CAB. XIX

1As dinsh Ahab da Jezebel ooilley ny va Elijah er n’yannoo, as myrgeddin, kys v’eh er varroo ooilley ny phadeyryn lesh y chliwe. 2Eisht hug Jezebel chaghter gys Elijah, gra, Shen myr lhig da ny jeeghyn jannoo rhym’s, as ny smoo na shen, mannagh der-yms er dty vioys dy ve myr bioys unnane jeusyn, mysh y traa shoh mairagh. 3As tra honnick eh shen, hrog eh er, as chossyn eh roish son e vioys, as haink eh gys Beer-sheba, ta bentyn gys Judah, as daag eh e harvaant ayns shen.

4Agh hie eh-hene jurnah laa gys yn aasagh, as haink eh, as hoie eh sheese fo billey-juniper: as ren eh aghin er e hon hene dy voghe eh baase; as dooyrt eh, S’lioar shoh; nish, O Hiarn, gow ersooyl my vioys; son cha vel mish ny share na my ayraghyn. 5As myr v’eh ny lhie ny chadley fo billey-juniper, cur-my-ner, eisht ren ainle bentyn rish, as dooyrt eh, Irree as gow beaghey. 6As yeeagh eh, as cur-my-ner, va berreen broit er ny smarageyn, as saagh ushtey ec e chione. As ren eh gee as giu, as lhie eh sheese reesht. 7As haink ainle y Chiarn reesht y nah cheayrt, as venn eh rish, as dooyrt eh, Irree as ee; er-yn-oyr dy vel y jurnah erskyn dty niart. 8As dirree eh, as ren eh gee as giu, as ren eh troailt er niart yn veaghey shen da-eed laa as da-eed oie, gys Horeb cronk Yee.

9As haink eh gys ooig ayns shen, as shen y raad ghow eh aaght: as cur-my-ner, haink goo’n Chiarn huggey, as dooyrt eh rish, Cre t’ou dy yannoo ayns shoh, Elijah? 10As dooyrt eh, Ta mee er ve feer eadolagh son y Chiarn Jee jeh’n cheshaght-flaunyssagh: son ta cloan Israel er hreigeil dty chonaant, er lhieggal dty altaryn, as er varroo dty adeyryn lesh y chliwe: as ta mish, dy jarroo mish my-lomarcan, faagit er-mayrn; as t’ad shirrey my vioys, dy ghoaill eh ersooyl. 11As dooyrt eh, Tar magh, as shass er y chronk kiongoyrt rish y Chiarn. As cur-my-ner, hie’n Chiarn shaghey, as ren geay vooar cassee as lajer raipey ny sleityn, as scoltey ayns peeshyn ny creggyn kiongoyrt rish y Chiarn; agh cha row’n Chiarn ’sy gheay shen: as lurg yn gheay craa-hallooin; agh cha row yn Chiarn ’sy chraa-hallooin: 12As lurg yn craa-hallooin va aile; agh cha row’n Chiarn syn aile: as lurg yn aile shen coraa kiune, injil, meeley. 13As shen myr ve, tra cheayll Elijah shoh, dy hoïll eh e eddin ayns e chloagey, as hie eh magh, as hass eh ayns beeal yn ooig. As cur-my-ner, haink coraa huggey, dooyrt rish, Cre t’ayd’s dy yannoo ayns shoh, Elijah? 14As dooyrt eh, Ta mee er ve feer eadolagh son y Chiarn Jee jeh’n cheshaght-flaunyssagh; er-yn-oyr dy vel cloan Israel er hreigeil dty chonaant, er lhieggal dty altaryn, as er varroo dty adeyryn lesh y chliwe: as mish, dy jarroo mish my-lomarcan ta faagit er-mayrn, as t’ad shirrey my vioys, dy ghoaill eh ersooyl. 15As dooyrt yn Chiarn rish, Immee, chyndaa reesht er dty raad gys faasagh Damascus: as tra nee oo roshtyn, jean ooilaghey Hazael dy ve ree harrish Syria: 16As Jehu mac Nimshi nee uss y ooilaghey dy ve ree harrish Israel: as Elisha mac Shaphat, jeh Abel-meholah, nee oo y ooilaghey dy ve phadeyr ayns dty ynnyd. 17As hig eh gy-kione, eshyn ta scapail cliwe Hazael nee Jehu marroo; as eshyn ta scapail veih cliwe Jehu nee Elisha marroo. 18Ny-yeih, ta mee er vaagail er-mayrn dou hene shiaght thousaneyn ayns Israel, ooilley ny glioonyn nagh vel er chroymmey gys Baal, as dy chooilley veeal nagh vel er phaagey eh.

19Myr shoh jimmee eh roish veih shen, as hooar eh Elisha mac Shaphat, va traaue lesh daa chubbyl jeig dy ghew roish, as eh-hene marish yn ghaa-yeigoo: as hie Elijah shaghey, as cheau eh e chloagey er. 20As daag eh ny dew, as roie eh geiyrt er Elijah, as dooyrt eh, Lhig dou, ta mee guee ort, paagey my ayr as my voir, as eisht eiyr-ym ort’s. As dooyrt eh rish, Immee back reesht; agh cooinee cre ta mee er n’yannoo rhyt. 21As hie eh roish back voish, as ghow eh cubbyl jeh ny dew, as varr eh ad, as ren eh yn eill oc y aarlaghey lesh ny greinyn shesheree as hirveish eh er y pobble, as ren ad gee; eisht dirree eh. As deiyr eh er Elijah, as v’eh e hirveishagh.