CAB. X

1As tra cheayll ben-reïn Sheba jeh goo Solomon, mychione ennym y Chiarn, haink ee dy phrowal eh lesh questionyn dorraghey. 2As haink ee gys Jerusalem lesh sheshaght feer vooar, as camelyn laadit lesh spiceyn, as weight airh, as jewellyn costal: as tra v’ee er jeet gys Solomon, loayr ee rish jeh ooilley ny v’eck ayns e cree. 3As dinsh Solomon jee ooilley ny questionyn eck: cha row red erbee follit veih’n ree, nagh dinsh eh jee. 4As tra va ben-reïn Sheba er vakin ooilley creenaght Solomon, as yn thie v’eh er hroggal, 5Gien e voayrd, as myr va ny fir-oik echey nyn soie, as stayd e hirveishee, as nyn goamrey, as ny butleryn, as ny greeshyn, orroo hie eh seose gys thie’n Chiarn; chaill ee e tappey lesh yindys. 6As dooyrt ee rish y ree, Spheer va’n goo cheayll mee ayns my heer hene jeh dty obbraghyn as dty chreenaght. 7Ny-yeih cha chred mee ny goan, derrey haink mee-hene, as dy vel my hooillyn er vakin eh; as cur-my-ner, cha row’n derrey lieh inshit dou: ta dty chreenaght as dty vaynrys foddey erskyn y goo cheayll mee. 8S’maynrey ta dty gheiney, s’maynrey t’ad shoh dty harvaantyn, ta shassoo dy kinjagh kiongoyrt rhyt, as clashtyn dty chreenaght. 9Bannit dy row’n Chiarn dty Yee, ghow taitnys aynyd, dy hoiaghey oo er stoyl-reeoil Israel: er-yn-oyr dy bynney lesh y Chiarn Israel er-dy-rieau, shen-y-fa ren eh ree jeed’s, dy chur briwnys as cairys. 10As hug ee da’n ree keead talent as feed dy airh, as stoyr yindyssagh dy spiceyn, as jewellyn costal: cha daink arragh lheid y palchey dy spiceyn, as ad shoh hug ben-reïn Sheba da ree Solomon. 11As lhuingys Hiram, hie son airh gys Ophir, hug ad lhieu myrgeddin veih Ophir palchey mooar dy viljyn-almug, as jewellyn costal. 12As ren y ree jeh ny biljyn-almug pillaryn son thie’n Chiarn, as son thie’n ree, claasaghyn myrgeddin, as greinyn-kiaullee son ny fir-chiaullee: cha daink veg jeh lheid ny biljyn-almug, chamoo va nyn lheid er ny akin gys y laa t’ayn jiu. 13As hug ree Solomon da ben-reïn Sheba e slane geearree, cre-erbee ren ee shirrey, marish shen hug eh jee jeh e feoiltys reeoil: myr shen hyndaa ee, as hie ee roïe gys e cheer hene, ish as e sharvaantyn.

14Nish va trimmid yn airh haink gys Solomon ayns un vleïn, shey cheead three-feed as shey talentyn dy airh; 15Marish y custom v’eh troggal jeh ny oaneryn lhuingey va dellal, as jeh cooid ny marchanyn-spice, as jeh ooilley reeaghyn Arabia, as jeh kiannoortyn y cheer.

16As ren ree Solomon daa cheead target dy airh hammarit: hie shey cheead shekel dy airh dy yannoo un target. 17As ren eh three cheead scape dy airh hammarit; hie three puint dy airh dy yannoo un scape: as hasht y ree ad ayns thie keylley Lebanon.

18Marish shoh, ren y ree stoyl-reeoil mooar dy ivory, as choodee eh harrish eh lesh glen airh. 19Va shey greeshyn gys y stoyl-reeoil, as va mullagh yn stoyl-reeoil runt cheu-chooylloo: as va geayltyn er dagh cheu jeh’n ynnyd-soie, as hass daa lion [dy airh] liorish ny geayltyn. 20As hass daa lion jeig ayns shen er dagh cheu er ny shey greeshyn: cha row y lheid jeant ayns reeriaght erbee.

21As va ooilley siyn-iu ree Solomon jeh airh, as va ooilley siyn thie keylley Lebanon jeh airh ghlen; cha row veg jeant jeh argid: son cha row veg y scansh jeh argid rish lhing Solomon. 22Son va ec ree Solomon ec y cheayn lhuingys Tharshish, marish lhuingys Hiram: keayrt ayns three bleeaney haink lhuingys Tharshish, cur lhieu airh as argid, ivory, as apeyn, as peacockyn. 23Myr shoh va ree Solomon erskyn ooilley reeaghyn y theihll, son berchys as creenaght.

24As va ooilley’n seihll shirrey gys Solomon, dy chlashtyn e chreenaght, va Jee er choyrt ayns e chree. 25As hug ad lhieu dagh dooinney e yiootyn, siyn argid, as siyn airh, as coamraghyn, as eilley-caggee, as spiceyn, cabbil, as muleyn, kuse cour ny bleeaney.

26As haggil Solomon cooidjagh fainee as markee: as v’echey thousane as kiare cheead fainagh, as daa housane jeig dy varkee, ren eh pointeil ayns ny ard-valjyn son fainee, as dy ve marish y ree ec Jerusalem. 27As ren y ree yn argid cha palchey ayns Jerusalem as claghyn, as ny cedaryn myr ny biljyn-sycamore ta ’sy choan, cha palchey.

28As hug Solomon lesh cabbil ass Egypt, as snaie aanrit: as va’n snaie aanrit er ny chreck rish marchanyn y ree. 29As va fainagh er ny choyrt lesh veih Egypt son shey cheead shekel dy argid, as cabbyl son shiaght-feed as jeih: as myrgeddin son ooilley reeaghyn ny Hittiteyn, as son reeaghyn Syria, hug ad lhieu magh ad liorish nyn ghellal.