosyn ta cur ooashley da jallooyn; son eisht beign diu dy jarroo goll ass y theihll. 11Agh nish ta mee er scrieu hiu, gyn sheshaght y reayll, my ta dooinney erbee ta enmyssit braar ny vaarderagh, ny sayntoilagh, ny jallooder, ny fer scammyltagh, ny meshtyllagh, ny ny hranlaasagh, marish lheid y fer wheesh as gyn dy ghoaill bee. 12Son cre t’aym’s dy yannoo dy vriwnys adsyn neesht ta cheu-mooie [jeh’n agglish]? nagh vel shiuish dy vriwnys adsyn ta er cheu-sthie? 13Agh adsyn ta er cheu-mooie, ta Jee dy vriwnys. Shen-y-fa cur-jee ersooyl veih nyn mast’ eu yn persoon mee-chrauee shen.