CAB. XI

1Agh bynney lesh Solomon ymmodee mraane joarree, (marish inneen Pharaoh,) mraane ny Moabiteyn, Ammoniteyn, Edomiteyn, Zidonianee, as ny Hittiteyn; 2Jeh ny ashoonyn mychione oc dooyrt y Chiarn rish cloan Israel, Cha bee veg euish dy yannoo roosyn, ny adsyn riuish: son nee ad son shickyrys chyndaa ersooyl ny creeaghyn euish lurg ny jeeghyn oc hene. Ren Solomon lhiantyn huc shoh ayns graih. 3As va shiaght cheead ben echey, princessyn, as three cheead oainjyr: as hyndaa e vraane ersooyl e chree. 4Son haink eh gy-kione, tra va Solomon shenn, dy violee e vraane eh dy eiyrt er jeeghyn elley: as cha row e chree ynrick gys y Chiarn e Yee, myr va cree Ghavid e ayr. 5Son hie Solomon geiyrt er Ashtoreth jalloo ny Zidonianee, as geiyrt er Milcom jalloo dwoaiagh ny Ammoniteyn. 6As ren Solomon dy olk ayns shilley’n Chiarn, as cha deiyr eh dy slane er y Chiarn, myr ren David e ayr. 7Eisht hrog Solomon ynnyd ard son Chemosh, jalloo dwoaiagh Voab, ayns y chronk ta kiongoyrt rish Jerusalem; as son Molech, jalloo dwoaiagh cloan Ammon. 8As myrgeddin hrog eh son ooilley e vraane joarree ren lostey incense, as chebbal oural da ny jeeghyn oc.

9As va’n Chiarn jymmoosagh rish Solomon, er-yn-oyr dy row e chree er ny hyndaa veih’n Chiarn Jee Israel, va daa cheayrt er hoilshaghey eh-hene da, 10As er chur sarey da mychione shoh, nagh ragh eh lurg jeeghyn elley: agh cha dreill eh shen va’n Chiarn er harey. 11Shen-y-fa dooyrt y Chiarn rish Solomon, Son wheesh as dy vel oo er n’yannoo shoh, as nagh vel oo er reayll my chonaant as my lattyssyn, ta mee er harey dhyt, nee’m son shickyrys yn reeriaght y vrishey voïd, as ver-ym eh da dty harvaant. 12Ny-yeih, cha jean-ym shoh ayns ny laghyn ayd’s, er graih Ghavid dty ayr: agh scarr-ym eh veih laue dty vac. 13Ny-yeih, cha goym ersooyl ooilley’n reeriaght; agh ver-ym un tribe da dty vac, er graih my harvaant David, as er graih Yerusalem, ta mee er reih.

14As ghreinnee’n Chiarn seose noid da Solomon, Hadad yn Edomite, v’eh jeh sluight ree Edom. 15Son haink eh gy-kione, tra va David ayns Edom, as dy row Joab captan y cheshaght ersooyl seose dy oanluckey ny merriu, lurg da ve er varroo dy chooilley vac dooinney ayns Edom; 16(Son shey meeaghyn duirree Joab ayns shen marish ooilley Israel, derrey v’eh er stroie dy chooilley vac dooinney ayns Edom;) 17Dy chossyn Hadad er-chea, eshyn as shiartanse dy Edomiteyn, jeh sharvaantyn e ayr mârish, dy gholl gys Egypt: cha row Hadad eisht agh ny lhiannoo beg. 18As hrog ad orroo ass Midian, as haink ad gys Paran, as ghow ad deiney mâroo ass Paran, as haink ad gys Egypt, gys Pharaoh ree Egypt, hug thie ad, as doardee eh da beaghey, as hug eh da thalloo. 19As hooar Hadad ard foayr ayns shilley Pharaoh, myr shen dy dug eh da son ben shuyr e ven hene, shuyr Tahpenes yn ven-reïn. 20As rug shuyr Tahpenes da Genubath e vac, ren Tahpenes charbaa ayns thie Pharaoh: as va Genubath ayns thie Pharaoh, mastey mec Pharaoh. 21As tra cheayll Hadad ayns Egypt dy row David ny chadley marish e ayraghyn, as dy row Joab captan y cheshaght marroo, dooyrt Hadad rish Pharaoh, Lhig y raad dou, dy voddym goll gys my heer hene. 22Eisht dooyrt Pharaoh rish, Agh row laccal erbee ort mârym’s, dy vel oo shirrey goll gys dty heer hene? As dreggyr eh, Cha row laccal erbee: ny-yeih er aght erbee lhig dou goll.

