CAB. II

1Nish hayrn laghyn David er-gerrey dy row eh dy gheddyn baase: as hug eh currym er Solomon e vac, gra, 2Ta mee goll raad ooilley’n seihll: bee uss dunnal er-y-fa shen, as jeeagh oo-hene dty ghooinney; 3As freill sarey yn Chiarn dty Yee, dy hooyl ayns e raaidyn, dy reayll e lattyssyn, as e annaghyn, as e vriwnyssyn, as e recortyssyn, myr te scruit ayns leigh Voses, dy vod oo bishaghey ayns ooilley ny t’ou dy yannoo, as cre theihll y raad t’ou chyndaa oo-hene. 4Dy vod y Chiarn e ghoo y yannoo mie, loayr eh my-mychione’s, gra, My ver dty chloan tastey da nyn raad, dy immeeaght kiongoyrt rhym’s ayns firrinys, lesh ooilley nyn gree as lesh ooilley nyn annym, cha bee oo laccal (as eshyn,) dooinney dy hoie er stoyl-reeoil Israel. 5Marish shen, ta fys ayd myrgeddin cre ren Joab mac Zeruiah rhym’s, as cre ren eh rish y daa chaptan sheshaght-caggee Israel, rish Abner mac Ner, as rish Amasa mac Jether ren eh y varroo, as gheayrt eh fuill y chaggey ayns shee, as hug eh fuill y chaggey er e chryss va mysh e veeghyn, as ayns e vraagyn v’er e chassyn. 6Jean, er-y-fa shen, cordail rish dty chreenaght hene, as ny lhig da’n kione lheeah echey goll sheese gys yn oaie ayns shee. 7Agh jeeagh kenjallys da mec Barzillai yn Gileadite, as lhig daue ve jeusyn ta gee ec dty voayrd: son shen myr haink ad hym tra hie mee er-chea kyndagh rish Absalom dty vraar. 8As cur-my-ner, t’ayd’s mayrt Shimei mac Gera, Benjamite jeh Bahurim, eh ren gweeaghyn dooys lesh mollaght dewil er y laa hie mee gys Mahanaim: agh haink eh sheese my whail gys Jordan, as loo mee da liorish y Chiarn, gra, Cha der-ym oo gy-baase lesh y chliwe. 9Nish er-y-fa shen ny cum uss eh gyn loght, son t’ou uss dooinney creeney, as fys ayd er cre lhisagh oo y yannoo rish; agh lhig da’n kione lheeah echeysyn goll sheese lesh fuill gys yn oaie. 10Myr shen ren David cadley marish e ayraghyn, as v’eh oanluckit ayns ard-valley Ghavid. 11As y traa ren David reill er Israel ve da-eed bleïn: shiaght bleeaney ren eh reill ayns Hebron, as three bleeaney jeig as feed ren eh reill ayns Jerusalem.

12Eisht hoie Solomon er stoyl-reeoil David e ayr; as va e reeriaght dy mooar er ny niartaghey. 13As haink Adonijah mac Haggith gys Bath-sheba moir Solomon, as dooyrt ee rish, Vel uss cheet dy sheeoil? As dooyrt eshyn, Dy sheeoil. 14Dooyrt eh marish shen, Ta red ennagh aym dy ghra rhyt. As dooyrt ish, Abbyr eh. 15As dooyrt eh, Ta fys ayd’s dy row yn reeriaght lhiam’s, as dy ren ooilley Israel soiaghey nyn eddinyn orrym, dy beign’s dy reill: ny-yeih ta’n reeriaght er ny hyndaa, as er jeet dy ve lesh my vraar; son ve leshyn veih’n Chiarn. 16As nish ta mee shirrey un aghin ort, ny jean m’y obbal. As dooyrt ee rish, Insh eh. 17As dooyrt eh, Loayr, ta mee guee ort, rish Solomon yn ree, (son cha n’obb eh oo,) dy der eh dooys Abishag yn Shunammite son ben. 18As dooyrt Bath-sheba, Mie dy liooar; loayr-ym er dty hon rish y ree.

19Hie Bath-sheba er-y-fa shen gys ree Solomon, dy loayrt rish son Adonijah. As dirree yn ree seose dy veeiteil ee, as yeeagh eh ammys jee, as hoie eh er e stoyl-reeoil, as doardee eh stoyl dy ve soit son moir y ree; as hoie ee er e laue yesh. 20Eisht dooyrt ee rish, Ta mee geearree un aghin fardalagh ort; guee-ym ort, ny jean m’y obbal. As dooyrt y ree, Shir eh, my voir, son cha jean-ym dty obbal. 21As dooyrt ish, Lhig da Abishag yn Shunammite ve er ny choyrt da Adonijah dty vraar son ben. 22As dreggyr ree Solomon, as dooyrt eh rish e voir, As kys te vel dy oo shirrey Abishag yn Shunammite da Adonijah? shir yn reeriaght da neesht; (son she eh my vraar shinney;) eer er y hon-syn, as er son Abiathar yn saggyrt, as er son Joab mac Zeruiah. 23Eisht loo ree Solomon liorish y Chiarn, gra, Dy jean Jee myr shen rhym’s, as ny smoo myrgeddin, mannagh vel Adonijah er loayrt yn fockle shoh noi e vioys hene. 24Nish er-y-fa shen, myr ta’n Chiarn bio, t’er m’y niartaghey, as er hoiagh mee er stoyl-reeoil David my ayr, as t’er n’yannoo my hie, myr yiall eh, bee Adonijah er ny choyrt gy-baase jiu. 25As hug ree Solomon fys lesh Benaiah mac Jehoiada, as huitt eh er dy dooar eh baase.

