CAB. XIV

1Ec y traa shen huitt Abijah mac Yeroboam ching. 2As loayr Jeroboam rish e ven, Trog ort, ta mee guee ort, as cur oo-hene ayns lheid y cummey nagh vod enney’ve ort dy nee oo ben Yeroboam; as immee royd gys Shiloh: cur-my-ner, ta Ahijah yn phadeyr ayns shen, eh dinsh dou dy beign my ree harrish yn pobble shoh. 3As gow mayrt jeih bwilleenyn, as keeakyn, as saagh dy vill, as immee royd huggey: inshee eh dhyt cre’n erree hig er y lhiannoo. 4As ren ben Yeroboam er yn aght shoh, as hrog ee urree, as hie ee gys Shiloh; as haink ee gys thie Ahijah. Agh cha b’leayr lesh Ahijah ee, son va e hooillyn er hassoo ’sy chione, kyndagh rish e eash.

5As dooyrt y Chiarn rish Ahijah, Cur-my-ner, ta ben Yeroboam cheet dy hirrey aghin ort son e mac, son t’eh ching: shoh, as myr shoh nee oo loayrt r’ee; son shoh myr vees eh, tra hig ee stiagh, dy lhiggys ee urree dy ve ben elley. 6As haink eh gy-kione, tra cheayll Ahijah feiyr ny cassyn eck myr haink ee stiagh er y dorrys, dy dooyrt eh, Tar stiagh, uss ven Yeroboam; cre’n-fa t’ou lhiggey ort dy ve ben elley? son ta mish er my choyrt hood’s lesh naightyn trome. 7Immee royd, insh da Jeroboam, Shoh myr ta’n Chiarn Jee Israel gra, Son wheesh as dy hoie mee oo seose erskyn yn pobble, as dy ren mee oo dty phrince harrish my phobble Israel, 8As vrish mee yn reeriaght veih thie Ghavid, as hug mee dhyt’s eh; as foast cha vel uss er ve myr va my harvaant David, dreill my haraghyn, as deiyr orrym lesh ooilley e chree, dy yannoo eer shen ny va cairagh ayns my hilley; 9Agh t’ou er n’yannoo olk erskyn ooilley ny va royd; son t’ou er n’gholl as er n’yannoo dhyt jeeghyn elley, as jallooyn lheït, dy my vrasnaghey gys corree, as t’ou er jyndaa cooyl rhym: 10Shen-y-fa, cur-my-ner, ver-ym lesh olk er thie Yeroboam, as giare-ym jeh veih Jeroboam ooilley e gheiney, rass as cass, marish ooilley e luight ta er-mayrn, ny faagit ayns Israel, as goym ersooyl fooilliagh thie Yeroboam, myr ta dooinney cartey eoylley lesh, derrey vees eh ooilley ersooyl. 11Eshyn ta geddyn baase jeh sluight Yeroboam ayns yn ard-valley nee ny moddee gee; as eshyn ta geddyn baase ’sy vagher nee eeanlee’n aer gee: son ta’n Chiarn er ghra eh. 12Trog ort, er-y-fa shen, as immee royd gys dty hie hene; as tra hig dty chassyn stiagh ’syn ard-valley, yiow’n lhiannoo baase. 13As nee ooilley Israel dobberan er e hon: as goanluckey eh: son eshyn ny-lomarcan jeh sluight Yeroboam nee cheet gys yn oaie, er-yn-oyr dy vel red ennagh dy chraueeaght gys y Chiarn Jee Israel er ny gheddyn aynsyn, ayns thie Yeroboam. 14Marish shoh, nee’n Chiarn troggal seose da hene ree harrish Israel, nee stroie thie Yeroboam ec y traa shen: agh caïd? dy jarroo nish. 15Son nee’n Chiarn Israel y woalley myr cuirtlagh t’er ny chraa ’syn ushtey, as nee eh Israel y astyrt ass y cheer vie shoh hug eh da ny ayraghyn oc, as nee eh ad y skeayley er cheu elley jeh’n awin, er-yn-oyr dy vel ad er n’yannoo ny keylljyn oc [son jallooyn,] brasnaghey yn Chiarn gys corree. 16As livreyee eh Israel seose, kyndagh rish peccaghyn Yeroboam, eh ren peccah, as hayrn Israel gys peccah.

17As dirree ben Yeroboam seose, as jimmee ee ro-ee, as haink ee gys Tirzah: as tra haink ee gys sole y dorrys, hooar y lhiannoo baase. 18As doanluck ad eh: as ren ooilley Israel dobberan er e hon, cordail rish goo’n Chiarn, loayr eh liorish e harvaant Ahijah yn phadeyr. 19As y chooid elley jeh obbraghyn Yeroboam, kys ren eh caggey, as kys ren eh reill, cur-my-ner, t’ad er ny scrieu ayns lioar recortyssyn reeaghyn Israel. 20As ny laghyn ren Jeroboam reill v’ad daa vleïn as feed: as ren eh cadley marish e ayraghyn, as ren Nadab e vac reill ayns e ynnyd.

21As ren Rehoboam mac Solomon reill ayns Judah. Va Rehoboam un vleïn as da-eed dy eash tra ren eh toshiaght dy reill, as ren eh reill shiaght bleeaney jeig ayns Jerusalem, yn ard-valley ren y Chiarn reih ass ooilley sheelogheyn Israel, dy choyrt e ennym ayn. As va ennym e voir Naamah yn Ammonitess. 22As ren Judah dy olk ayns shilley’n Chiarn, as vrasnee ad e yymmoose lesh nyn beccaghyn v’ad er chur roo, erskyn ooilley ny va nyn ayraghyn er n’yannoo. 23Son ren adsyn myrgeddin troggal daue hene ynnydyn ard, as jallooyn, as keylljyn, er dy chooilley chronk ard, as fo dy chooilley villey glass. 24As va Sodomiteyn myrgeddin ’sy cheer; as ren ad cordail rish ooilley obbraghyn feohdagh ny ashoonyn, ad ren y Chiarn tilgey magh kiongoyrt rish cloan Israel.

25As haink eh gy-kione ’sy wheiggoo vleïn jeh ree Rehoboam, dy daink Shishak ree Egypt seose noi Jerusalem: 26As ghow eh ersooyl tashtaghyn thie’n Chiarn, as tashtaghyn thie’n ree; ghow eh dy jarroo ooilley ersooyl: as ghow eh ersooyl ooilley ny scapeyn airhey va Solomon er n’yannoo. 27As ren ree Rehoboam ayns yn ynnyd oc scapeyn prashey, as hug eh ad fo currym captan y ghard, er va currym dorrys thie’n ree. 28As myr shen ve, tra hie’n ree stiagh ayns thie’n Chiarn, dy ren y gard ad y ymmyrkey, as cur lhieu ad back gys shamyr y ghard.

29Nish y chooid elley jeh obbraghyn Rehoboam, as ooilley ny ren eh, nagh vel ad er nyn scrieu ayns lioar recortyssyn reeaghyn Yudah? 30As va caggey eddyr Rehoboam as Jeroboam ooilley nyn laghyn. 31As ren Rehoboam cadley marish e ayraghyn, as v’eh oanluckit marish e ayraghyn ayns ard-valley Ghavid. As va ennym e voir Naamah yn Ammonitess. As ren Abijam e vac reill ayns e ynnyd.