CAB. III

1Myrgeddin, shiuish vraane-poost, bee-jee ayns biallys da ny sheshaghyn eu; my ta veg jeusyn nagh vel biallagh da’n goo, dy vod ad myrgeddin fegooish y goo ve er ny chosney liorish ymmyrkey-bea ny mraane. 2Tra t’ad cur-my-ner yn ymmyrkey sheelt eu ayns aggle Yee. 3Yn soiaghey magh eu ayns nyn goamrey ny lhig da ve shen er y cheu-mooie jeh fee yn folt, ny ceau airh, ny cur erriu coamrey [moyrnagh]: 4Agh lhig da ve yn dooinney follit ’sy chree, ayns shen nagh jed naardey, dy jarroo yn coamrey dy spyrryd meen as feagh, ta mooar soit jeh ayns shilley Yee. 5Son er yn aght shoh ’sy chenn earish, ren ny mraane crauee myrgeddin, va coyrt nyn dreishteil ayns Jee, ad-hene y choamrey, ayns biallys da ny deiney-poost oc hene. 6Dy jarroo myr ren Sara biallys y choyrt da Abraham, genmys eh ny hiarn: ny inneenyn eck ta shiuish, choud as nee shiu dy mie, as ny bee-jee agglit veih nyn gurrym lesh seaghyn erbee. 7Myrgeddin, shiuish gheiney-poost, jean-jee baghey mâroo cordail rish tushtey, coyrt onnor da’n ven myr da’n saagh s’annooinee, as myr co-eiraghyn jeh grayse y vea; nagh bee ny padjeryn eu er nyn lhiettal. 8Er-jerrey, bee-jee ooilley jeh un aigney, chymmoil yn derrey yeh jeh’n jeh elley, cur-jee graih myr braaraghyn, bee-jee lane dy hymmey, bee-jee dooie: 9Cha nee cooilleeney olk son olk, ny oltooan son oltooan: agh ayns ynnyd shen, bannaghey; toiggal dy vel shiu gys shoh er nyn eam, dy vod shiu bannaght y gheddyn myr eiraght. 10Son eshyn saillish ve graihagh er bea, as laghyn mie y akin, lhig da e hengey y smaghtaghey veih olk, as e veillyn nagh loayr ad veg y volteyraght. 11Lhig da chea veih olk, as jannoo mie; lhig da shee y hirrey, as lhiantyn huggey. 12Son ta sooillyn y Chiarn er y vooinjer ynrick, as e chleayshyn foshlit gys ny padjeryn oc: agh ta eddin y Chiarn noi ocsyn ta jannoo olk. 13As quoi eh nee aggair diu, my eiyrys shiu da shen ny ta mie? 14Agh foast my ta shiu surranse er coontey ynrickys, s’maynrey shiu: as ny bee-jee agglagh roish y baggyrt oc, chamoo bee-jee seaghnit; 15Agh jean-jee yn Chiarn Jee y chasherickey ayns nyn greeaghyn: as bee-jee kinjagh aarloo dy chur ansoor da dy chooilley ghooinney ta shirrey oyr son y treishteil t’ayndiu, lesh meenid as arrym: 16Freayll cooinsheanse vie; son wheesh as dy vel ad goltooaney shiuish myr drogh-yantee, dy vod ad nearey ’ghoaill ta cassid dy foalsey yn ymmyrkey-bea vie eu ayns Creest. 17Son te ny share, my she aigney Yee eh, dy jean shiu surranse son jannoo dy mie, na son jannoo dy olk. 18Son ta Creest myrgeddin er hurranse un cheayrt son peccaghyn, yn fer-cairagh son ny mee-chairee, (dy voddagh eh shiu y chur lesh gys Jee,) v’eh er ny choyrt gy-baase ayns yn eill, agh er ny vioghey liorish y Spyrryd: 19Liorish y Spyrryd cheddin shen hie eh as ren eh preacheil gys ny spyrrydyn ayns pryssoon; 20Va roish nish mee-viallagh, tra ren surranse-foddey Yee farkiagh ayns laghyn Noah, choud as va’n arg dy hroggal; aynjee va beggan-beg, ta shen, hoght anmeenyn, er nyn sauail liorish ushtey. 21Yn co-soylaghey jeh shoh, dy jarroo bashtey, ta nish myrgeddin sauail shin, (cha nee liorish cur ersooyl broïd yn eill, agh liorish yn ansoor dy chooinsheanse vie gys Jee,) trooid irree-seose-reesht Yeesey Creest: 22Ta er gholl gys niau, as ta er laue yesh Yee, huggeysyn ta ainleyn as ard-reillyn, as pooaraghyn er nyn injillaghey.