CAB. VIII

1Eisht haggil Solomon shanstyr Israel cooidjagh, as ooilley king ny tribeyn, ard-gheiney ayraghyn cloan Israel, gys ree Solomon ayns Jerusalem, dy choyrt lhieu seose arg conaant y Chiarn ass ard-valley Ghavid, ta shen, Zion. 2As haggil ooilley deiney Israel ad-hene cooidjagh gys ree Solomon, ec y feailley ’sy vee Ethanim, ta’n chiaghtoo vee. 3As haink ooilley shanstyr Israel, as hrog ny saggyrtyn lhieu yn arg. 4As hug ad lhieu seose arg y Chiarn, as y cabbane-agglish, as ooilley ny siyn casherick va ’sy chabbane, eer ad shoh hug ny saggyrtyn as ny Leviteyn lhieu seose. 5As ree Solomon, as ooilley sheshaght Israel, va er nyn jaglym cooidjagh huggey, v’ad mârish kiongoyrt rish yn arg, chebbal kirree as dew ayns oural, nagh voddagh ve inshit ny coontit son earroo. 6As hug ny saggyrtyn lhieu stiagh arg conaant y Chiarn gys e ynnyd, eer gys ynnyd smoo casherick y thie, ta shen, fo skianyn ny cherubim. 7Son skeayl ny cherubim magh nyn daa skian harrish ynnyd yn arg, as choodee ny cherubim yn arg, as ny looghyn mullee echey. 8As hayrn ad magh ny looghyn, dy row king ny looghyn er cheu-sthie ’syn ynnyd casherick roish stoyl y vyghin, agh cha row ad ry-akin cheu-mooie: as shen y raad t’ad gys y laa t’ayn jiu. 9Cha row nhee erbee ’syn arg agh y daa voayrd dy chlagh, hug Moses ayn ec Horeb, tra ren y Chiarn conaant rish cloan Israel, erreish daue cheet magh ass cheer Egypt. 10As haink eh gy-kione tra va ny saggyrtyn er jeet magh ass yn ynnyd casherick, dy ren y bodjal lhieeney thie’n Chiarn. 11Myr shen nagh voddagh ny saggyrtyn shassoo dy yannoo shirveish, kyndagh rish y vodjal: son va gloyr y Chiarn er lhieeney thie’n Chiarn.

12Eisht loayr Solomon, Dooyrt y Chiarn dy jinnagh eh cummal ’sy dorraghys dowin. 13Ta mee son shickyrys er droggal thie dhyt dy chummal ayn, ynnyd shickyr dhyt dy hannaghtyn ayn son dy bragh. 14As hyndaa’n ree e eddin mygeayrt, as vannee eh ooilley pobble Israel: (son ren ooilley pobble Israel shassoo:) 15As dooyrt eh, Bannit dy row’n Chiarn Jee Israel, loayr lesh e veeal rish David my ayr, as ta lesh e laue er chooilleeney eh, gra, 16Er-dyn laa hug mee lhiam magh my phobble Israel ass Egypt, cha reih mee ard-valley erbee ass ooilley sheelogheyn Israel dy hroggal thie son my ennym dy ve ayn, agh reih mee David dy ve harrish my phobble Israel. 17As ve ayns cree Ghavid my ayr dy hroggal thie son ennym y Chiarn Jee Israel. 18As dooyrt y Chiarn rish David my ayr, Fakin dy row eh ayns dty chree dy hroggal thie gys my ennym, ren uss dy mie dy row eh ayns dty chree: 19Ny-yeih, cha nee uss hroggys y thie, agh dty vac hig jeed, eshyn nee’n thie y hroggal gys my ennym’s. 20As ta’n Chiarn er chooilleeney e ghoo ren e loayrt; as ta mish er n’irree seose ayns ynnyd Ghavid my ayr, as soie er stoyl-reeoil Israel, myr yiall y Chiarn, as er hroggal thie son ennym yn Chiarn Jee Israel. 21As ta mee er hoiaghey magh ayns shen ynnyd son yn arg, ayn ta conaant y Chiarn, ren eh rish nyn ayraghyn, tra hug eh lesh ad magh ass thalloo Egypt.

