CAB. XXII

1As v’ad three bleeaney fegooish caggey eddyr Syria as Israel. 2As haink eh gy-kione, er y trass vleïn, dy daink Jehoshaphat ree Yudah neose gys ree Israel. 3(As dooyrt ree Israel rish e harvaantyn, Vel fys euish dy nee lhianyn ta Ramoth t’ayns Gilead, as ta shin nyn daaue, chamoo ta shin dy ghoaill eh ass laue ree Syria?) 4As dooyrt eh rish Jehoshaphat, Jed uss mârym’s gys y chaggey noi Ramoth-gilead? As dooyrt Jehoshaphat rish ree Israel, Ta mish myr t’ou uss, my phobble myr dty phobble’s, my chabbil myr ny cabbil ayd’s. 5As dooyrt Jehoshaphat rish ree Israel, Jean briaght, ta mee guee ort, ec goo’n Chiarn jiu. 6Eisht ren ree Israel sumney ny phadeyryn cooidjagh, mygeayrt kiare cheead dooinney, as dooyrt eh roo, Jem seose dy chaggey noi Ramoth-gilead, ny jean-ym lhiggey shaghey? As dooyrt ad, Immee seose; son nee’n Chiarn livrey eh gys laue yn ree. 7As dooyrt Jehoshaphat, Nagh vel phadeyr erbee elley jeh’n Chiarn ayns shoh, dy vod mayd briaght jehsyn? 8As dooyrt ree Israel rish Jehoshaphat, Ta ayn foast un dooinney, (Micaiah mac Imlah,) liorishyn foddee mayd briaght jeh’n Chiarn; agh ta dwoaie aym er; son cha vel eh dy bragh phadeyrys mie my-mychione’s, agh olk. As dooyrt Jehoshaphat, Ny lhig da’n ree shen y ghra. 9Eisht deïe ree Israel er offishear huggey, as dooyrt eh rish, Lhiat ayns shoh dy tappee Micaiah mac Imlah. 10As hoie ree Israel, as Jehoshaphat ree Yudah, dagh unnane er e stoyl-reeoil, ayns nyn goamraghyn reeoil, ’sy chooyrt foshlit ec giat Samaria: as ren ooilley ny phadeyryn phadeyrys kiongoyrt roo. 11As ren Zedekiah mac Chenaanah eairkyn yiarn: as dooyrt eh, Shoh myr ta’n Chiarn dy ghra, Lhieu shoh nee oo puttey ny Syrianee, derrey t’ou er stroie ad. 12As ren ooilley ny phadeyryn phadeyrys er yn aght cheddin, gra, Immee seose noi Ramoth-gilead, as aïgh mie dy row lhiat: son nee’n Chiarn livrey eh gys laue yn ree. 13As loayr y chaghter va er gholl dy eamagh er Micaiah rish, gra, Cur-my-ner nish, ta goan ny phadeyryn fockley magh mie da’n ree lesh un choraa: lhig da dty ghoan’s, ta mee guee ort, ve cordail rish goan fer jeusyn, as loayr uss shen ny ta mie. 14As dooyrt Micaiah, Myr ta’n Chiarn bio, cre-erbee jir y Chiarn rhym’s, shen neem’s loayrt.

15Eisht haink eh gys y ree, as dooyrt y ree rish, Vicaiah, jem mayd seose noi Ramoth-gilead dy chaggey, ny lhig mayd shaghey? As dreggyr eh, Immee, as hig y varriaght lhiat: son nee’n Chiarn shen y livrey gys laue yn ree. 16As dooyrt y ree rish, Cre cha mennick shegin dou currym y choyrt ort [er bree dty loo,] gyn oo dy insh dou veg agh shen ny ta firrinagh ayns ennym y Chiarn. 17As dooyrt eh, Honnick mee ooilley Israel skeaylt er ny sleityn, myr kirree fegooish bochill: as dooyrt y Chiarn, Cha vel mainshtyr oc shoh; lhig da dy chooilley ghooinney jeu chyndaa gys e hie ayns shee. 18As dooyrt ree Israel rish Jehoshaphat, Nagh dinsh mee dhyt, nagh jinnagh eh shoh phadeyrys mie erbee my-mychione’s, agh olk? 19As dooyrt eh, Eaisht uss, er-y-fa shen, rish goo’n Chiarn: Honnick mee yn Chiarn ny hoie er e stoyl-reeoil, as ooilley sheshaght-flaunyss ny hassoo liorish, er e laue yesh as er e laue hoshtal. 20As dooyrt y Chiarn, Quoi nee Ahab y chleayney, dy gholl seose as dy huittym ec Ramoth-gilead? As loayr fer myr shoh, as fer er aght elley. 21As haink spyrryd magh, as hass eh kiongoyrt rish y Chiarn, as dooyrt eh, Neem’s eh y chleayney. 22As dooyrt y Chiarn rish, Cre’n aght? As dooyrt eh, Hem’s magh, as bee’m my spyrryd breagagh ayns beeal ooilley e adeyryn. As dooyrt eh, Nee oo eh y choyrlaghey, as hig eh lhiat myrgeddin: immee, as jean myr shen. 23Nish er-y-fa shen, cur-my-ner, ta’n Chiarn er choyrt spyrryd breagagh ayns beeal ooilley ad shoh dty adeyryn, as ta’n Chiarn er n’ockley magh olk my-dty-chione. 24Agh hie Zedekiah mac Chenaanah er-gerrey, as woaill eh Micaiah er y lieckan, as dooyrt eh, Cre’n raad ghow Spyrryd y Chiarn voym’s dy loayrt rhyt’s? 25As dooyrt Micaiah, Cur-my-ner, nee uss fakin er y laa shen, tra hed oo stiagh veih shamyr gys shamyr dy ollaghey oo-hene. 26As dooyrt ree Israel, Gow Micaiah, as cur lhiat back eh gys Amon kiannoort yn ard-valley, as gys Joash mac y ree. 27As abbyr roo, Shoh myr ta’n ree dy ghra, Cur-jee yn fer shoh ayns pryssoon, as jean-jee eh y veaghey lesh arran dy heaghyn, as lesh ushtey dy heaghyn, derrey hig-yms reesht ayns shee. 28As dooyrt Micaiah, My hig uss dy bragh back ayns shee, cha vel y Chiarn er loayrt liorym’s. As dooyrt eh, Eaisht-jee, O phobble, dy chooilley unnane eu. 29Myr shoh hie ree Israel, as Jehoshaphat ree Yudah, seose gys Ramoth-gilead. 30As dooyrt ree Israel rish Jehoshaphat, Ver-yms mee-hene ayns cummey elley, as hem stiagh ’sy chaggey; agh cur uss ort dty choamraghyn reeoil. As hug ree Israel cummey elley er hene, as hie eh gys y chaggey. 31Agh hug ree Syria sarey da e ghaa chaptan jeig as feed, va reill harrish ny fainee, gra, Ny jean-jee caggey rish beg ny mooar, agh ynrycan rish ree Israel. 32As haink eh gy-kione, tra honnick captanyn ny fainee Jehoshaphat, dy dooyrt ad, Son shickyrys, she ree Israel t’ayn. As hyndaa ad dy lhiattee dy chaggey n’oï: as deïe Jehoshaphat magh. 33As haink eh gy-kione, tra chronnee captanyn ny fainee nagh nee ree Israel v’ayn, dy hyndaa ad back veih geiyrt er. 34As ren dooinney dy row tayrn bow er ventyr, as woaill eh ree Israel eddyr juntyn yn eilley-caggee: shen-y-fa dooyrt eh rish immanagh yn ainagh, Chyndaa dty laue, as cur lhiat mee magh ass y chaggey; son ta mee guint. 35As va’n caggey feer chion er y laa shen: as ren y ree cummal rish ayns e ainagh noi ny Syrianee, as hooar eh baase ’syn astyr: as roie’n uill ass y lhott ayns mean yn ainagh. 36As hie magh eam trooid y magher-caggee mysh lhie ny greiney, gra, Dy chooilley ghooinney gys e ard-valley hene, as dy chooilley ghooinney gys e heer hene.

