CAB. XX

1As haggil Ben-hadad ree Syria ooilley e heshaght-chaggee cooidjagh: as va daa ree jeig as feed mârish, as cabbil, as fainee: as hie eh seose, as ren eh cruinnaghey stiagh Samaria, as caggey n’oï. 2As hug eh chaghteryn gys Ahab ree Israel gys yn ard-valley, as dooyrt eh rish, Shoh myr ta Ben-hadad gra, 3Lhiam’s ta dty argid, as dty airh, dty vraane myrgeddin, as dty chloan, eer yn eallagh s’aalin jeu, t’ad lhiam’s. 4As dreggyr ree Israel as dooyrt eh, My Hiarn, O ree, cordail rish dty ghoo, lhiat’s ta mee-hene, as ooilley ny t’aym. 5As haink ny chaghteryn reesht, as dooyrt ad, Shoh myr ta Ben-hadad loayrt, gra, Ga dy dug mish yn fys shoh hood’s, gra, Dty argid, as dty airh, as dty vraane, as dty chloan, t’ou uss dy livrey hym’s; 6Foast, ver-ym my harvaantyn hood mysh y traa shoh mairagh, as nee ad dty hie y ronsaghey, as thieyn dty harvaantyn; as hig eh gy-kione, cre-erbee smoo ta dty hooillyn soit er, dy gow ad eh ayns nyn laue, as dy der ad lhieu eh. 7Eisht deïe ree Israel er ooilley shanstyr y cheer, as dooyrt eh, Cur-jee tastey, ta mee guee erriu, as jeeagh-jee kys ta’n dooinney shoh shirrey doostey olk: son hug eh fys hym son my vraane, as son my chloan, as son my argid, as son my airh, as cha dob mee ad da. 8As dooyrt y slane shanstyr, as ooilley’n pobble rish, Ny eaisht rish, chamoo cur geill da. 9Shen-y-fa dooyrt eh rish chaghteryn Ben-hadad, Insh-jee da my hiarn yn ree, Ooilley ny hug oo fys er y hon gys dty harvaant ec y toshiaght, nee’m y yannoo: agh shoh cha jig eh lhiam dy yannoo. As jimmee ny chaghteryn rhymboo, as hug ad lhieu huggey yn ansoor shoh. 10As hug Ben-hadad fys huggey, as dooyrt eh, Myr shen dy jean ny jeeghyn rhym’s, as ny smoo neesht, my nee joan Samaria shirveish son lane duirn da ooilley’n pobble ta ec my voynyn. 11As dreggyr ree Israel as dooyrt eh, Insh-jee da, Ny lhig dasyn ta cur mysh e eilley-caggee boggyssagh, myr eshyn ta cur jeh eh. 12As haink eh gy-kione, tra cheayll Ben-hadad yn chaghteraght shoh, (myr v’eh giu, eshyn as ny reeaghyn, ayns ny cabbaneyn reeoil,) dy dooyrt eh rish e harvaantyn, Soie-jee shiu-hene ayns order-caggee: as hoie ad ad-hene ayns order-caggee noi’n ard-valley.

13As cur-my-ner, haink phadeyr gys Ahab ree Israel, gra, Shoh myr ta’n Chiarn dy ghra, Vel uss er vakin ooilley’n earroo mooar shoh dy leih? cur-my-ner, livrey-ym ad jiu ayns dty laue; as bee fys ayd dy nee mish y Chiarn. 14As dooyrt Ahab, Quoi liorish? As dooyrt eshyn, Shoh myr ta’n Chiarn dy ghra, Dy jarroo liorish deiney aegey princeyn y rheam. Eisht dooyrt eh, Quoi nee goardrail yn cheshaght-chaggee? As dreggyr eh, Oo-hene. 15Eisht ren eh musteral ny deiney aegey, princeyn y rheam, as v’ad daa cheead as ghaa-yeig as feed: as nyn lurg, vuster eh ooilley’n pobble, eer ooilley cloan Israel, as v’ad shiaght thousaneyn. 16As hie ad magh er y vun-laa: agh va Ben-hadad giu eh-hene er-meshtey ayns ny cabbaneyn reeoil, eh-hene as ny reeaghyn, yn daa ree jeig as feed, ny fir-choonee echey. 17As hie ny deiney aegey princeyn y rheam magh hoshiaght; as hug Ben-hadad fys magh, as dinsh ad da, gra, Ta deiney er jeet magh veih Samaria. 18As dooyrt eh, Edyr ad y ve er jeet magh son shee, gow-jee ad bio; ny edyr ad y ve er jeet magh son caggey, gow-jee ad bio. 19Myr shoh haink ny deiney aegey princeyn y rheam magh ass yn ard-valley, marish y cheshaght-chaggee deiyr orroo. 20As varr dagh dooinney e ghooinney: as roie ny Syrianee roue; as deiyr Israel orroo: as chossyn Ben-hadad ree Syria roish er cabbyl marish dy markee. 21As hie ree Israel magh, as woaill eh ny cabbil as ny fainee, as stroie eh ny Syrianee lesh cragh trome.