22As hass Solomon kiongoyrt rish altar y Chiarn, ayns fenish ooilley chaglym Israel, as skeayl eh magh e laueyn lesh niau: 23As dooyrt eh, Hiarn Yee Israel, cha vel Jee erbee casley rhyt’s ayns niau heose, ny er y thalloo wass, ta freayll conaant as myghin rish dty harvaantyn ta shooyl kiongoyrt rhyt lesh ooilley nyn gree; 24Ta er n’yannoo mie da dty harvaant David my ayr shen ny yiall oo da: t’ou er loayrt neesht lesh dty veeal, as er chooilleeney eh lesh dty laue, myr te yn laa t’ayn jiu. 25Shen-y-fa nish, Hiarn Yee Israel, jean mie da dty harvaant David my ayr shen ny yiall oo da, gra, Cha bee oo laccal dooinney ayns my hilley dy hoie er stoyl-reeoil Israel; my shen dy jean dty chloan tastey y ghoaill jeh nyn raad, dy hooyl kiongoyrt rhym, myr t’ou uss er hooyl kiongoyrt rhym. 26As nish, O Yee Israel, lhig da dty ghoo, ta mee guee ort, ve er ny chooilleeney ren oo loayrt rish dty harvaant David my ayr. 27Agh jean Jee dy jarroo cummal er y thalloo? Cur-my-ner, cha vod niau, as niau dy niaughyn, uss y chummal; cre-woad sloo yn thie shoh ta mish er hroggal? 28Ny-yeih jean uss soiaghey jeh padjer dty harvaant, as e accan, O Hiarn my Yee, dy eaishtagh rish yn aghin as y phadjer ta dty harvaant guee kiongoyrt rhyt jiu: 29Dy vod dty hooillyn ve foshlit lesh y thie shoh oie as laa, eer lesh yn ynnyd my-e-chione t’ou er ghra, Bee’n ennym aym’s ayns shen; dy vod uss coyrt clashtyn da’n phadjer nee dty harvaant chebbal lesh yn ynnyd shoh. 30As eaisht uss rish aghin dty harvaant, as dty phobble Israel, tra nee ad padjer y ghoaill lesh yn ynnyd shoh: as jean uss clashtyn ayns niau dty ynnyd-vaghee; as tra t’ou clashtyn, jean leih daue.

31My ta dooinney erbee jannoo aggair da e naboo, as currym currit er dy ghoaill e loo, as my hig yn loo kiongoyrt rish dt’altar ’sy thie shoh: 32Eisht jean uss clashtyn ayns niau, as cooilleen, as briwnys dty harvaantyn, deyrey yn mee-chrauee, dy choyrt e hoilchin er e chione hene; as seyrey yn dooinney cairagh, dy chooilleeney eh cordail rish e ynrickys.

33Tra ta dty phobble Israel fo barriaght nyn noidyn, er-yn-oyr dy vel ad er n’yannoo peccah dt’oï, as dy jean ad chyndaa reesht hood’s, as goaill-rish dt’ennym, as guee, as jannoo aghin hood’s ’sy thie shoh: 34Eisht jean uss clashtyn ayns niau, as leih peccah dty phobble Israel, as cur lhiat ad reesht gys y cheer hug oo da nyn ayraghyn.

35Tra ta’n aer dooint seose, as nagh vel veg y fliaghey, er-yn-oyr dy vel ad er n’yannoo peccah dt’oï; my t’ad guee lesh yn ynnyd shoh, as goaill-rish dt’ennym, as chyndaa veih nyn beccah tra t’ou seaghney ad: 36Eisht jean uss clashtyn ayns niau, as leih peccah dty harvaantyn, as dty phobble Israel, as ynsee daue yn raad mie ayn lhisagh ad gimmeeaght, as cur fliaghey er dty halloo t’ou er choyrt da dty phobble son eiraght.

37My vees gortey ’sy cheer, my vees y chramp ayn, blest, millchea, locust, ny my vees y vraddag ayn; my nee nyn noid chionney ad stiagh ayns cheer nyn ard-valjyn, cre-erbee’n doghan, cre-erbee’n chingys t’ayn; 38Cre-erbee’n phadjer as aghin vees jeant liorish dooinney erbee, ny liorish ooilley dty phobble Israel, dy chooilley ghooinney ta toiggal loght e chree hene, as nee eh skeayley magh e laueyn lesh y thie shoh: 39Eisht jean uss clashtyn ayns niau dty ynnyd-vaghee, as leih daue, as jean, as cur da dagh dooinney cordail rish e raaidyn, ayd ta fys cre t’ayns e chree; (son ayd’s, dy jarroo ayd’s dty-lomarcan, ta fys cre t’ayns creeaghyn ooilley cloan gheiney;) 40Dy vod ad aggle y ghoaill royd ooilley laghyn nyn mea, ayns y cheer hug oo da nyn ayraghyn. 41Myrgeddin, mychione joarree nagh vel jeh dty phobble Israel, agh cheet veih cheer foddey er graih dt’ennym; 42(Son nee ad clashtyn jeh dty ennym mooar, as jeh dty laue lajer, as jeh dty roih sheeynt magh;) tra hig eh as padjer y ghoaill lesh y thie shoh: 43Jean uss clashtyn ayns niau dty ynnyd-vaghee, as jean cordail rish ooilley ny ta’n joarree geearree ort; dy vod ooilley pobble y theihll ve toiggalagh jeh dt’ennym, dy ghoaill aggle royd, myr ta dty phobble Israel; as dy vod fys’ve oc dy vel y thie shoh, ta mish er hroggal, er ny enmys ort.

