CAB. II

1My chloan veggey, ta mee scrieu ny reddyn shoh hiuish, nagh jean shiu peccah. As my ta dooinney erbee jannoo peccah, ta fer ain ta loayrt er nyn son rish yn Ayr, Yeesey Creest yn fer-cairagh: 2As she eshyn yn lhiassaghey son nyn beccaghyn: as cha nee son ny peccaghyn ain ny-lomarcan, agh myrgeddin son peccaghyn yn seihll ooilley. 3As liorish shoh ta fys ain, dy vel enney ain er, my ta shin freayll e annaghyn. 4Eshyn ta gra, Ta enney aym er, as nagh vel freayll e annaghyn, t’eh ny vreagerey, as cha vel yn irriney ayn. 5Agh quoi-erbee ta freayll e ghoo, aynsyn ta graih Yee dy firrinagh jeant mie: liorish shoh ta fys ain dy vel shin aynsyn. 6Eshyn ta gra dy vel eh tannaghtyn aynsyn, lhisagh eh myr shen gimmeeaght, dy jarroo myr ren eshyn gimmeeaght. 7Vraaraghyn, cha vel mee scrieu anney erbee noa hiuish, agh shenn anney va eu er-dyn toshiaght: yn chenn anney yn goo ta shiu er chlashtyn er-dyn toshiaght. 8Reesht, anney noa ta mee scrieu hiu, red ta firrinagh aynsyn as ayndiuish: er-y-fa dy vel y dorraghys er n’gholl shaghey, as dy vel yn soilshey firrinagh hannah er jeet rish. 9Eshyn ta gra dy vel eh ’sy toilshey, as feoh echey er e vraar, t’eh dy jarroo foast ayns dorraghys. 10Eshyn shynney lesh e vraar, t’eh tannaghtyn ’sy toilshey, as cha bee eh ayns dangeyr erbee dy huittym. 11Agh eshyn ta feoh echey er e vraar, t’eh ayns dorraghys, as shooyl ’sy dorraghys, as cha vel fys echey cre’n raad t’eh goll, son dy vel dorraghys er gholley e hooillyn. 12Ta mee scrieu hiu, chloan veggey, er-yn-oyr dy vel ny peccaghyn eu er ny leih diu er graih e ennym. 13Ta mee scrieu hiuish, ayraghyn, er-y-fa dy vel enney eu ersyn ta er-dyn toshiaght. Ta mee scrieu hiu, gheiney aegey, er-yn-oyr dy dooar shiu yn varriaght er y drogh-er. Ta mee scrieu hiu, chloan veggey, er-yn-oyr dy vel enney er ve eu er yn Ayr. 14Ta mee scrieu hiu, ayraghyn, er-yn-oyr dy vel enney er ve eu ersyn ta er-dyn toshiaght. Ta mee er scrieu hiu, gheiney aegey, er-yn-oyr dy vel shiu lajer, as dy vel goo Yee tannaghtyn ayndiu, as dy vel shiu er gheddyn barriaght er y drogh-er. 15Ny cur-jee graih da’n seihll, ny da nheeghyn y theihll. My ta dooinney erbee cur graih da’n seihll, cha vel graih yn Ayr aynsyn. 16Son ooilley ny ta ’sy theihll, saynt ny foalley, as saynt ny sooilley, as moyrn y vea, cha vel ad jeh’n Ayr, agh jeh’n seihll. 17As ta’n seihll goll shaghey, as y taynt ain huggey: agh eshyn ta jannoo aigney Yee, vees er-mayrn son dy bragh. 18Chloan veggey, shoh’n traa s’jerree: as myr ta shiu er chlashtyn dy jig yn an-chreestee, dy jarroo nish ta ymmodee an-chreesteenyn ayn; liorish shoh ta fys ain dy nee shoh’n traa s’jerree. 19Hie ad magh voïn, agh cha row ad j’in: son dy beagh ad j’inyn, v’ad dyn dooyt er hannaghtyn mârin: agh hreig ad shin, dy voddagh enney v’er ny choyrt orroo, nagh row ad ooilley j’inyn. 20Agh ta shiu er ny ooilaghey liorish y fer casherick, as toiggal eu ayns dy chooilley nhee. 21Cha vel mee er scrieu hiu, er-yn-oyr nagh vel fys eu er yn irriney: agh er-yn-oyr dy vel fys eu er, as nagh vel breg erbee jeh’n irriney. 22Quoi yn breagerey, agh eshyn ta gobbal dy nee Yeesey yn Creest? Eshyn ta ny an-chreestee, ta gobbal yn Ayr as y Mac. 23Quoi-erbee ta gobbal y Mac, ta’n fer cheddin gobbal yn Ayr: [agh] eshyn ta goaill-rish y Mac, t’eh goaill-rish yn Ayr myrgeddin. 24Lhig da shen eisht tannaghtyn ayndiu, ta shiu er chlashtyn er-dyn toshiaght. My nee shen ta shiu er chlashtyn er-dyn toshiaght tannaghtyn ayndiu, nee shiuish myrgeddin tannaghtyn ayns y Mac, as ayns yn Ayr. 25As shoh yn gialdyn t’eh er n’yannoo dooin, dy jarroo yn vea veayn. 26Ny reddyn shoh ta mee er scrieu hiu, mychione ocsyn ta cleayney shiu. 27Agh ta’n ooilaghey ta shiu er gheddyn veihsyn, tannaghtyn ayndiu: as cha vel feme eu dooinney erbee dy ynsaghey shiu: Agh myr ta’n ooilaghey cheddin gynsaghey shiu mychione dy chooilley nhee, as dy nee’n irriney eh, as cha nee breg: as dy jarroo myr t’eh er n’ynsaghey shiu, nee shiu tannaghtyn aynsyn. 28As nish, chloan veggey, tannee-jee aynsyn: tra hig eh kionfenish, dy vod dunnallys ’ve ain, as nagh bee mayd er nyn goyrt gys nearey ec y cheet echey. 29My ta fys eu dy vel eshyn cairagh, ta fys eu dy vel dy chooilley unnane ta cur rish cairys, er ny ruggey jehsyn.