CAB. V

1As hug Hiram ree Tyre e harvaantyn er chaghteraght gys Solomon; (son v’eh er chlashtyn dy row ad er ooilaghey eh ny ree ayns ynnyd e ayr;) son va Hiram rieau ny charrey da David. 2As hug Solomon fys gys Hiram, gra, 3Ta fys ayd kys nagh voddagh David my ayr thie y hroggal gys ennym y Chiarn e Yee, kyndagh rish ny caggaghyn va mygeayrt-y-mysh er dagh cheu, derrey hug y Chiarn ad fo bun e choshey. 4As nish ta’n Chiarn my Yee er choyrt fea dooys er dagh cheu, myr shen nagh vel edyr noid ny olk ayns my raad. 5As cur-my-ner, ta mee kiarail thie y hroggal gys ennym y Chiarn my Yee, myr loayr y Chiarn rish David my ayr, gra, Nee dty vac neem’s y hoiaghey er dty stoyl-reeoil ayns dty ynnyd thie y hroggal gys my ennym. 6Shen-y-fa nish cur uss sarey dy jean ad giarey sheese dooys biljyn-cedar ayns Lebanon; as bee my harvaantyn marish dty harvaantyn’s: as ver-ym faill dhyt son dty harvaantyn, cordail rish dty raa hene: son ta fys ayd nagh vel veg ny mast’ ainyn ta schleioil fuygh y yiarey myr ny Sidonianee.

7As haink eh gy-kione, tra cheayll Hiram goan Solomon, dy ghow eh lane boggey, as dooyrt eh, Bannit dy row’n Chiarn er y laa shoh, t’er choyrt da David mac creeney harrish yn pobble mooar shoh. 8As hug Hiram fys gys Solomon, gra, Ta mee er n’ghoaill gys my smooinaghtyn ny reddyn hug uss fys hym er nyn son: as cooilleen-ym ooilley dty yeearree son y fuygh-cedar, as son y fuygh-juys. 9Ver my harvaantyn lhieu ad neose veih Lebanon gys y cheayn; as ver-ym lhiam ad er y cheayn ayns raftyn gys y boayl nee oo pointeil dou, as ver-ym ad er thalloo ayns shen, as nee uss ad y ghoaill: as nee oo yn yeearree aym’s y chooilleeney liorish coyrt beaghey da my vooinjer. 10Myr shen hug Hiram da Solomon biljyn-cedar as biljyn-juys, cordail rish ooilley e yeearree. 11As hug Solomon da Hiram feed thousane towse dy churnagh son beaghey da e vooinjer, as feed thousane towse dy ooil ghlen: myr shoh hirveish Solomon Hiram dagh bleïn. 12As hug y Chiarn creenaght da Solomon, myr yiall eh da: as va shee eddyr Hiram as Solomon; as ren adsyn ny-neesht conaant ry-cheilley.

13As hrog ree Solomon sheshaght reiht ass ooilley Israel; as va’n cheshaght jeih thousaneyn as feed dy gheiney. 14As hug eh ad gys Lebanon, jeih thousaneyn ’sy vee dagh keayrt: v’ad mee ayns Lebanon, as daa vee ec y thie: as va Adoniram soit harrish y cheshaght. 15As va ec Solomon three-feed as jeih thousaneyn va gymmyrkey erraghyn, as kiare-feed thousane ry-hoi giarey fuygh ayns ny sleityn: 16Cheu-mooie jeh ard-oaseiryn Solomon va harrish yn obbyr, three thousaneyn as three cheead, va reill harrish yn pobble va laboragh ’syn obbyr. 17As hug y ree sarey, as hug ad lhieu claghyn mooarey, claghyn aalin costal, as claghyn cummit, dy hoiagh undin y thie. 18As ren masoonee Solomon as masoonee Hiram ad y chleiy, mâroosyn va cummey ny claghyn: myr shoh hooar ad aarloo fuygh as claghyn dy hroggal y thie.