CAB. VII

1Nish mychione ny reddyn scrieu shiu hym: Te mie son dooinney gyn dy ve kianlt gys ben. 2Ny-yeih, dy haghney maarderys, lhig da e ven hene ve ec dagh dooinney, as dagh ben e sheshey hene. 3Lhig da’n dooinney coyrt da’n ven kenjallys cooie: as myrgeddin yn ven da’n sheshey eck. 4Cha vel pooar ec y ven er y chorp eck hene, agh ec y dooinney: as myrgeddin cha vel pooar ec y dooinney er e chorp hene, agh ec y ven. 5Ny treig-jee y cheilley, agh lesh coardail son traa, dy vod caa ve eu son trostey as padjer; as dy heet cooidjagh reesht, nagh miolee yn drogh-spyrryd shiu son nyn neu-heeltys. 6Agh shoh ta mee dy loayrt myr coyrle, as cha nee myr sarey. 7Son baillym dy beagh dy chooilley ghooinney eer myr ta mee hene: agh ta e ghioot hene ec dagh dooinney veih Jee, fer er yn aght shoh, as fer er aght elley. 8Ta mee gra roosyn er-y-fa shen nagh vel poost as rish mraane-treoghe, Te mie er nyn son my nee ad cummal orroo hene, eer myr ta mish. 9Agh mannagh vod ad freayll orroo hene, lhig daue poosey: son te ny share dy phoosey na dy ve er aile. 10As dauesyn ta poost ta mee coyrt sarey, ny-yeih cha nee mish, agh y Chiarn, Ny lhig da’n ven ve er ny scarrey veih’n sheshey eck: 11Agh my t’ee son scarrey, lhig ee cummal gyn poosey reesht, er-nonney lhig ee ve coardit rish e sheshey: as ny lhig da’n dooinney cur ersooyl e ven. 12Agh mychione ny reddyn elley ta mish loayrt, cha nee yn Chiarn. My ta ec braar erbee ben nagh vel jeh’n chredjue, as ee ve booiagh dy chummal mârish, ny lhig da coyrt ee ersooyl. 13As y ven ta dooinney eck nagh vel jeh’n chredjue, as eh booiagh dy chummal mâree, ny lhig j’ee treigeil eh. 14Son ta’n dooinney eck nagh vel jeh’n chredjue er ny chasherickey liorish y ven, as ta’n ven nagh vel jeh’n chredjue er ny chasherickey liorish y dooinney: er aght elley veagh y chloan eu neu-ghlen; agh nish t’ad casherick. 15Agh my ta eshyn nagh vel jeh’n chredjue son scarrey, lhig da goll. Cha vel braar ny shuyr fo kiangley ayns lheid ny cooishyn: agh ta Jee er n’eamagh orrin gys shee. 16Son kys dhyt, O ven, nagh jean oo dty heshey y hauail? ny kys dhyt, O ghooinney, nagh jean oo sauail dty ven? 17Agh myr ta Jee er oardaghey e chronney da dagh dooinney, myr ta’n Chiarn er n’eamagh er dy chooilley ghooinney, myr shen lhig da gimmeeaght: as shen myr ta mee goardaghey ayns ooilley ny kialteenyn. 18Vel dooinney erbee er ny eam as eh fo giarey-chymmylt? ny lhig da shirrey ve an-ghiarey-chymmylt. Vel dooinney erbee er ny eam an-ghiarey-chymmylt? ny lhig da giarey-chymmylt y ghoaill er. 19Cha vel giarey-chymmylt veg, as cha vel an-ghiarey-chymmylt veg, agh freaylley annaghyn Yee. 20Lhig da dy chooilley ghooinney tannaghtyn ’sy stayd cheddin v’eh ayn tra v’eh er ny eam. 21Vel oo er dty eam tra t’ou dty harvaant? ny bee fo imnea er y hon: agh my oddys oo ve er dty eaysley, gow eh myr reih. 22Son eshyn ta er ny eam ayns y Chiarn, as eh ny harvaant, t’eh ayns seyrsnys y Chiarn: myrgeddin eshyn ta er ny eam, as eh ayns seyrsnys, t’eh sharvaant Chreest. 