CAB. VII

1Agh va Solomon three bleeaney jeig troggal e hie hene, as va’n thie slane cummit.

2Hrog eh neesht thie keylley Lebanon; va’n lhiurid echey keead cubit, as yn lheead echey jeih cubityn as da-eed, as yn yrjid echey jeih cubityn as feed; as kiare roaghyn dy phillaryn cedar, lesh beamyn cedar er ny pillaryn. 3As ve coodit lesh cedar erskyn ny beamyn, va nyn lhie er queig pillaryn as da-eed, queig-jeig ayns roa. 4As va uinniagyn ayns three roaghyn, as va soilshey noi soilshey ayns three roaghyn. 5As va ooilley ny coollaghyn as ny essynyn square rish ny uinniagyn; as va soilshey noi soilshey ayns three roaghyn.

6As ren eh porch dy phillaryn, va’n lhiurid echey jeih cubityn as da-eed, as yn lheead echey jeih cubityn as feed: as va’n porch cordail roo; as va ny pillaryn elley, as y beam lajer cordail roo.

7Eisht ren eh porch son y stoyl-briwnys, veih shen dy hirveish briwnys, eer yn porch-quaallagh: as ve coodit lesh cedar, veih’n derrey heu jeh’n laare gys y cheu elley.

8As va cooyrt elley cheu-sthie jeh porch y thie, raad v’eh cummal, va jeh’n obbyr cheddin. Hrog Solomon myrgeddin thie da inneen Pharaoh (v’eh er ghoaill son ben,) goll-rish y phorch shoh. 9V’ad shoh ooilley jeant jeh claghyn costal, cordail rish towse ny claghyn cummit saauit lesh saaueyn er dagh cheu, eer veih’n undin gys mullagh y voalley, as myr shoh er cheu-mooie lesh y chooyrt vooar. 10As va’n undin jeant jeh claghyn costal, eer claghyn mooarey; claghyn jeh jeih cubityn, as claghyn jeh hoght cubityn. 11As va’n mullagh jeant jeh claghyn costal, (lurg towse ny claghyn cummit,) as cedaryn. 12As va’n chooyrt vooar ooilley mygeayrt jeant lesh three roaghyn dy chlaghyn cummit, as roa dy veamyn cedar, chammah son y chooyrt sodjey stiagh jeh thie’n Chiarn, as son porch y thie.

13As hug Solomon fys, as hug eh lesh Hiram veih Tyre. 14V’eh mac ben-treoghe jeh sheeloghe Naphtali, as va e ayr dooinney jeh Tyre, ny obbree ayns prash: as v’eh jeant magh lesh creenaght as tushtey, as schleioil ayns obbraghyn prashey. As haink eh gys ree Solomon, as ghow eh ayns laue yn slane obbyr. 15Son ren eh roie daa phillar dy phrash, hoght cubityn jeig y pheesh ayns yrjid; as va dagh pillar jeu daa chubit jeig mygeayrt. 16As ren eh daa attey dy phrash roit, dy hoiaghey er mullagh ny pillaryn: va yrjid dagh attey queig cubityn: 17As lieenteenyn dy obbyr chequer, as feeaghyn dy obbyr-linkyn son ny atteeyn va soit er mullagh ny pillaryn; shiaght son dagh attey. 18As ren eh ny pillaryn, as daa roa mygeayrt er y derrey obbyr-lieeney, dy choodaghey ny atteeyn v’er y vullagh, lesh pomegranateyn: as shoh myr ren eh son yn attey elley. 19As va ny atteeyn v’er mullagh ny pillaryn jeant jeh cummey lilee foshlit ayns y phorch, kiare cubityn. 20As va pomegranateyn neesht er mullagh ny atteeyn er y daa phillar, jeeragh er y voogh va liorish yn obbyr-lieen: as va ny pomegranateyn daa cheead, ayns roaghyn ooilley mygeayrt er yn attey elley. 21As hoie eh seose ny pillaryn ayns porch y chiamble: as hoie eh seose yn pillar yesh, as ren eh genmys eh Jachin; as hoie eh seose yn pillar chiare, as ren eh genmys eh Boaz. 22As er mullagh ny pillaryn va obbyr casley rish lilee: myr shoh va jerrey er obbyr ny pillaryn.

23As ren eh 7:23 Saagh yindyssagh mooar, son shen, enmyssit Keayn.keayn roit y yannoo, jeh jeih cubityn veih’n derrey oirr gys yn oirr elley: ve ooilley mygeayrt runt, as va’n yrjid echey queig cubityn: as va’n slane combaase echey jeih cubityn as feed ooilley mygeayrt. 24As fo’n oirr echey runt mygeayrt va knoppyn soit mysh, jeih ayns cubit, combaasal yn cheayn mygeayrt: va ny knoppyn soit ayns daa roa tra ve roit. 25Ve soit er daa ghow jeig, three jeeaghyn lesh y twoaie, as three lesh y sheear, as three lesh y jiass, as three lesh y shiar: as va’n keayn soit er y dreeym oc, as va ooilley’n lieh jerree oc sthie fo e vean. 26As ve lheead-bass er cheeid, as va’n beeal echey obbrit myr beeal cappan, lesh blaa lileeyn: ve goaill daa housane bath.

