CAB. I

1Nish va’n ree David shenn as er roie dy mie ayns eash; as choodee ad eh lesh eaddeeyn, agh cha dooar eh veg y chiass. 2Shen-y-fa dooyrt e 1:2 Fir-lhee.harvaantyn rish, Lhig da ve er ny gheddyn magh son my hiarn y ree moidyn aeg, as lhig jee shirveish er y ree, as gerjaghey eh, as lhie ayns dty oghrish, dy vod my hiarn y ree chiass y gheddyn. 3Myr shen hir ad magh son ben-aeg aalin trooid ooilley ardjyn Israel, as hooar ad Abishag yn Shunammite, as hug ad lhieu ee gys y ree. 4As va’n ven-aeg feer aalin, as ren ee gerjaghey yn ree, as tendeil er: agh cha row veg echey dy yannoo r’ee.

5Eisht hrog Adonijah mac Haggith eh-hene seose, gra, Beem’s yn ree: as ren eh aarloo fainee, as markee, as jeih coshee as da-eed dy roie roish. 6As cha row e ayr er ve jymmoosagh rish ec traa erbee, ayns gra, Cre’n-fa t’ou er n’yannoo myr shoh? as v’eh myrgeddin ny ghooinney feer stoamey; as rug e voir eh lurg Absalom. 7As ren eh stiagh rish Joab mac Zeruiah, as rish Abiathar yn saggyrt: as adsyn deiyr er Adonijah, chooin ad lesh. 8Agh Zadok yn saggyrt, as Benaiah mac Jehoiada, as Nathan y phadeyr, as Shimei, as Rei, as ny ard-gheiney va lesh David, cha row ad lesh Adonijah. 9As varr Adonijah kirree, as dew, as muirht, liorish creg Zoheleth, ta liorish Enrogel, as chuir eh ooilley e vraaraghyn mec y ree, as ooilley deiney Yudah sharvaantyn y ree. 10Agh Nathan yn phadeyr, as Benaiah, as ny deiney mooarey, as Solomon e vraar, cha chuir eh edyr.

11Er-y-fa shen loayr Nathan rish Bath-sheba moir Solomon, gra, Nagh vel oo er chlashtyn dy vel Adonijah mac Haggith reill, as ta shoh ooilley gyn-yss da nyn jiarn David? 12Tar nish er-y-fa shen, as lhig dooys, ta mee guee ort, coyrle y choyrt dhyt, dy vod oo dty vioys hene, as bioys dty vac Solomon, y hauail. 13Immee stiagh gys y ree David, as abbyr rish, Nagh ren uss, my hiarn, O ree, breearrey da dty inney-veyl hene, gra, Son shickyrys nee Solomon yn mac ayd’s reill my lurg’s, as nee eh soie er my stoyl-reeoil? kys te eisht dy vel Adonijah reill? 14Cur-my-ner, choud as t’ou foast loayrt ayns shen rish y ree, hig-yms myrgeddin stiagh geiyrt ort, as nee’m dty ghoan y yannoo mie.

15As hie Bath-sheba stiagh gys y ree ’sy chamyr, as va’n ree feer shenn, as ren Abishag yn Shunammite shirveish er y ree. 16As chroym Bath-sheba sheese ayns ammys da’n ree. As dooyrt y ree, Cre t’ou geearree? 17As dooyrt ee rish, My hiarn, ren uss breearrey liorish y Chiarn dty Yee da dty inney-veyl, gra, Son shickyrys nee Solomon dty vac reill my lurg, as nee eh soie er my stoyl-reeoil: 18As nish, cur-my-ner, ta Adonijah reill; as nish, my hiarn yn ree, cha vel fys ayd er shoh. 19As t’eh er varroo ymmodee dew as muirht, as niart kirree, as t’eh er chuirrey ooilley mec y ree, as Abiathar yn saggyrt, as Joab captan y cheshaght-chaggee: agh Solomon dty harvaant cha vel eh er chuirrey. 20As uss, my hiarn, O ree, ta sooillyn ooilley Israel soit ort, er-chee oo dy hoilshaghey daue, quoi nee soie er stoyl-reeoil my hiarn yn ree ny yeï. 21Er aght elley, hig eh gy-kione, tra nee my hiarn y ree cadley marish e ayraghyn, dy beem’s as my vac Solomon coontit myr noidyn.

22As cur-my-ner, choud as v’ee foast loayrt rish y ree, haink Nathan y phadeyr stiagh. 23As dinsh ad da’n ree, gra, Cur-my-ner, Nathan y phadeyr. As tra v’eh er jeet stiagh fenish y ree, chroym eh eh-hene kiongoyrt rish y ree lesh e eddin gys y thalloo. 24As dooyrt Nathan, My hiarn, O ree, vel uss er ghra, Nee Adonijah reill my lurg, as nee eh soie er my stoyl-reeoil? 25Son t’eh er n’gholl sheese jiu, as er varroo ymmodee dew as muirht as niart kirree, as t’eh er chuirrey ooilley mec y ree, as captanyn yn armee, as Abiathar y saggyrt: as cur-my-ner t’ad gee as giu kiongoyrt rish, as gra, Dy saue Jee ree Adonijah. 26Agh mish, eer mish dty harvaant, as Zadok yn saggyrt, as Benaiah mac Jehoiada, as dty harvaant Solomon, cha vel eh er chuirrey. 27Vel y chooish shoh veih my hiarn y ree, as cha vel oo er hoilshaghey eh da dty harvaant, quoi eh ta kiarit dy hoie er stoyl-reeoil my hiarn yn ree ny lurg?

