CAB. IX

1As haink eh gy-kione, tra va Solomon erreish troggal thie’n Chiarn, as thie’n ree, as ooilley aigney Solomon cooilleenit s’gooidsave lesh dy yannoo, 2Dy row’n Chiarn er ny hoilshaghey da Solomon yn nah cheayrt, ayns ashlish, eer myr v’eh ec Gibeon. 3As dooyrt y Chiarn rish, Ta mee er chlashtyn dty phadjer as dt’accan t’ou er n’yannoo kiongoyrt rhym: ta mee er chasherickey yn thie shoh t’ou er hroggal, dy choyrt my ennym ayn son dy bragh; as bee my hooillyn as my chree ayn dy kinjagh. 4As my nee uss shooyl kiongoyrt rhym myr ren David dt’ayr, ayns ônid cree, as ayns ynrickys, dy yannoo cordail rish ooilley ny ta mee er harey dhyt, as my reayllys oo my lattyssyn as my vriwnyssyn; 5Eisht neem’s stoyl-reeoil dty reeriaght er Israel y niartaghey son dy bragh, myr ren mee gialdyn da David dt’ayr, gra, Cha bee oo laccal dooinney dy hoie er stoyl-reeoil Israel. 6Agh my nee shiu ec traa erbee chyndaa ersooyl veih geiyrt orrym, shiuish ny nyn gloan, as gyn freayll my annaghyn as my lattyssyn ta mee er hoiaghey kiongoyrt riu, agh goll as shirveish jeeghyn elley, as cur ooashley daue; 7Eisht nee’m Israel y yiarey magh veih’n cheer ta mee er chur daue: as y thie shoh ta mee er chasherickey son my ennym, scugh-ym ass my hilley; as hig Israel dy ve son craid as an-ghoo mastey dy chooilley phobble: 8As jeh’n thie shoh, ta ard, nee dy chooilley unnane ta goll shaghey yindys y ghoaill, as craidee ad mysh; as jir ad, Cre’n-fa ta yn Chiarn er n’yannoo myr shoh rish y cheer shoh, as rish y thie shoh? 9As nee ad freggyrt, Er-yn-oyr dy hreig ad y Chiarn yn Jee oc, hug lesh magh nyn ayraghyn ass thalloo Egypt, as t’ad er lhiantyn gys jeeghyn elley, as er chur ooashley daue, as er hirveish ad: shen-y-fa ta’n Chiarn er chur lesh ooilley’n olk shoh orroo.

10As haink eh gy-kione lurg feed bleïn, erreish da Solomon ve er droggal yn daa hie, thie’n Chiarn, as thie’n ree, 11(Nish va Hiram ree Tyre er hirveish Solomon lesh biljyn-cedar, as biljyn-juys, as lesh airh, cordail rish ooilley e yeearree,) dy ren ree Solomon eisht cur da Hiram feed ard-valley ayns cheer Ghalilee. 12As haink Hiram magh veih Tyre dy akin ny ard-valjyn va Solomon er choyrt da, as cha by-haittin lesh ad. 13As dooyrt eh, Cre ny ard-valjyn ad shoh t’ou er choyrt dou, my vraar? As denmys eh ad thalloo Cabul gys y laa shoh. 14As hug Hiram three-feed talent dy airh gys y ree.

15As shoh va oyr y cheesh hrog ree Solomon, Ry-hoi troggal thie’n Chiarn, as e hie hene, as Millo, as voalley Yerusalem, as Hazor, as Megiddo, as Gezer. 16Son va Pharaoh ree Egypt er gholl seose, as er ghoaill Gezer, as er lostey eh lesh aile, as er varroo ny Canaaniteyn va baghey ’syn ard-valley, as er choyrt eh son toghyr lesh e inneen, ben Solomon. 17As hrog Solomon Gezer, as Beth-horon heese, 18As Baalath, as Tadmor ’syn aasagh, ayns y cheer, 19As ooilley ny ard-valjyn-stoyr v’ec Solomon, as ard-valjyn son e ainee, as ard-valjyn son e varkee, as shen ny va Solomon aggindagh dy hroggal ayns Jerusalem, as ayns Lebanon, as ayns ooilley cheer e rheam. 20Agh son ooilley’n pobble va faagit jeh ny Amoriteyn, Hittiteyn, Perizziteyn, Hiviteyn, as Jebusiteyn, nagh row jeh cloan Israel, 21Nyn gloan va faagit nyn yeï ’sy cheer, adsyn myrgeddin nagh row cloan Israel dy slane er vainshtyragh, jeu shoh hrog Solomon keesh dy hirveish-bondiaght gys y laa jiu. 22Agh cha ren Solomon veg jeh cloan Israel y choyrt fo shirveish bondiaght: agh v’ad e gheiney-caggee, as e harvaantyn, as e phrinceyn, as e chaptanyn, as mainshtyryn e ainee, as e varkee. 23Ad shoh va ny ard offishearyn va harrish obbyr Solomon, queig cheead as jeih as da-eed, va reill harrish y pobble ren laboragh ’syn obbyr.

24Agh haink inneen Pharaoh seose ass ard-valley Ghavid gys e thie hene va Solomon er hroggal jee: shen y traa hrog eh Millo.

25As three keayrtyn ’sy vleïn heb Solomon ourallyn-losht as ourallyn-shee er yn altar hrog eh da’n Chiarn, as losht eh incense er yn altar va kiongoyrt rish y Chiarn. Myr shoh va’n thie slane cummit.

26As hooar Solomon aarloo flod lhuingys ayns Ezion-geber, ta liorish Eloth, er oirr yn Aarkey Jiarg, ayns cheer Edom. 27As hug Hiram ayns ny lhongyn e harvaantyn, shoalteyryn schleioil ayns shiaulley, marish sharvaantyn Solomon. 28As haink ad gys Ophir, as hug ad lhieu veih shen airh, kiare cheead talent as feed, as hug ad lhieu eh gys ree Solomon.