CAB. VI

1As haink eh gy-kione, er y chiarroo cheead as kiare-feed bleïn lurg da cloan Israel v’er jeet ass thalloo Egypt, er y chiarroo vleïn jeh reill Solomon harrish Israel, ayns y vee Zif, ta’n nah vee, ghow eh toshiaght dy hroggal thie’n Chiarn. 2As yn thie hrog ree Solomon da’n Chiarn, va’n lhiurid echey three-feed cubit, as yn lheead echey feed cubit, as yn yrjid echey jeih cubityn as feed. 3As va’n porch roish chiamble y thie feed cubit er lhiurid, cordail rish lheead y thie: as jeih cubityn va’n lheead echey er eddin y thie. 4As er y thie ren eh uinniagyn cooie son soilshey.

5As noi voalley’n thie hrog eh shamyryn ooilley mygeayrt, rish voallaghyn y thie mygeayrt, chammah jeh’n chiamble as jeh’n ynnyd smoo casherick: as ren eh shamyryn ooilley mygeayrt. 6Va’n chiamyr s’inshley queig cubityn er lheead, as va’n chiamyr meanagh shey cubityn er lheead, as va’n trass shiaght cubityn er lheead: son cheu-mooie ayns voalley’n thie ren eh lhiaghtyn coon ooilley mygeayrt, son nagh beagh ny beamyn soit ayns voallaghyn y thie. 7As va’n thie, tra ve dy hroggal, er ny hroggal lesh clagh v’er ny chummey roish my daink eh gys shen: myr shen nagh row oayrd, ny teigh, ny greïe yiarn erbee, er ny chlashtyn ’sy thie choud as ve dy hroggal. 8Va’n dorrys son y chiamyr veanagh er cheu yesh y thie: as hie ad seose er greeshyn cassee ’sy chiamyr veanagh, as ass y chiamyr veanagh hie ad stiagh ’sy trass. 9Myr shoh hrog eh yn thie, as hug eh kione er; as choodee eh yn thie lesh beamyn as buird cedar. 10As eisht hrog eh shamyryn noi ooilley’n thie queig cubityn er yrjid: as v’ad soit er y thie lesh fuygh-cedar.

11As haink goo’n Chiarn gys Solomon, gra, 12Mychione yn thie shoh t’ou dy hroggal, my nee oo shooyl ayns my lattyssyn, as cooilleeney my vriwnyssyn, as freaylley ooilley my haraghyn, dy immeeaght ayndoo; eisht neem’s my ghoo y chooilleeney rhyt, loayr mee rish David dty ayr: 13As nee’m cummal mastey cloan Israel, as cha dreig-ym my phobble Israel. 14Myr shoh hrog Solomon y thie, as hug eh mullagh er. 15As hrog eh voallaghyn y thie cheu-sthie lesh buird cedar, chammah laare y thie as ceelyn ny voallaghyn: as choodee eh ad er cheu-sthie lesh fuygh, as choodee eh laare y thie lesh plankyn-juys. 16As hrog eh feed cubit er lhiatteeyn y thie, chammah’n laare as ny voallaghyn, lesh buird cedar; hrog eh ad dy jarroo er y hon cheu-sthie, ta shen dy ghra, son yn ynnyd casherick, eer son yn ynnyd smoo casherick. 17As va’n thie, ta shen dy ghra, yn chiamble kiongoyrt rish, da-eed cubit er lhiurid. 18As va’n cedar cheu-sthie jeh’n thie grainnit lesh knoppyn as poseeyn ayns blaa: va ooilley cedar; cha row clagh erbee ry-akin. 19As ren eh cummey cheu-sthie jeh’n thie yn ynnyd casherick, dy hoiagh ayn arg conaant y Chiarn. 20As va’n ynnyd casherick cheu-veealloo feed cubit er lhiurid, as feed cubit er lheead, as feed cubit er yrjid: as choodee eh eh lesh airh ghlen; as myrgeddin choodee eh yn altar va jeant jeh cedar. 21Myr shoh choodee Solomon cheu-sthie’n thie lesh airh ghlen: as ren eh partition liorish ny linkyn airh roish yn ynnyd casherick; as choodee eh harrish eh lesh airh. 22As choodee eh yn slane thie harrish lesh airh, derrey v’eh er chur kione er ooilley’n thie: myrgeddin yn slane altar va liorish yn ynnyd casherick choodee eh harrish lesh airh.

23As cheu-sthie jeh’n ynnyd casherick ren eh daa cherubim dy villey-olive, dagh unnane jeu jeih cubityn er yrjid. 24As queig cubityn va’n derrey skian y cherub, as queig cubityn va’n skian elley y cherub: veih baare yn un skian gys baare yn skian elley va jeih cubityn. 25As va’n cherub elley jeih cubityn: va’n daa cherubim jeh’n un towse, as jeh’n un thummyd. 26Va yrjid yn derrey cherub jeih cubityn, as myr shen va’n cherub elley. 27As hoie eh ny cherubim ’sy thie sodjey stiagh; as ren ny cherubim sheeyney magh nyn skianyn, myr shen dy ren skian yn derrey yeh roshtyn gys yn derrey voalley, as ren skian yn cherub elley roshtyn gys y voalley elley; as ren ny skianyn oc roshtyn dy cheilley ayns mean y thie. 28As choodee eh harrish ny cherubim lesh airh. 29As ren eh cummey ooilley voallaghyn y thie mygeayrt lesh caslyssyn grainnit cherubim, as biljyn-palm, as poseeyn ayns blaa, cheu-sthie as cheu-mooie. 30As laare y thie choodee eh harrish lesh airh, cheu-sthie as cheu-mooie.

31As son dorrys yn ynnyd casherick ren eh coollaghyn dy villey-olive: va’n lindeer as ny essynyn yn wheiggoo ayrn jeh’n voalley. 32Va’n daa choolley myrgeddin jeant jeh billey-olive: as ren eh grainnaghey orroo caslyssyn cherubim, biljyn-palm, as poseeyn ayns blaa, as choodee eh ad harrish lesh airh, as skeayl eh airh er ny cherubim, as er ny biljyn-palm. 33Myr shoh neesht ren eh son dorrys y chiamble, essynyn dy villey-olive, yn chiarroo ayrn jeh’n voalley. 34As va’n daa ghorrys jeh billey-juys: va daa choolley yn derrey ghorrys filley er y cheilley, as va daa choolley yn dorrys elley filley er y cheilley. 35As ren eh grainnaghey orroo cherubim, as biljyn-palm, as poseeyn ayns blaa; as choodee eh ad lesh airh soit er yn obbyr grainnit.

36As hrog eh yn chooyrt sodjey stiagh lesh three roaghyn dy chlagh cummit, as roa dy veamyn cedar.

37’Sy chiarroo vleïn va undin thie’n Chiarn soit, er y vee Zif: 38As ’syn un vleïn jeig, er y vee Bul, (ta shen yn hoghtoo vee,) va’n thie slane troggit trooid magh ooilley ny ayrnyn echey, as cordail rish ooilley’n cummey echey. Myr shen ve shiaght bleeaney dy hroggal: