CAB. III

1Cur-my-ner, cre’n sorch dy ghraih ta’n Ayr er stowal orrin, dy beagh shin enmyssit nyn gloan dy Yee: shen-y-fa cha vel enney ec y theihll orrin, er-y-fa nagh row enney echey ersyn. 2My chaarjyn, nish ta shin nyn gloan dy Yee, as cha lheear dooin foast cre vees mayd: agh ta fys ain, tra vees eshyn er ny hoilshaghey, dy bee mayd goll-rishyn; son nee mayd fakin eh myr t’eh. 3As ta dy chooilley ghooinney ta’n treishteil shoh echey ayn hene, glenney eh-hene, dy jarroo myr t’eshyn glen. 4Quoi-erbee ta jannoo peccah, t’eh myrgeddin brishey yn leigh; son she peccah ta brishey yn leigh. 5As ta fys eu dy row eshyn er ny hoilshaghey dy ghoaill ersooyl nyn beccaghyn; as aynsyn cha vel veg y pheccah. 6Quoi-erbee ta tannaghtyn aynsyn, cha vel eh jannoo peccah: quoi-erbee ta jannoo peccah, cha vel eh er vakin eh, chamoo ta enney er ve echey er. 7Chloan veggey, ny lhig da dooinney erbee shin y volley: eshyn ta jannoo cairys, t’eh cairagh, dy jarroo myr t’eshyn cairagh. 8Eshyn ta jannoo peccah, t’eh jeh’n drogh-spyrryd; son ta’n drogh-spyrryd kyndagh jeh peccah er-dyn toshiaght. Son yn oyr shoh va Mac Yee er ny hoilshaghey, dy voddagh eh cur mow obbraghyn y drogh-spyrryd. 9Quoi-erbee t’er ny ruggey jeh Jee, cha vel eh cur rish peccah; son ta’n rass echey tannaghtyn ayn: as cha vod eh ve fo reill peccah, er-y-fa dy vel eh er ny ruggey jeh Jee. 10Liorish shoh ta cloan Yee er nyn gronnaghey voish cloan y drogh-spyrryd: Quoi-erbee nagh vel jannoo cairys, cha vel eh jeh Jee, ny foast eshyn nagh nhynney lesh e vraar. 11Son shoh’n chaghteraght ta shiu er chlashtyn er-dyn toshiaght, dy lhisagh shin ve graihagh yn derrey yeh er y jeh elley. 12Cha nee myr va Cain, va jeh’n drogh-er shen, as varr e vraar: As cre’n-fa varr eh eh? Er-yn-oyr dy row ny obbraghyn echey hene olk, as obbraghyn e vraarey cairagh. 13Ny gow-jee yindys, my vraaraghyn, ga ta’n seihll coyrt dwoaie diu. 14Ta fys ain dy vel shin caghlaït veih baase gys bea, er-yn-oyr dy nhynney lhien ny braaraghyn: eshyn nagh nhynney lesh e vraar, t’eh tannaghtyn ayns baase. 15Quoi-erbee ta dwoaie echey er e vraar, t’eh ny ghunver: as ta fys eu nagh vel ec dunver erbee yn vea dy bragh farraghtyn tannaghtyn ayn. 16Liorish shoh ta shin toiggal graih Yee, ayns dy dug eh sheese e vioys er nyn son: as lhisagh shinyn nyn mioys y chur sheese son ny braaraghyn. 17Agh quoi-erbee ta cooid y theihll shoh echey, as fakin e vraar ayns feme, as ta dooney seose e veeghyn dy hymmey voish; kys ta graih Yee tannaghtyn ayn? 18My chloan veggey, ny lhig dooin graih y choyrt ayns raa, ny ayns glare; agh ayns jannoo as ayns firrinys. 19As liorish shoh ta fys ain er dy vel shin jeh’n irriney, as bee shickyrys ec nyn greeaghyn kiongoyrt rish, 20Son my ta ny creeaghyn ain dy gheyrey shin, ta Jee erskyn ny creeaghyn ain, as ta fys echey er dy chooilley nhee. 21My chaarjyn, mannagh vel nyn gree dy nyn gheyrey, eisht ta dunnallys ain dy hayrn er-gerrey gys Jee. 22As cre-erbee ta shin geearree, shen ta shin geddyn veihsyn, er-y-fa dy vel shin freayll ny annaghyn echey, as jannoo ny reddyn shen ta booisal ayns e hilley. 23As shoh yn sarey echey, Dy jean mayd credjal ayns ennym e Vac Yeesey Creest, as graih y choyrt yn derrey yeh da’n jeh elley, myr t’eh er choyrt sarey dooin. 24As eshyn ta freayll ny annaghyn echey, t’eh tannaghtyn ayns Jee, as Jee aynsyn: as liorish shoh ta fys ain dy vel eh tannaghtyn aynin, liorish y Spyrryd t’eh er choyrt dooin.