22As haink y phadeyr gys ree Israel, as dooyrt eh rish, Immee as niartee oo-hene, as bee er dty arrey, as jeeagh cre t’ou dy yannoo: son ec imbagh ny bleeaney hig ree Syria seose dt’oï. 23As dooyrt offishearyn ree Syria rish, Ta ny jeeghyn ocsyn jeeghyn sleitagh, shen-y-fa v’ad ny s’troshey na shinyn: agh lhig dooin caggey nyn ’oï sy cheer-rea, as bee mayd son shickyrys ny s’troshey na adsyn. 24As jean uss shoh: Scugh ny reeaghyn, dagh dooinney veih nyn oik ’sy chaggey, as cur captanyn ’syn ynnyd oc: 25As jean magh sheshaght-caggee elley, corrym rish yn cheshaght-chaggee t’ou er choayl, cabbyl son cabbyl, as fainagh son fainagh: as nee mayd caggey nyn ’oï ’sy cheer-rea, as son shickyrys bee mayd ny s’troshey na adsyn. As ghow eh yn choyrle oc, as shen myr ren eh. 26As haink eh gy-kione, ec imbagh ny bleeaney, dy ren Ben-hadad musteral ny Syrianee, as hie eh seose gys Aphek, dy chaggey noi Israel. 27As va cloan Israel musterit, as ooilley arryltagh son y chaggey hie ad magh nyn ’oï: as ren cloan Israel campal kiongoyrt roo, goll-rish daa hioltane veggey dy vannanyn; agh lhieen ny Syrianee yn cheer.

28As haink dooinney dy Yee, as loayr eh rish ree Israel, as dooyrt eh, Shoh myr ta’n Chiarn dy ghra, Er-yn-oyr dy vel ny Syrianee er ghra, Dy vel y Chiarn Jee ny sleityn, agh cha vel eh Jee ny coanyn; shen-y-fa neem’s livrey ooilley yn earroo mooar shoh dy leih ayns dty laue, as bee fys eu dy nee mish y Chiarn. 29As hass ad ayns order-caggee, yn derrey yeh noi’n jeh elley, shiaght laa: as shen myr ve er y chiaghtoo laa, dy jagh ad laue ry-cheilley: as varr cloan Israel jeh ny Syrianee keead thousane coshee ’syn un laa. 30Agh chossyn yn chooid elley jeu gys Aphek, yn ard-valley; as ayns shen huitt voalley er shiaght thousaneyn as feed jeh ny deiney va er-mayrn. As chossyn Ben-hadad roish, as haink eh gys yn ard-valley gys y chiamyr s’follit.

31As dooyrt e harvaantyn rish, Cur-my-ner nish, ta shin er chlashtyn dy vel reeaghyn thie Israel reeaghyn myghinagh: lhig dooin, ta mee guee ort, cur aanrit-sack er nyn meeghyn, as teddyn mysh nyn mwannal, as goll magh gys ree Israel; foddee, dy saue-ee eh dty vioys. 32Myr shoh chryss ad aanrit-sack mysh nyn meeghyn, as teddyn mysh nyn mwannal, as haink ad gys ree Israel, as dooyrt ad, Ta dty harvaant Ben-hadad gra, Ta mee guee ort, lhig my vioys lhiam. As dooyrt eh, Vel eh foast bio? she my vraar eh. 33Nish va ny chaghteryn feer tastagh darragh fockle erbee voish, as ghow ad dy leah greme er yn ockle; as dooyrt ad, Dty vraar Ben-hadad. Eisht dooyrt eh, Immee-jee, cur-jee lhieu eh. Eisht haink Ben-hadad magh huggey; as ghow eh eh seose mârish ’syn ainagh. 34As dooyrt Ben-hadad rish, Ny ard-valjyn ghow my ayr’s veih’n ayr ayd’s livrey-yms seose hood reesht; as nee oo straidyn dhyt hene ayns Damascus, myr ren my ayr’s ayns Samaria. Eisht dooyrt Ahab, Er y chonaant shoh lhig-ym y raad dhyt. Myr shoh ren eh conaant rish, as lhig eh yn raad da.

35As loayr dooinney dy row jeh mec ny phadeyryn rish e naboo ayns goo’n Chiarn, Bwoaill mee, ta mee guee ort. As dob y dooinney dy woalley eh. 36Eisht dooyrt eh rish, Er-yn-oyr nagh vel oo er chur biallys da coraa’n Chiarn, cur-my-ner, cha leah’s aagys oo mish, nee lion oo y varroo. As cha leah’s daag eh eh, haink lion ny raad, as varr eh eh. 37Eisht hooar eh dooinney elley, as dooyrt eh, Bwoaill mee, ta mee guee ort. As woaill y dooinney eh, myr shen liorish bwoalley eh dy hayrn eh fuill er. 38Myr shoh jimmee yn phadeyr roish, as ren eh farkiagh son y ree er y raad, as ren eh eh-hene gyn-yss da liorish coodagh e eddin. 39As myr hie’n ree shaghey, deïe eh da’n ree: as dooyrt eh, Hie dty harvaant magh ayns mean y chaggey, as cur-my-ner, hyndaa dooinney dy lhiattee, as hug eh lesh dooinney hym, as dooyrt eh, Gow kiarail jeh’n dooinney shoh: my lhiggys oo yn raad da, eisht bee’n vioys ayd’s son y vioys echeysyn, er-nonney eeckys oo talent dy argid. 40As myr va dty harvaant preishal mysh obbyr elley, chossyn eh roish. As dooyrt ree Israel rish, Shen myr vees dty vriwnys; t’ou hene er reaghey. 41As ren eh siyr, as ghow eh yn coodagh jeh e eddin: as ghow ree Israel baght jeh, dy row eh fer jeh ny phadeyryn. 42As dooyrt eh rish, Shoh myr ta’n Chiarn dy ghra, Er-yn-oyr dy vel oo er lhiggey ass dty laue dooinney ren mee kiarail son slane toyrt-mow, shen-y-fa bee yn vioys ayd’s son y vioys echeysyn, as dty phobble son y pobble echeysyn. 43As hie ree Israel roish gys e hie trimshagh as jymmoosagh, as haink eh gys Samaria.