CAB. IV

1Chaarjyn, ny cred-jee dy chooilley spyrryd, agh prow-jee ny spyrrydyn vel ad veih Jee: er-yn-oyr dy vel ymmodee phadeyryn foalsey er n’gholl magh ’sy theihll. 2Liorish shoh gowee shiu baght jeh Spyrryd Yee: Dy chooilley spyrryd ta goaill-rish dy vel Yeesey Creest er jeet ayns yn eill, t’eh jeh Jee. 3As dy chooilley spyrryd nagh vel goaill-rish dy vel Yeesey Creest er jeet ayns yn eill, cha vel eh jeh Jee: as shoh spyrryd yn an-chreestee shen, my-e-chione ta shiu er chlashtyn, dy row eh ry-hoi cheet, as dy jarroo nish hene t’eh hannah ’sy theihll. 4Ta shiuish jeh Jee, chloan veggey, as er gheddyn y varriaght orroo: er-yn-oyr dy vel eshyn ta ayndiuish ny s’pooaral, na eshyn ta ayns y theihll. 5T’adsyn jeh’n theihll: shen-y-fa t’ad loayrt jeh’n seihll, as ta’n seihll geaishtagh roo. 6Ta shinyn veih Jee: eshyn shione da Jee, t’eh geaishtagh rooin; eshyn nagh vel veih Jee, cha vel eh coyrt clashtyn dooin. Liorish shoh ta shin cronnaghey Spyrryd ny firriney veih’n spyrryd dy volteyrys. 7Chaarjyn ghraihagh, lhig dooin graih y choyrt yn derrey yeh da’n jeh elley: son ta graih jeh Jee; as ta dy chooilley unnane ta graihagh, er ny ruggey jeh Jee, as shione da Jee. 8Eshyn nagh vel graihagh, cha nione da Jee; son ta Jee graih. 9Ayns shoh ta graih Yee er ny hoilshaghey dooinyn, er-yn-oyr dy ren Jee e ynrycan er-ny-gheddyn Vac y choyrt gys y theihll, dy voddagh shin ve bio ny hrooidsyn. 10Ayns shoh ta graih, cha nee dy dug shin graih da Jee, agh dy dug eshyn graih dooin, as dy ren eh e Vac y choyrt dy ve lhiassaghey son nyn beccaghyn. 11My chaarjyn, my hug Jee myr shoh graih dooin, lhisagh shinyn myrgeddin graih y choyrt yn derrey yeh da’n jeh elley. 12Cha vel dooinney erbee er vakin Jee ec traa erbee. My ta shin graihagh yn derrey yeh er y jeh elley, ta Jee tannaghtyn aynin, as ta’n ghraih echey dy firrinagh aynin. 13Liorish shoh ta fys ain dy vel shin tannaghtyn aynsyn, as eshyn aynin, er-yn-oyr dy vel eh er choyrt dooinyn jeh’n Spyrryd echey. 14As ta shin er vakin, as ta shin gymmyrkey feanish dy vel yn Ayr er choyrt yn Mac dy ve Saualtagh y theihll. 15Quoi-erbee nee goaill-rish dy nee Yeesey Mac Yee, ta Jee tannaghtyn aynsyn, as eshyn ayns Jee. 16As ta shin er hoiggal as er chredjal yn ghraih t’ec Jee dooinyn. Ta Jee graih; as eshyn ta tannaghtyn ayns graih, t’eh tannaghtyn ayns Jee, as Jee aynsyn. 17Ayns shoh ta’n ghraih ain soilshit dy ve firrinagh, dy vel dunnallys ain ayns laa yn vriwnys; er-yn-oyr myr ta eshyn, myr shen ta shinyn ayns y theihll shoh. 18Cha vel veg yn aggle ayns graih; agh ta graih firrinagh ceau jeh aggle; son raad ta aggle ta torchagh: eshyn ta fo aggle, cha vel eh firrinagh ayns graih. 19Ta graih ain ersyn, er-yn-oyr dy dug eshyn hoshiaght graih dooin. 20My ta dooinney gra, Ta graih aym er Jee, as dwoaie echey er e vraar, t’eh ny vreagerey: son eshyn nagh nhynney lesh e vraar t’eh er vakin, kys oddys eh graih y choyrt da Jee nagh vel eh er vakin? 21As shoh yn sarey t’ain veihsyn, Eshyn ta graihagh er Jee, dy der eh graih da e vraar myrgeddin.