23Ta shiuish kionnit lesh price, ny bee-jee sharvaantyn gheiney. 24Vraaraghyn, lhig dagh dooinney ’sy stayd v’eh ayn tra hie eh er eam, tannaghtyn ayn marish Jee. 25Nish mychione moidynyn, cha vel sarey erbee aym veih’n Chiarn: ny-yeih ta mee livrey my smooinaghtyn hene, myr fer ta er gheddyn foayr veih yn Chiarn dy ve firrinagh. 26Ta mee jeeaghyn er eisht dy vel shoh mie kyndagh rish yn êgin t’ayn, ta mee gra, dy vel eh mie son dooinney dy chummal myr t’eh. 27Vel oo kianlt rish ben? ny shir feaysley. Vel oo feayshlit veih ben? ny shir ben. 28Agh my t’ou poosey, cha vel oo er n’yannoo peccah; as my ta moidyn poosey, cha vel ee er n’yannoo peccah: ny-yeih, bee seaghyn ec nyn lheid ayns yn eill; agh ta mee gymmyrkey lhieu. 29Agh shoh ta mee dy ghra, vraaraghyn, dy vel yn traa giare. Shoh eisht eh, dy bee adsyn ta mraane oc, myr nagh beagh ad oc. 30As adsyn ta dobberan, myr nagh beagh ad dobberan; as adsyn ta ayns boggey, myr nagh beagh ad ayns boggey; as adsyn ta kionnaghey, myr nagh beagh ad goaill soylley jeh. 31As adsyn ta jannoo ymmyd jeh’n seihll shoh, myr nagh beagh ad jannoo drogh ymmyd jeh: son ta cummey yn seihll shoh caghlaa. 32Agh baillym shiu ve fegooish imnea. Eshyn nagh vel poost, t’eh imneagh son reddyn y Chiarn, kys oddys eh yn Chiarn y wooiys: 33Agh eshyn ta poost, t’eh imneagh son nheeghyn y theihll, kys oddys eh e ven y wooiys. 34Cha vel stayd y ven-phoost as y voidyn yn un chooid: Ta’n ven nagh vel poost imneagh mysh nheeghyn y Chiarn, dy vod ee ve casherick, chammah ayns corp as ayns spyrryd: agh ish ta poost, t’ee imneagh mysh nheeghyn y theihll, kys oddys ee yn sheshey eck y wooiys. 35As shoh ta mee loayrt son y vondeish eu hene, cha nee dy choyrt ribbey nyn raad, agh son shen ny ta cooie, as dy vod shiu tendeil er y Chiarn fegooish boirey. 36Agh my ta dooinney erbee smooinaghtyn dy vel eh dy ymmyrkey eh-hene dy neu-yesh gys e voidyn, my t’ee er n’gholl harrish blaa yn eash eck, as eh ymmyrchagh myr shen dy ve, lhig da ’aigney y yannoo, cha vel eh jannoo peccah: lhig daue poosey. 37Ny-yeih, eshyn t’er hassoo shickyr ayns e chree, as nagh vel fo êgin erbee, agh ta pooar echey harrish e aigney hene, as myr shen er chiarail ayns e chree, dy jean eh e voidyn y reayll, [gyn poosey], t’eh jannoo dy mie. 38Myr shoh eisht, eshyn ta dy choyrt ee ayns poosey, t’eh jannoo dy mie: agh eshyn nagh vel dy choyrt ee ayns poosey, t’eh jannoo ny share. 39Ta’n ven fo kiangley yn leigh choud as s’bio yn sheshey eck: agh my ta’n dooinney eck geddyn baase, t’ee ec e reamys hene dy ve poost rish quoi-erbee saillee; agh ayns y Chiarn. 40Agh t’ee ny s’maynrey ayns y smooinaght aym’s, my reaillys ee myr t’ee: as er-lhiam pene myrgeddin dy vel Spyrryd Yee aym.