27As ren eh jeih stuill [ny binkyn] dy phrash: kiare cubityn va lhiurid un stoyl, as kiare cubityn yn lheead echey, as three cubityn yn yrjid echey. 28As va ny stuill obbrit er yn aght shoh: va boarderyn orroo, as va ny boarderyn eddyr ny rimmaghyn: 29As er ny boarderyn va eddyr ny rimmaghyn va lionyn, dew, as cherubim: as er ny rimmaghyn va stoyl er-nyn-skyn: as fo ny lionyn as ny dew va slane obbyr thanney elley er ny obbraghey. 30As va fo dagh stoyl kiare queeylyn dy phrash, as plaityn prashey: as va cassyn fo ny kiare corneilyn echey; fo’n tubbyr va cassyn roit, ec lhiattee dagh unnane jeu. 31As va’n beeal echey, cheu-sthie jeh’n attey as er-y-skyn, lheead cubit: as va’n beeal echey runt, obbrit myr y stoyl, ayns cubit dy lieh; as myrgeddin er y veeal echey va grainnit boarderyn kiare-square, cha nee runt. 32As fo ny boarderyn va kiare queeylyn; as va essyl ny queeylyn soit ’sy stoyl, as va yrjid queeyl cubit dy lieh. 33As va obbyr ny queeylyn casley rish obbyr queeyl fainagh; va ny essylyn oc, as ny rhollanyn oc, as ny croughyn oc, as ny spakyn oc ooilley roit. 34As va kiare cassyn gys kiare corneilyn un stoyl: as va ny cassyn jeant jeh’n un stoo. 35As ayns mullagh y stoyl va combaase runt lieh cubit er yrjid: as er mullagh yn stoyl, va ny rimmaghyn, as ny boarderyn echey, yn un chooid. 36Son er plaityn ny rimmaghyn, as er ny boarderyn ren eh grainnaghey cherubim, lionyn, as biljyn-palm, cordail rish cummey dagh unnane oc; as reddyn elley ooilley mygeayrt. 37Er yn aght shoh ren eh ny jeih stuill: v’ad ooilley roit er yn un aght, jeh’n un towse, as yn un thummyd.

38Eisht ren eh jeih tubbyryn prashey: va un saagh goaill da-eed bath: as va dagh saagh kiare cubityn: as er dagh unnane jeh ny jeih stuill va soit un saagh. 39As hug eh queig stuill er cheu yesh y thie, as queig er cheu chiare y thie; as hoie eh yn keayn er cheu yesh y thie lesh y shiar, my-yiass.

40As ren Hiram jannoo ny tubbyryn, as ny sleaystyn aile, as ny basonyn. Myr shoh hug Hiram kione er ooilley’n obbyr ren eh da ree Solomon son thie’n Chiarn. 41Yn daa phillar, as yn daa voogh ny atteeyn v’er mullagh yn daa phillar; as yn daa obbyr-lieen, dy choodagh daa voogh ny atteeyn v’er mullagh ny pillaryn; 42As kiare cheead pomegranate son y daa obbyr-lieen, dy jarroo daa roa dy phomegranateyn son un obbyr-lieen, dy choodaghey daa voogh ny atteeyn va soit er ny pillaryn; 43As ny jeih binkyn, as ny jeih tubbyryn v’er ny binkyn; 44As un cheayn, as daa ghow jeig fo’n cheayn; 45As ny pooiyt, as ny sleaystyn, as ny basonyn: as ooilley ny siyn shoh, va Hiram er n’yannoo da ree Solomon son thie yn Chiarn, v’ad jeant jeh prash sollys. 46Ayns thalloo-rea Yordan ren y ree ad y lheïe, ayns y thalloo craie eddyr Succoth as Zarthan. 47As daag Solomon ooilley ny siyn gyn towse, er-yn-oyr dy row ad erskyn coontey: chamoo va towse yn phrash er ny gheddyn magh. 48As ren Solomon ooilley ny siyn va bentyn gys thie’n Chiarn: yn altar airh, as yn boayrd airh, orroo va’n arran casherick soit. 49As ny kainlereyn dy airh ghlen, queig er y cheu yesh, as queig er y cheu chiare kiongoyrt rish yn ynnyd casherick, marish ny blaaghyn, as ny lampyn, as ny cloughyn airh, 50As ny meilaghyn, as ny smalyderyn, as ny basonyn, as ny spainyn, as ny censeryn dy airh ghlen; as ny jeushanyn airhey, chammah son dorryssyn yn thie sodjey stiagh, yn ynnyd smoo casherick, as son dorryssyn y thie, ta shen, yn chiamble. 51Myr shoh va kione er ooilley yn obbyr ren ree Solomon y yannoo son thie’n Chiarn. As hug Solomon lesh stiagh yn stoo va David e ayr er chasherickey; ta shen, yn argid, as yn airh, as ny siyn, hug eh mastey tashtaghyn thie’n Chiarn.