CAB. IV

1Myr shen va ree Solomon ny ree er ooilley Israel. 2As ad shoh va ny princeyn va fo; Azariah, mac Zadok yn saggyrt; 3Elihoreph as Ahiah, mec Shisha, scrudeyryn; Jehoshaphat mac Ahilud, yn recortysser. 4As va Benaiah mac Jehoiada harrish y cheshaght-chaggee; as Zadok as Abiathar va ny saggyrtyn. 5As va Azariah mac Nathan harrish ny fir-oik; as Zabud mac Nathan va’n ard fer-oik, as carrey’n ree; 6As va Ahishar harrish y lught-thie; as Adoniram mac Abda harrish ny keeshyn.

7As v’ec Solomon daa fir-oik jeig harrish ooilley Israel, va goaill kiarail son beaghey da’n ree as lught e hie; dagh dooinney mee ’sy vleïn dy ghoaill kiarail. 8As shoh va ny enmyn oc: Mac Hur, ayns cronk Ephraim. 9Mac Dekar, ayns Makaz, as ayns Shaalbim, as Beth-shemesh, as Elon-beth-hanan. 10Mac Hesed, ayns Aruboth; fosyn va Sochoh, as ooilley thalloo Hepher. 11Mac Abinadab, ayns ooilley cheer Dor; echey va Taphath inneen Solomon son ben. 12Baana, mac Ahilud; fosyn va Taanach as Megiddo, as ooilley Beth-shean, ta liorish Zartanah liorish Jezreel, veih Beth-shean gys Abel-meholah, eer gys yn ynnyd t’er cheu elley jeh Jokneam. 13Mac Geber ayns Ramoth-gilead; fosyn va baljyn Jair mac Vanasseh, t’ayns Gilead: fosyn va myrgeddin cheer Argob t’ayns Bashan, three-feed dy ard-valjyn mooarey lesh voallaghyn, as boltyn prashey. 14Va Mahanaim fo Ahinadab mac Iddo. 15Va Ahimaaz ayns Naphtali; ghow eh myrgeddin Basmath inneen Solomon son ben. 16Va Baanah mac Hushai ayns Asher as ayns Aloth. 17Jehoshaphat mac Paruah ayns Issachar. 18Shimei mac Elah ayns Benjamin. 19Va Geber mac Uri ayns cheer Ghilead, ayns cheer Sihon ree ny Amoriteyn, as Og ree Vashan; as eh va’n ynrycan fir-oik va ’sy cheer.

20Va Judah as Israel ymmodee, myr genniagh ny marrey ayns earroo, gee as giu, as jannoo gien mie. 21As ren Solomon reill harrish dy chooilley reeriaght veih’n 4:21 Euphrates.awin gys cheer ny Philistinee, as gys cagliagh Egypt: hug ad lhieu giootyn, as hirveish ad Solomon ooilley laghyn e vea.

22As va beaghey Solomon son un laa jeih towseyn as feed dy flooyr veein, as three-feed towse dy veinn, 23Jeih muirht, as feed dow ass nyn aber, keead keyrrey, marish feeaih fyrryn as bwoirryn jeh dy chooilley horch, as eeanlee roauyrey. 24Son va reiltys echey harrish ooilley’n cheer er cheu shoh jeh’n awin, veih Tiphsah eer gys Azzah, harrish ooilley ny reeaghyn cheu shoh jeh’n awin: as va shee echey er dy chooilley heu mygeayrt-y-mysh. 25As ren Judah as Israel baghey dy sauchey, dy chooilley ghooinney fo e villey-feeyney as fo e villey-figgagh hene, veih Dan eer gys Beer-sheba, rish slane lhing Solomon.

26As va da-eed thousane manjoor cour cabbil ec Solomon son e ainee, as daa housane jeig dy varkee. 27As chiare ny fir-oik shoh beaghey cour ree Solomon, as cour ooilley ny haink gys boayrd ree Solomon, dagh dooinney ’sy vee echey: cha row ad laccal nhee erbee. 28Oarn myrgeddin as coonlagh son ny cabbil as ny dromedareeyn hug ad lhieu gys yn ynnyd raad va ny fir-oik, dagh dooinney cordail rish e churrym.

29As hug Jee da Solomon creenaght as tushtey erskyn towse, as feoiltys cree, eer myr y gheinnagh ta rish oirr ny marrey. 30As va creenaght Solomon erskyn creenaght ooilley cloan y cheer har, as ooilley creenaght Egypt. 31Son v’eh ny s’creeney na dooinney erbee; na Ethan yn Ezrahite, as Heman, as Chalcol, as Darda, mec Mahol: as hie goo jeh trooid ooilley ny cheeraghyn mygeayrt. 32As loayr eh three thousaneyn dy raaghyn creeney: as va e arraneyn thousane as queig. 33As hug eh coontey jeh biljyn, veih’n billey-cedar t’ayns Lebanon eer gys y hyssop ta gaase ass y voall: hug eh coontey myrgeddin jeh beiyn, as jeh eeanlee, as jeh ny beishteigyn snauee, as jeh eeastyn. 34As haink sleih veih dy chooilley ard dy eaishtagh rish creenaght Solomon, veih ooilley reeaghyn y thallooin, va er chlashtyn jeh e chreenaght.