CAB. XV

1Nish ayns yn hoghtoo vleïn jeig jeh ree Jeroboam mac Nebat, ren Abijam reill harrish Judah. 2Three bleeaney ren eh reill ayns Jerusalem. As va ennym e voir Maachah, inneen Abishalom. 3As deiyr eh er ooilley peccaghyn e ayrey: as cha row e chree firrinagh gys y Chiarn e Yee, myr va cree Ghavid e ayr. 4Ny-yeih, er graih Ghavid, hug yn Chiarn e Yee da soilshey ayns Jerusalem, liorish soiaghey seose e vac ny lurg, as dy chummal seose Jerusalem: 5Er-yn-oyr dy ren David shen ny va jeeragh ayns shilley’n Chiarn, as nagh hyndaa eh dy lhiattee veih nhee erbee dy doardee eh da ooilley laghyn e vea, agh ynrycan ayns cooish Uriah yn Hittite. 6As va caggey eddyr Rehoboam as Jeroboam ooilley laghyn e vea. 7Nish y chooid elley jeh obbraghyn Abijam, as ooilley ny ren eh, nagh vel ad er nyn scrieu ayns lioar recortyssyn reeaghyn Yudah? As va caggey eddyr Abijam as Jeroboam. 8As ren Abijam cadley marish e ayraghyn, as doanluck ad eh ayns ard-valley Ghavid: as ren Asa e vac reill ayns e ynnyd.

9As ayns y feedoo vleïn jeh Jeroboam ree Israel, ren Asa reill harrish Judah. 10As bleïn as da-eed ren eh reill ayns Jerusalem. As va ennym e voir Maachah, inneen Abishalom. 11As ren Asa shen ny va cairagh ayns shilley’n Chiarn, myr ren David e ayr. 12As deiyr eh ny Sodomiteyn ass y cheer, as chur eh sheese ooilley ny jallooyn va e ayraghyn er n’yannoo. 13As myrgeddin Maachah e voir, dy jarroo ish ren eh scughey veih ve ny ben-reïn, er-yn-oyr dy hrog ee jalloo ayns y cheyll; as hug Asa mow yn jalloo eck, as losht eh eh liorish yn strooan Kidron. 14Agh cha row ny ard-ynnydyn er nyn goyrt sheese: ny-yeih, va cree Asa firrinagh gys y Chiarn ooilley e laghyn. 15As hug eh lesh ny reddyn va e ayr er chasherickey, as ny reddyn v’eh hene er chasherickey, stiagh gys thie’n Chiarn, argid, as airh, as siyn.

16As va caggey eddyr Asa as Baasha ree Israel, ooilley nyn laghyn. 17As hie Baasha ree Israel seose noi Judah, as ren eh Ramah y hroggal, son nagh jinnagh eh surranse da unnane erbee dy gholl magh, ny dy heet stiagh gys Asa ree Yudah. 18Eisht ghow Asa ooilley’n argid as yn airh va faagit ayns tashtaghyn thie’n Chiarn, as tashtaghyn thie’n ree, as livrey eh ad gys laueyn e harvaantyn: as hug ree Asa ad gys Ben-hadad mac Tabrimon, mac Hezion, ree Syria, va cummal ayns Damascus, gra, 19Ta conaant eddyr mish as uss, as eddyr my ayr as dt’ayr’s: cur-my-ner, ta mee er chur hood gioot dy argid as dy airh: tar royd, brish dty chonaant rish Baasha ree Israel, dy vod eh mish y aagail. 20Myr shoh ren Ben-hadad er raa ree Asa, as hug eh captanyn yn cheshaght v’echey noi ard-valjyn Israel, as woaill eh Ijon, as Dan, as Abelbeth-maachah, as ooilley Cinneroth, marish ooilley cheer Naphtali. 21As haink eh gy-kione, tra cheayll Baasha jeh, dy daag eh jeh troggal Ramah, as ren eh cummal ayns Tirzah. 22Eisht hug ree Asa eam trooid magh ooilley Judah, (cha row leshtal dy ve jeant son unnane erbee,) as ghow ad ersooyl claghyn Ramah, as y fuygh echey, lhieu va Baasha er hroggal ynnydyn lajer, as ren ree Asa troggal lhieu shoh Geba jeh Benjamin, as Mizpah. 23Yn chooid elley jeh ooilley obbraghyn Asa, as ooilley e niart, as ooilley ny ren eh, as ny ard-valjyn ren eh troggal, nagh vel ad er nyn scrieu ayns lioar recortyssyn reeaghyn Yudah? Agh ayns e henn eash v’eh doghanit ayns e chassyn. 24As ren Asa cadley marish e ayraghyn, as v’eh oanluckit marish e ayraghyn ayns ard-valley Ghavid e ayr: as ren Jehoshaphat e vac reill ayns e ynnyd.

25As ren Nadab mac Yeroboam goaill toshiaght dy reill harrish Israel, ’sy nah vleïn jeh Asa ree Yudah, as ren eh reill harrish Israel daa vleïn. 26As ren eh dy olk ayns shilley’n Chiarn, as deiyr eh er raaidyn e ayr, as er e pheccah, liorish shen hayrn eh Israel gys peccah.

27As ren Baasha mac Ahijah, jeh thie Issachar, girree-magh dy follit n’oï: agh varr Baasha eh ec Gibbethon, va lesh ny Philistinee; (son va Nadab as ooilley Israel cruinnaghey stiagh Gibbethon;) 28Dy jarroo ’sy trass vleïn jeh Asa ree Yudah ren Baasha eh y varroo, as reill ayns e ynnyd. 29As haink eh gy-kione, tra v’eh reill, dy yiare eh jeh ooilley thie Yeroboam; cha daag eh da Jeroboam unnane bio, nagh ren eh stroie, cordail rish raa’n Chiarn, ren eh loayrt liorish e harvaant Ahijah yn Shilonite: 30Kyndagh rish peccaghyn Yeroboam v’eh er n’yannoo, as er hayrn Israel ayndoo, liorish e ghrogh ymmyrkey lesh v’eh er vrasnaghey yn Chiarn Jee Israel gys corree.

31Nish yn chooid elley jeh obbraghyn Nadab, as ooilley ny ren eh, nagh vel ad er nyn scrieu ayns lioar recortyssyn reeaghyn Israel? 32As va caggey eddyr Asa as Baasha ree Israel ooilley nyn laghyn. 33’Sy trass vleïn jeh Asa ree Yudah, ghow Baasha mac Ahijah toshiaght dy reill harrish ooilley Israel ayns Tirzah, kiare bleeaney as feed. 34As ren eh dy olk ayns shilley’n Chiarn, as huill eh ayns raad Yeroboam, as ayns e pheccah liorish hayrn eh Israel gys peccah.