CAB. XVI

1Eisht haink goo’n Chiarn gys Jehu mac Hanani, noi Baasha, gra, 2Son wheesh as dy hrog mee oo seose veih’n joan, as er n’yannoo jeed prince harrish my phobble Israel, as t’ou uss er hooyl ayns raad Yeroboam, as er hayrn my phobble Israel gys peccah, dy vrasnaghey mee gys corree lesh nyn beccaghyn; 3Cur-my-ner, ver-yms mow sluight Vaasha, as sluight e hie; as ver-ym er dty hie’s dy ve goll-rish thie Yeroboam mac Nebat. 4Eshyn yiow baase jeh Baasha ’syn ard-valley nee ny moddee gee; as eh ta leshyn yiow baase ayns ny magheryn nee eeanlee’n aer gee. 5Nish y chooid elley jeh obbraghyn Vaasha, as ny ren eh, as e niart, nagh vel ad er nyn scrieu ayns lioar-cooinaghtyn reeaghyn Israel? 6Myr shoh ren Baasha cadley marish e ayraghyn, as v’eh oanluckit ayns Tirzah: as ren Elah e vac reill ayns e ynnyd. 7As myrgeddin, liorish yn phadeyr Jehu mac Hanani, haink goo’n Chiarn noi Baasha, as noi e hie, eer son ooilley’n olk ren eh ayns shilley’n Chiarn, ayns brasnaghey eh gys corree liorish obbyr e laueyn, as dy row eh casley rish thie Yeroboam, as er-yn-oyr dy varr eh eh.

8’Sy cheyoo vleïn as feed jeh Asa ree Yudah, ghow Elah mac Vaasha toshiaght dy reill harrish Israel ayns Tirzah, daa vleïn. 9As ren e harvaant Zimri, (captan er lieh jeh ny fainee echey,) girree-magh n’oï myr v’eh ayns Tirzah, giu eh-hene er-meshtey ayns thie Arza, stiurt e hie ayns Tirzah. 10As hie Zimri stiagh, as woaill eh eh, as varr eh eh, sy chiaghtoo vleïn as feed jeh Asa ree Yudah, as ren eh reill ayns e ynnyd.

11As haink eh gy-kione, tra ren eh toshiaght dy reill, cha leah as hoie eh er e stoyl-reeoil, dy varr eh ooilley thie Vaasha: cha daag eh fer hene jeh e gheiney, jeh e chynney, ny jeh e chaarjyn. 12Shoh myr stroie Zimri ooilley thie Vaasha, cordail rish goo’n Chiarn, ren eh loayrt noi Baasha liorish Jehu yn phadeyr; 13Son ooilley peccaghyn Vaasha, as peccaghyn Elah e vac, lioroo v’ad er n’yannoo dy olk, as lioroo v’ad er hayrn Israel gys peccah, ayns brasnaghey yn Chiarn Jee Israel gys corree lesh nyn 16:13 Ny jallooyn oc.vardalys. 14Nish y chooid elley jeh obbraghyn Elah, as ooilley ny ren eh, nagh vel ad er nyn scrieu ayns lioar-cooinaghtyn reeaghyn Israel?

15Ayns y chiaghtoo vleïn as feed jeh Asa ree Yudah, ren Zimri reill shiaght laa ayns Tirzah. As va’n pobble er champal noi Gibbethon, va lesh ny Philistinee. 16As cheayll y pobble va ayns y champ dy row Zimri er n’irree-magh, as myrgeddin er varroo yn ree: shen-y-fa ren ooilley Israel jannoo Omri, captan y cheshaght, ny ree harrish Israel yn laa shen ayns y champ. 17As hie Omri seose veih Gibbethon, as ooilley Israel mârish, as ren ad soiagh er Tirzah. 18As haink eh gy-kione, tra honnick Zimri dy row’n ard-valley er ny ghoaill, dy jagh eh stiagh ayns cooyrt plaase y ree, as losht eh thie’n ree er-e-skyn lesh aile, dy dooar eh baase, 19Son e pheccaghyn v’eh er chur roo ayns jannoo dy olk ayns shilley’n Chiarn, gimmeeaght ayns raad Yeroboam, as ayns y peccah shen v’eh er n’yannoo, dy hayrn Israel fo peccah. 20Nish y chooid elley jeh obbraghyn Zimri, as e irree-magh traitooragh, nagh vel ad scruit ayns lioar-cooinaghtyn reeaghyn Israel?

21Eisht vrish pobble Israel veih-my-cheilley ayns daa ayrn: deiyr yn derrey lieh jeh’n pobble er Tibni mac Ginath, dy yannoo eh ny ree; lhiann yn lieh elley gys Omri. 22Agh hooar yn pobble lhiann gys Omri yn varriaght er yn pobble ghow cheu Tibni mac Ginath: myr shen dy dooar Tibni baase, as ren Omri reill.

23’Syn un vleïn jeig as feed jeh Asa ree Yudah, ghow Omri toshiaght dy reill harrish Israel, daa vleïn jeig: shey bleeaney ren eh reill ayns Tirzah. 24As chionnee eh cronk Samaria veih Shemer son daa halent dy argid, as hrog eh ard-valley er y chronk, as yn ennym hug eh er va Samaria, lurg ennym Shemer, leshyn va’n chronk.

25Agh ren Omri jannoo dy olk ayns shilley’n Chiarn, as ny smessey na ooilley ny va roish. 26Son huill eh ayns ooilley raaidyn Yeroboam mac Nebat, as ayns e pheccah lesh shen v’eh er hayrn Israel gys peccah, dy vrasnaghey yn Chiarn Jee Israel gys corree lesh nyn vardalys. 27Nish y chooid elley jeh obbraghyn Omri ren eh, as prowal e niart, nagh vel ad er nyn scrieu ayns lioar-bleeaney reeaghyn Israel? 28Myr shoh ren Omri cadley marish e ayraghyn, as v’eh oanluckit ayns Samaria: as ren Ahab e vac reill ayns e ynnyd.

29As ’sy hoghtoo vleïn yeig as feed jeh Asa ree Yudah, ghow Ahab mac Omri toshiaght dy reill harrish Israel: as ren Ahab mac Omri reill harrish Israel, ayns Samaria, daa vleïn as feed. 30As ren Ahab mac Omri jannoo dy olk ayns shilley’n Chiarn erskyn ooilley ny va roish. 31As haink eh gy-kione, myr nagh beagh eh agh red fardalagh dasyn dy hooyl ayns peccaghyn Yeroboam mac Nebat, dy ghow eh son ben Jezebel inneen Ethbaal ree ny Zidonianee, as hie eh as hirveish eh Baal, as hug eh ooashley da. 32As hrog eh altar da Baal, ayns thie Vaal, v’eh er hroggal ayns Samaria. 33As ren Ahab soiaghey keyll [son jallooyn]; as ren Ahab brasnaghey yn Chiarn Jee Israel gys corree erskyn ooilley reeaghyn Israel va roish.

34Ayns y lhing echeysyn ren Hiel yn Beth-elite troggal Jericho: hoie eh yn undin echey er baase Abiram e chied vac, as hoie eh seose ny giattyn echey er baase e vac saa Segub, cordail rish goo’n Chiarn, loayr eh liorish Joshua mac Nun.