37Myr shoh hooar y ree baase; as hug ad lhieu eh gys Samaria, as doanluck ad yn ree ayns Samaria. 38As ren fer niee yn fainagh ayns poyll Samaria, as ren ny moddee sliee seose yn uill, as niee ad yn eilley-caggee echey, cordail rish goo’n Chiarn v’eh er loayrt. 39Nish yn chooid elley jeh obbraghyn Ahah, as ooilley ny ren eh, as yn thie ivory v’eh er n’yannoo, as ooilley ny ard-valjyn v’eh er hroggal, nagh vel ad scruit ayns lioar recortyssyn reeaghyn Israel? 40Myr shoh ren Ahab cadley marish e ayraghyn, as ren Ahaziah e vac reill ayns e ynnyd.

41As ghow Jehoshaphat mac Asa toshiaght dy reill harrish Judah, ayns y chiarroo vleïn jeh Ahab ree Israel. 42Va Jehoshaphat queig bleeaney jeig as feed dy eash tra ren eh toshiaght dy reill; as ren eh reill queig bleeaney as feed ayns Jerusalem. As va ennym e voir Azubah inneen Shilhi. 43As huill eh ayns ooilley raaidyn Asa e ayr; cha hyndaa eh dy lhiattee veih, jannoo shen ny va cairagh ayns shilley’n Chiarn: ny-yeih cha row ny ard-ynnydyn er nyn goyrt sheese; son ren y pobble chebbal as lostey incense foast ayns ny ard-ynnydyn. 44As ren Jehoshaphat shee rish ree Israel. 45Nish yn chooid elley jeh obbraghyn Jehoshaphat, as e niart ren eh soilshaghey, as kys ren eh caggey, nagh vel ad er nyn scrieu ayns lioar recortyssyn reeaghyn Yudah? 46As fooilliagh ny Sodomiteyn va er-mayrn rish lhing e ayr Asa, deiyr eh ass y cheer. 47Cha row ree erbee ayns Edom ec y traa shen: va deputy ny ree. 48Va lhongyn ec Jehoshaphat veih Tharshish dy gholl gys Ophir son airh; agh cha jagh ad: son va ny lhongyn brisht ec Ezion-geber. 49Eisht dooyrt Ahaziah mac Ahab rish Jehoshaphat, Lhig da my harvaantyn goll marish ny sharvaantyn ayd’s er ny lhongyn: agh cha jinnagh Jehoshaphat shen.

50As ren Jehoshaphat cadley marish e ayraghyn, as v’eh oanluckit marish e ayraghyn ayns ard-valley Ghavid e ayr: as ren Jehoram e vac reill ayns e ynnyd.

51Ren Ahaziah mac Ahab toshiaght dy reill harrish Israel ayns Samaria yn chiaghtoo vleïn jeig jeh Jehoshaphat ree Yudah, as ren eh reill daa vleïn harrish Israel. 52As ren eh dy olk ayns shilley’n Chiarn, as huill eh ayns raad e ayr, as ayns raad e voir, as ayns raad Yeroboam mac Nebat, eh hayrn Israel fo peccah. 53Son ren eh Baal y hirveish, as eh y ooashlaghey, as vrasnee eh jymmoose yn Chiarn Jee Israel, cordail rish ooilley ny va e ayr er n’yannoo.