26As rish Abiathar yn saggyrt loayr yn ree, Cosne uss gys Anathoth, gys dty vagheryn hene; son t’ou uss toilchin baase: agh cha der-yms oo gy-baase ec y traa shoh, er-y-fa dy ren oo gymmyrkey arg y Chiarn Jee kiongoyrt rish David my ayr, as er-yn-oyr dy vel oo er ve seaghnit ayns ooilley seaghyn my ayrey. 27Myr shoh ren Solomon jiooldey rish Abiathar nagh beagh eh saggyrt y Chiarn; dy voddagh eh cooilleeney goo’n Chiarn, loayr eh mychione thie Eli ayns Shiloh.

28Eisht haink skeeal gys Joab: (son va Joab er hassoo lesh Adonijah, ga nagh ghow eh paart lesh Absalom:) as hie Joab er-chea gys cabbane-agglish yn Chiarn, as ghow eh greme er eairkyn yn altar. 29As ve inshit da ree Solomon dy row Joab er roie er-chea gys cabbane-agglish y Chiarn; as cur-my-ner, t’eh liorish yn altar. Eisht hug Solomon Benaiah mac Jehoiada magh, gra, Immee, as tuitt er. 30As haink Benaiah gys cabbane y Chiarn, as dooyrt eh rish, Myr shoh ta’n ree dy ghra, Tar magh. As dreggyr eh, Cha jean, agh yioym baase ayns shoh. As hug Benaiah lesh fys back gys y ree, gra, Myr shoh loayr Joab, as myr shoh dreggyr eh mee. 31As dooyrt y ree rish, Jean uss myr t’eh er ghra, as tuitt er, as jean eh y oanluckey; dy vod oo goaill ersooyl voym’s, as veih thie my ayrey, yn uill gyn-loght ren Joab deayrtey. 32As nee’n Chiarn chyndaa yn uill echey er e chione hene, ren tuittym er daa ghooinney ny s’ynrick as ny share na eh-hene, as varr eh ad lesh y chliwe, gyn-yss da my ayr David, ta shen dy ghra, Abner mac Ner, captan sheshaght-caggee Israel, as Amasa mac Jether, captan sheshaght-caggee Yudah. 33Nee’n uill oc, er-y-fa shen, chyndaa er kione Yoab, as er king e luight son dy bragh: agh ec David, as e luight, as e hie, as e stoyl-reeoil, vees shee er son dy bragh veih’n Chiarn. 34Myr shen hie Benaiah mac Jehoiada seose, as huitt eh er, as varr eh eh; as v’eh oanluckit ayns e hie hene ’syn aasagh.

35As hug y ree Benaiah mac Jehoiada ny ynnyd harrish yn armee; as Zadok yn saggyrt hug y ree ayns ynnyd Abiathar.

36As hug y ree fys, as deïe eh er Shimei, as dooyrt eh rish, Trog dhyt hene thie ayns Jerusalem, as jean cummal ayn, as ny gow magh boayl erbee veih shen. 37Son shen myr vees eh, er y laa dy jeu magh, as goll harrish awin Kidron, bee fys ayd son firrinys dy bee oo ayns shickyrys er dty choyrt gy-baase: bee dty uill er dty chione hene. 38As dooyrt Shimei rish y ree, Ta’n raa mie: myr ta my hiarn yn ree er ghra, shen myr nee dty harvaant. As ren Shimei cummal ayns Jerusalem ymmodee laghyn. 39As haink eh gy-kione lurg three bleeaney dy hraa, dy ren jees jeh sharvaantyn Shimei roie ersooyl gys Achish mac Maachah, ree Ghath: as dinsh ad da Shimei, gra, Cur-my-ner, ta dty harvaantyn ayns Gath. 40As dirree Shimei, as yeelt eh e assyl, as varkee eh gys Gath, gys Achish, dy vriaght son e harvaantyn: as hie Shimei roish, as hug eh lesh e harvaantyn veih Gath. 41As ve inshit da Solomon dy row Shimei er gholl veih Jerusalem gys Gath, as er jeet back reesht. 42As hug y ree fys, as deïe eh er Shimei, as dooyrt eh rish, Nagh dug mee ort loo liorish y Chiarn, as breearrey dhyt, gra, Toig son shickyrys, er y laa hed oo magh, as oo dy hooyl mygeayrt boayl erbee, dy bee oo er dty choyrt gy-baase as dooyrt uss rhym’s, S’mie ta’n fockle ta mee er chlashtyn. 43Cre’n-fa eisht nagh dreill oo breearrey yn Chiarn, as y sarey hug mish myr currym ort. 44Dooyrt y ree marish shen rish Shimei, Ta fys ayd er ooilley’n olkys ta follit dty chree hene, ren oo rish David my ayr: shen-y-fa nee’n Chiarn chyndaa dty olkys er dty chione hene. 45As bee ree Solomon er ny vannaghey, as bee stoyl-reeoil Ghavid er ny hickyraghey kiongoyrt rish y Chiarn son dy bragh. 46Myr shen ren y ree sarey y choyrt da Benaiah mac Jehoiada; hie magh, as huitt er dy dooar eh baase. As va’n reeriaght er ny niartaghey ayns laue Solomon.