CAB. V

1Quoi-erbee ta credjal dy nee Yeesey yn Creest, t’eh ruggit jeh Jee: as dy chooilley unnane ta graihagh ersyn ren geddyn, shynney lesh eshyn myrgeddin ta er ny gheddyn liorish. 2Liorish shoh ta fys ain dy vel shin graihagh er cloan Yee, tra ta shin coyrt graih da Jee, as freayll e annaghyn. 3Son shoh graih Yee, dy vreill mayd e annaghyn: as cha vel ny annaghyn echey trome. 4Son cre-erbee t’er ny ruggey jeh Jee, te geddyn barriaght er y theihll: as shoh yn varriaght ta cur y seihll fo-chosh, dy jarroo yn credjue ain. 5Quoi eh ta geddyn barriaght er y theihll, agh eshyn ta credjal dy nee Yeesey Mac Yee? 6Shoh eshyn haink liorish ushtey as fuill, dy jarroo Yeesey Creest; cha nee liorish ushtey ny-lomarcan, agh liorish ushtey as fuill: as she yn Spyrryd ta gymmyrkey feanish, er-yn-oyr dy vel y Spyrryd firrinys. 7Son ta three ayn ta gymmyrkey feanish ayns niau, yn Ayr, yn Goo, as y Spyrryd Noo: as ta’n three shoh unnane. 8As ta three ayn ta gymmyrkey feanish er y thalloo, yn spyrryd, as yn ushtey, as yn uill: as ta’n three shoh coardail ayns yn un red. 9My ta shin goaill feanish gheiney, ta feanish Yee ny s’troshey: son shoh feanish Yee, t’eh er n’ymmyrkey jeh e Vac. 10Eshyn ta credjal ayns Mac Yee, ta’n feanish echey ayn hene: eshyn nagh vel credjal Jee, t’eh er n’yannoo eh ny vreagerey; er-yn-oyr nagh vel eh credjal yn recortys ta Jee er n’ymmyrkey jeh e Vac. 11As shoh yn recortys, dy vel Jee er choyrt dooin yn vea dy bragh beayn: as ta’n vea shoh ayns e Vac. 12Eshyn ta’n Mac echey, ta’n vea echey: as eshyn nagh vel yn Mac echey, cha vel echey yn vea. 13Ny reddyn shoh ta mee er scrieu hiuish ta credjal ayns ennym Mac Yee; dy vod shiu toiggal dy vel eu yn vea veayn, as dy vod shiu credjal ayns ennym Mac Yee. 14As shoh’n treishteil t’ain aynsyn, my hirrys shin nhee erbee cordail rish e aigney, t’eh geaishtagh rooin. 15As my ta fys ain dy vel eh geaishtagh rooin, cre-erbee ta shin shirrey, ta fys ain dy vow mayd ny accanyn ta shin dy yeearree er. 16My ta dooinney erbee fakin e vraar cur rish peccah nagh vel gys baase, nee eh guee er e hon, as yiow eh bea er nyn son ocsyn nagh vel jannoo peccah gys baase. Ta peccah ayn gys baase: cha vel mee gra dy lhisagh eh guee er y hon. 17Ta dy chooilley neu-ynrickys peccah: as ta peccah ayn nagh vel gys baase. 18Ta fys ain quoi-erbee ta ruggit jeh Jee, nagh vel eh cur rish peccah; agh eshyn ta er ny ghientyn jeh Jee, t’eh freayll arrey er hene, as cha vel yn drogh-er bentyn rish. 19As ta fys ain dy vel shin veih Jee, as dy vel ooilley yn seihll ny lhie ayns mee-chraueeaght. 20As ta fys ain dy vel Mac Yee er jeet, as er choyrt dooin tushtey, dy vod mayd enney y choyrt ersyn ta firrinagh: as ta shin aynsyn ta firrinagh, dy jarroo ayns e Vac Yeesey Creest. Shoh yn Jee firrinagh, as yn vea dy bragh farraghtyn. 21Chloan veggey, freill-jee shiu hene veih jallooyn. Amen.