28Eisht dansoor y ree David, as dooyrt eh, Eïe er Bath-sheba hym’s. As haink ee fenish y ree, as hass ee kiongoyrt rish. 29As ren y ree loo, as gra, Myr ta’n Chiarn bio, t’er livrey my annym ass dy chooilley arkys, 30Eer myr loo mee dhyt liorish yn Chiarn Jee Israel, gra, Son shickyrys nee Solomon dty vac reill my yeï, as nee eh soie er my stoyl-reeoil ayns my ynnyd, eer myr shen neem’s son firrinys jannoo yn laa t’ayn jiu. 31Eisht chroym Bath-sheba sheese lesh e eddin gys yn ooir, as hug ee arrym da’n ree, gra, Lhig da my hiarn ree David ve foddey beayn. 32As dooyrt ree David, Cur-jee hym’s Zadok yn saggyrt, as Nathan y phadeyr, as Benaiah mac Jehoiada. As haink ad kiongoyrt rish y ree. 33Dooyrt y ree myrgeddin roo, Gow-jee mêriu sharvaantyn nyn jiarn, as cur-jee er Solomon my vac dy varkiagh er my vule hene, as cur-jee lhieu eh sheese gys Gihon. 34As lhig Zadok yn saggyrt as Nathan y phadeyr ooilaghey eh ayns shen ny ree er Israel: as sheid-jee yn trumpet, gra, Dy saue Jee ree Solomon. 35Eisht hig shiu seose geiyrt er, dy vod eh cheet as soie er my stoyl-reeoil; son eshyn vees ree ayns my ynnyd: as ta mee er phointeil eh dy v’eh er-reill er Israel as er Judah. 36As dreggyr Benaiah mac Jehoiada yn ree, as dooyrt eh, Amen: lhig da’n Chiarn Jee my hiarn yn ree gra myr shen neesht. 37Myr ta’n Chiarn er ve marish my hiarn yn ree, eer myr shen dy row eh marish Solomon, as e stoyl-reeoil y yannoo ny s’pooaral na stoyl-reeoil my hiarn ree David. 38Myr shen Zadok yn saggyrt, as Nathan y phadeyr, as Benaiah mac Jehoiada, as ny Cherethiteyn, as ny Pelethiteyn, hie ad sheese, as hug ad er Solomon dy varkiagh er mule ree David, as hug ad lhieu eh gys Gihon. 39As ghow Zadok yn saggyrt eairk dy ooil ass y chabbane-agglish, as dooilee eh Solomon: As heid ad yn trumpet; as dooyrt ooilley’n pobble, Dy saue Jee ree Solomon. 40As haink ooilley’n pobble seose geiyrt er; as ren y pobble bingys lesh greïnyn-kiaullee, as v’ad ayns ard-voggey, ayns wheesh as dy ren y thalloo craa lesh y feiyr oc.

41As cheayll Adonijah as ooilley ny goaldee va mârish shoh, myr v’ad erreish gee. As tra cheayll Joab feiyr y trumpet, dooyrt eh, Cre’n-fa ta’n anvea shoh, t’er chur yn ard-valley bun-ry-skyn? 42As choud as v’eh foast loayrt, cur-my-ner, haink Jonathan mac Abiathar yn saggyrt, as dooyrt Adonijah rish, Tar stiagh, son t’ou uss dty ghooinney dunnal, as cur lhiat naightyn mie. 43As dreggyr Jonathan as dooyrt eh rish Adonijah, Dy firrinagh ta’n chiarn ain ree David er n’yannoo Solomon yn ree. 44As ta’n ree er choyrt mârish Zadok yn saggyrt, as Nathan y phadeyr, as Benaiah mac Jehoiada, as ny Cherethiteyn, as ny Pelethiteyn, as t’ad er choyrt er markiagh er mule y ree. 45As ta Zadok yn saggyrt, as Nathan y phadeyr er ooilaghey eh ny ree ayns Gihon; as t’ad er jeet seose veih shen ayns ard-voggey, myr shen dy ren yn ard-valley craa lesh y feiyr oc: as shoh’n chiaull ta shiu er chlashtyn. 46As myrgeddin ta Solomon soie er stoyl-reeoil yn reeriaght. 47As marish shen, haink sharvaantyn y ree dy vannaghey nyn jiarn ree David, gra, Dy jean Jee ennym Solomon ny s’ooasle na dty ennym’s, as dy jean eh yn stoyl-reeoil echeysyn ny s’troshey na’n stoyl-reeoil ayd’s: as chroym y ree eh hene er y lhiabbee, ooashlaghey. 48As dooyrt y ree ny-sodjey, Bannit dy row’n Chiarn Jee dy Israel, t’er choyrt fer dy hoie er my stoyl-reeoil jiu, my hooillyn hene eer jeeaghyn er. 49As huitt atchim er ooilley ny goaldee va marish Adonijah, as hrog ad orroo, as chossyn ad dy chooilley ghooinney e raad hene.

50As va Adonijah ayns aggle e vaaish roish Solomon, as dirree eh seose, as hie eh, as ghow eh greme er eairkyn yn altar. 51As ve inshit da Solomon, gra, Cur-my-ner ta Adonijah goaill aggle roish ree Solomon: son cur-my-ner, t’eh er ghoaill greme er eairkyn yn altar, gra, Lhig da ree Solomon loo dooys jiu, nagh jean eh e harvaant y varroo lesh y chliwe. 52As dooyrt Solomon, My yeeaghys eh eh-hene ny ghooinney onnoroil, cha jean renaig jeh tuittym gys yn ooir: agh my vees olkys er ny gheddyn ayn, yiow eh baase. 53Eisht hug ree Solomon fys er, as hug ad lhieu eh neose veih’n altar: as haink eh, as chroym eh eh-hene gys ree Solomon: as dooyrt Solomon rish, Immee royd gys dty hie.