23As ghreinnee Jee seose noid elley n’oï, Rezon mac Eliadah, chossyn er-chea veih e hiarn Hadadezer, ree Zobah. 24As haggil eh deiney huggey, as haink eh dy ve captan harrish sheshaght, tra varr David adsyn jeh Zobah: as hie ad gys Damascus, as ren ad baghey, as reill ayns Damascus. 25As v’eh ny noid da Israel rish ooilley lhing Solomon, cheu-mooie jeh’n olk ren Hadad y yannoo: as hug eh feoh da Israel, as ren eh reill er Syria.

26As Jeroboam mac Nebat, Ephrathite jeh Zereda, sharvaant Solomon, (va ennym e voir Zeruah, ben-treoghe,) ren eh shoh hene troggal seose e laue noi’n ree. 27As shoh va’n oyr dy hrog eh seose e laue noi’n ree: Hrog Solomon Millo, as cherree eh ny brishaghyn v’ayns voalley ard-valley Ghavid e ayr. 28As va’n dooinney Jeroboam ny reih dooinney caggee: as Solomon fakin yn dooinney aeg dy row eh tarroogh, ren eh eh ny er-reill harrish ooilley errey thie Yoseph. 29As haink eh gy-kione mysh y traa shen, myr va Jeroboam goll magh veih Jerusalem, dy dooar yn phadeyr Ahijah yn Shilonite eh er y raad: as v’eh [Ahijah] er choamrey eh-hene lesh garmad noa: as v’ad nyn-neesht ny-lomarcan ’sy vagher. 30As ghow Ahijah greme er y gharmad noa v’er hene, as raip eh eh ayns daa pheesh jeig. 31As dooyrt eh rish Jeroboam, Gow uss jeih peeshyn: son shoh myr ta’n Chiarn, Jee Israel, gra, Cur-my-ner, nee’m raipey yn reeriaght ass laue Solomon, as ver-ym jeih tribeyn dhyt’s: 32(Agh bee un tribe echeysyn er graih my harvaant David, as er graih Yerusalem, yn ard-valley ta mee er reih magh ass ooilley tribeyn Israel:) 33Er-yn-oyr dy vel ad er m’y hreigeil, as er chur ooashley da Ashtoreth, jee ny Zidonianee, Chemosh jee ny Moabiteyn, as Milcom jee cloan Ammon; as nagh vel ad er n’immeeaght ayns my raaidyn’s, dy yannoo shen ny ta cairagh ayns my hilley, as dy reayll my lattyssyn as my vriwnyssyn, myr ren David e ayr. 34Ny-yeih, cha goym yn slane reeriaght ass e laue: as nee’m eh ny phrince ooilley laghyn e vea, er graih Ghavid my harvaant, eh ren mee reih, er-yn-oyr dy dreill eh my annaghyn as my lattyssyn; 35Agh goym yn reeriaght ass laue e vac, as ver-ym eh dhyt’s, eer jeih tribeyn. 36As da e vac ver-ym un tribe, dy vod cainle ve ec David my harvaant dy kinjagh kiongoyrt rhym’s ayns Jerusalem, yn ard-valley ta mee er reih dou hene dy chur my ennym ayn. 37As nee’m uss y ghoaill, as nee oo reill, rere ooilley yeearree dt’annym, as bee oo dty ree er Israel. 38As hig eh gy-kione, my nee oo geaishtagh rish ooilley ny ta mee dy harey dhyt, as my nee oo shooyl ayns my raaidyn, as jannoo shen ny ta cairagh ayns my hilley, dy reayll my lattyssyn as my annaghyn, myr ren David my harvaant; dy beem’s mayrt, as trog-ym dhyt thie shickyr, myr hrog mee da David, as ver-ym Israel dhyt. 39As son shoh nee’m seaghney sluight Ghavid, agh cha nee son dy bragh. 40Va Solomon er-y-fa shen shirrey dy varroo Jeroboam: agh dirree Jeroboam, as chossyn eh er-chea gys Egypt, gys Shishak ree Egypt, as duirree eh ayns Egypt derrey baase Solomon.

41As y chooid elley jeh obbraghyn Solomon, as ooilley ny ren eh, as e chreenaght, nagh vel ad scruit ayns lioar obbraghyn Solomon. 42As y slane traa ren Solomon reill ayns Jerusalem, harrish ooilley Israel, va da-eed bleïn. 43As chaddil Solomon marish e ayraghyn, as v’eh oanluckit ayns ard-valley Ghavid e ayr: as ren Rehoboam e vac reill ayns e ynnyd.