44My ta dty phobble goll magh dy chaggey noi nyn noidyn, cre-erbee’n raad ver oo magh ad, as ad dy yannoo padjer gys y Chiarn lesh yn ard-valley t’ou uss er reih, as y thie ta mee er hroggal son dt’ennym: 45Eisht cur uss clashtyn ayns niau da nyn badjer as nyn accan, as niartee lesh nyn gooish. 46My t’ad jannoo peccah dt’oï, (son cha vel dooinney erbee nagh vel cur-rish peccah,) as uss ve jymmoosagh roo, as dy livrey oo ad gys nyn noidyn, myr shen dy der ad lhieu ad nyn gappeeyn gys cheer yn noid, foddey ny gerrit; 47Ny-yeih, my smooinys ad orroo hene ayns y cheer huggey v’ad er nyn goyrt lhieu nyn gappeeyn, as arrys y ghoaill, as jannoo aghin hood’s ayns cheer nyn gappeeys, gra, Ta shin er n’yannoo peccah, as er ve mee-viallagh, ta shin er chur-rish olkys; 48As myr shen ad dy hyndaa hood’s lesh ooilley nyn gree, as lesh ooilley nyn annym, ayns cheer nyn noidyn hug lhieu ad ayns cappeeys, as guee hood’s lesh y cheer hug oo da nyn ayraghyn, yn ard-valley t’ou uss er reih, as yn thie ta mish er hroggal son dt’ennym: 49Eisht cur clashtyn da nyn badjer as nyn aghin ayns niau dty ynnyd-vaghee, as niartee lesh nyn gooish, 50As leih da dty phobble t’er n’yannoo peccah dt’oï, as ooilley nyn ghrogh-yannoo t’ad er chur-rish dt’oï, as lhig daue foayr y gheddyn vouesyn hug lhieu ad ayns cappeeys, dy vod ad ve erreeishagh daue: 51Son ad dty phobble as dty eiraght, hug oo lhiat magh ass Egypt, veih mean yn choirrey dy yiarn: 52Dy vod dty hooillyn ve foshlit gys accan dty harvaant, as gys accan dty phobble Israel, dy eaishtagh roo ayns ooilley ny t’ad geearree ort: 53Son ren oo ad y scarrey veih mastey ooilley pobble y theihll, dy ve dty eiraght, myr loayr oo liorish Moses dty harvaant, tra hug oo lhiat ny ayraghyn ain magh ass Egypt, O HIARN YEE. 54As shoh myr ve, erreish da Solomon ve er n’yannoo jerrey er ooilley’n phadjer as yn aghin shoh gys y Chiarn, dy dirree eh veih e ghlioonyn kiongoyrt rish altar y Chiarn lesh e laueyn skeaylt seose lesh niau. 55As hass eh, as vannee eh ooilley pobble Israel lesh ard choraa, gra, 56Bannit dy row’n Chiarn, t’er chur fea da e phobble Israel, cordail rish ooilley e yialdinys: cha vel fockle hene er vailleil jeh ooilley e yialdinys, ren eh gialdyn liorish e harvaant Moses. 57Dy row’n Chiarn yn Jee ain mârin, myr v’eh marish nyn ayraghyn: ny lhig da faagail, ny treigeil shin; 58Dy vod eh ginjillaghey nyn greeaghyn huggey, dy hooyl ayns ooilley e raaidyn, as dy reayll e haraghyn, as e lattyssyn, as e vriwnyssyn, hug eh ayns sarey da nyn ayraghyn. 59As lhig daue shoh my ghoan, ayndoo ta mee er n’yannoo aghin kiongoyrt rish y Chiarn, ve er-gerrey da’n Chiarn yn Jee ain laa as oie, dy vod eh cummal seose cooish e harvaant, as cooish e phobble Israel, ec dy chooilley hraa, myr vees eh ymmyrchagh; 60Dy vod fys ’ve ec ooilley’n seihll dy nee’n Chiarn y Jee, as nagh vel Jee erbee elley. 61Shen-y-fa lhig da’n cree eu ve firrinagh gys y Chiarn yn Jee ain, dy hooyl ayns e lattyssyn, as dy reayll e annaghyn, myr ec y laa t’ayn jiu.

62As ren y ree, as ooilley Israel mârish, oural y hebbal kiongoyrt rish y Chiarn. 63As heb Solomon ourallyn-shee, heb eh da’n Chiarn daa housane as feed dy ghew, as keead thousane as feed dy chirree. Myr shen ren y ree as ooilley cloan Israel thie’n Chiarn y chasherickey. 64Yn laa cheddin ren y ree casherickey mean y chooyrt va kiongoyrt rish thie’n Chiarn: son heb eh ayns shen ourallyn-losht, as chebballyn-arran, as eeh ny ourallyn-shee; er-yn-oyr dy row’n altar prashey va kiongoyrt rish y Chiarn ro choon dy ghoaill ny ourallyn-losht, as ny ourallyn-arran, as eeh ny ourallyn-shee. 65As ec y traa shen dreill Solomon feailley, as ooilley Israel mârish, chaglym mooar dy leih, veih’n goll stiagh ec Hamath gys awin Egypt, kiongoyrt rish y Chiarn yn Jee ain, shiaght laa as shiaght laa, dy jarroo kiare laghyn jeig. 66Er yn hoghtoo laa lhig eh yn raad da’n pobble: as hug ad booise da’n ree, as hie ad rhymboo gys nyn gabbaneyn, gerjoilagh as lesh cree gennal, son ooilley’n vieys va’n Chiarn er hoilshaghey da David e harvaant, as da Israel e phobble.