CAB. XI

1Eisht haink Nahash yn Ammonite seose, as ren eh campal noi Jabesh-gilead: as dooyrt ooilley deiney Yabesh rish Nahash, Jean conaant rooin, as nee mayd oo y hirveish. 2As dreggyr Nahash yn Ammonite ad, Er y chonaant shoh nee’m coardail riu, dy der-ym assdiu ooilley yn tooill yesh, dy ve son oltooan er ooilley Israel. 3As dooyrt shanstyr Yabesh rish, Cur dooin shiaghtin dy hraa, dy vod mayd chaghteryn y choyrt gys ooilley ardjyn Israel; as eisht, mannagh bee dooinney erbee dy hauail shin, hig mayd magh hood.

4Eisht haink ny chaghteryn gys Gibeah Saul, as dinsh ad ny naightyn ayns clashtyn y pobble: as hrog ooilley yn pobble seose nyn goraa, lesh dobberan. 5As cur-my-ner haink Saul lesh ny dew ass y vagher, as dooyrt Saul, Cre ta jannoo er y pobble dy vel ad keayney? As dinsh ad da glare deiney Yabesh. 6As haink Spyrryd Yee er Saul tra cheayll eh ny naightyn shen, as va e chorree dy mooar er ny vrasnaghey. 7As ghow eh cubbyl dy ghew, as yiare eh ad ayns peeshyn, as hug eh ad trooid ooilley ardjyn Israel lesh laueyn chaghteryn, gra, Quoi-erbee nagh jig magh marish Saul as Samuel, shoh myr vees jeant rish ny dew echey. As huitt aggle y Chiarn er y pobble, as haink ad magh myr un dooinney. 8As tra v’eh er ghoaill yn earroo oc ayns Bezek, va cloan Israel three cheead thousane, as va deiney Yudah jeih thousaneyn as feed. 9As dooyrt ad rish ny chaghteryn, Shoh myr jir shiu rish deiney Yabesh-gilead, Mairagh, mysh y vun-laa, yiow shiu cooney. As haink ny chaghteryn, as hoilshee ad shoh da deiney Yabesh; as ghow ad cree. 10Shen-y-fa dooyrt deiney Yabesh, Mairagh hig mayd hiu, as nee shiu rooin myr sailliu. 11As er laa-ny-vairagh rheynn Saul y pobble ayns three sheshaghtyn; as vrish ad stiagh ayns mean yn cheshaght-chaggee ec arrey yn voghrey, as varr ad ny Ammoniteyn derrey chiass y laa: as haink eh gy-kione, dy row adsyn va er-mayrn er nyn skeayley, myr shen nagh row jees jeu faagit cooidjagh.

12As dooyrt y pobble rish Samuel, Quoi eh ren gra, Nee Saul reillys harrin? cur-jee lhieu ny deiney shen, dy vod mayd y choyrt gy-baase ad. 13As dooyrt Saul, Cha bee dooinney er ny choyrt gy-baase y laa shoh: son jiu ta’n Chiarn er n’obbraghey livrey-ys mooar da Israel. 14Eisht dooyrt Samuel rish y pobble, Tar-jee, as lhig dooin goll gys Gilgal, as y reeriaght y hickyraghey ass-y-noa ayns shen. 15As hie ooilley’n pobble gys Gilgal, as ayns shen ren ad Saul ny ree fenish y Chiarn ayns Gilgal: as ayns shen heb ad ourallyn-shee kiongoyrt rish y Chiarn: as ayns shen va ard-voggey er Saul as ooilley deiney Israel.