CAB. IX

1Nagh nee ostyl mee? nagh vel mee ec my reamys hene? nagh vel mee er vakin Yeesey Creest nyn Jiarn? nagh nee shiuish yn obbyr aym’s ayns y Chiarn? 2Mannagh vel mee my ostyl da feallagh elley, foast gyn dooyt ta mee diuish: son shiuish cowrey m’ostyllys ayns y Chiarn. 3My ansoor dauesyn ta dy my whestional, shoh eh, 4Nagh vel cairys ain dy ee as dy iu ny mast’ eu? 5Nagh vel cairys ain dy chur lhien mârin er nyn yurnah shuyr, ben, chammah’s ostyllyn elley, as braaraghyn y Chiarn, as Cephas? 6Ny nee mish as Barnabas ny-lomarcan nagh vel ec nyn reamys dy chur nyn geird dy lhiattee? 7Quoi ta goll dy chaggey traa erbee er e chost hene? quoi ta soiaghey garey-feeyney, as nagh vel gee jeh’n vess echey? ny quoi ta bochillagh shioltane, as nagh vel giu jeh bainney’n chioltane? 8Vel mee loayrt shoh myr dooinney? as nagh vel y leigh hene gra lheid cheddin? 9Son te scruit ayns leigh Voses, Cha giangle oo seose beeal y dow ta stampey magh yn arroo. Vel kiarail Yee roshtyn gys dew? 10Ny vel eh loayrt shoh ooilley-cooidjagh er y ghraih ainyn? er y choontey ainyn, gyn dooyt, ta shoh scruit: dy vod eshyn ta traaue, traaue ayns treishteil; as eshyn ta bwoalley ayns treishteil, dy vow eh soylley jeh shoh e hreishteil. 11My ta shinyn er guirr diuish reddyn spyrrydoil, nee madyr mooar eh my nee mayd buinn ny nheeghyn seihltagh eu. 12My ta fir-ynsee elley er ghoaill y phooar shoh harriu, nagh vel eh ny s’cooie dooinyn? Ny-yeih, cha vel shin er n’yannoo ymmyd jeh’n phooar shoh; agh ta shin er hurranse dy chooilley chreoghys, er-aggle dy jinnagh shin sushtal Chreest y lhiettal. 13Nagh vel fys eu dy vel adsyn ta shirveish mysh nheeghyn casherick, baghey er yn oural? as dy vel adsyn ta tendeil ec yn altar, goaill ayrn jeh ny t’er yn altar? 14Dy jarroo myr shen ta’n Chiarn myrgeddin er n’oardaghey, dy lhisagh adsyn ta preacheil y sushtal, baghey er y sushtal. 15Agh cha vel mish er n’yannoo ymmyd erbee jeh’n phooar shoh. Chamoo ta mee er scrieu ny reddyn shoh, dy nee myr shoh veagh eh jeant er my hon: son bare dou baase y gheddyn na dooinney erbee dy yannoo shoh my voggys dyn bree. 16Son ga dy vel mee preacheil y sushtal, cha vel veg aym dy voggyssagh ass: son ta’n êgin shoh lhie orrym; dy jarroo, smerg dou mannagh jean-ym y sushtal y phreacheil. 17Son my ta mee jannoo shoh dy arryltagh, ta leagh my chour: agh my she noi m’aigney, ta preacheil y sushtal fo my churrym dy chooilleeney. 18Cre ta eisht my leagh? dy feer tra ta mee preacheil y sushtal, dy jinnin’s er sushtal Chreest dy ve fegooish cost, nagh goym yn slane vondeish jeh my phooar ’sy tushtal. 19Son ga nagh vel mee fo kiangley gys dooinney erbee, foast ta mee er n’yannoo mee hene my harvaant daue ooilley, dy voddin ny smoo y chosney [gys y chredjue.] 20As gys ny Hewnyn, ren mee gymmyrkey mee hene myr Ew, dy voddin ny Hewnyn y chosney; dauesyn ta fo’n leigh, myr fo’n leigh, dy voddin adsyn ta fo’n leigh y chosney; 21Dauesyn ta fegooish y leigh, myr fegooish y leigh, (ga nagh row mee fegooish y leigh gys Jee, agh fo’n leigh gys Creest) dy voddin adsyn ta fegooish y leigh y chosney. 22Dauesyn ta faase-chredjuagh, haink mee dy ve myr faase-chredjuagh, dy voddin yn vooinjer faase-chredjuagh y chosney: dy chooilley aght ta mee er m’ymmyrkey hene gys dy chooilley ghooinney, dy voddin liorish dy chooilley haase paart y hauail. 23As shoh ta mee jannoo er graih yn tushtal, dy voddin mêriu goaill ayrn jeh’n leagh ta ayns shen giallit. 24Nagh vel fys eu hene, dy vel adsyn ta roie ayns race, ooilley roie, agh dy nee unnane ta geddyn yn leagh? Roie-jee shiuish er lheid yn aght, dy vod shiu cosney. 25As dy chooilley ghooinney ta streeu son y varriaght, t’eh sheelt ayns dy chooilley nhee. Nish t’adsyn jannoo shoh dy chosney attey hed naardey, agh shinyn dy chosney attey nagh jed naardey. 26Ta mish er-y-fa shen myr shoh roie, cha nee ayns aght neu-hickyr; ta mee myr shen gleck, cha nee myr fer ta bwoalley yn gheay: 27Agh ta mee freayll my chorp fo, as dy smaghtaghey eh; er-aggle liorish aght erbee, erreish dooys v’er breacheil da feallagh elley, dy beign’s mee hene tilgit jeh.