CAB. XIII

1Ren Saul reill un vleïn; as tra v’eh er reill daa vleïn harrish Israel, 2Ren Saul reih three thousaneyn dy gheiney Israel: jeu shoh va daa housane marish Saul ayns Michmash, as ayns cronk Beth-el, as va thousane marish Jonathan ayns Gibeah jeh Benjamin: as son y chooid elley jeh’n pobble hug eh thie dy chooilley ghooinney gys e chummal hene. 3As woaill Jonathan garrison ny Philistinee va ayns Gebah; as cheayll ny Philistinee jeh. As heid Saul yn trumpet trooid ooilley yn cheer, gra, Lhig da ny Hebrewnee clashtyn. 4As cheayll ooilley Israel dy row Saul er woalley garrison ny Philistinee, as dy row ny Philistinee myrgeddin soit er goaill cooilleeney er Israel. As va’n pobble sumnit dy cheilley lurg Saul gys Gilgal.

5As haggil ny Philistinee ad-hene cooidjagh dy chaggey rish Israel, three thousane fainagh, as shey thousane markiaght, as ny coshee myr yn gheinnagh er oirr ny marrey ayns earroo: as haink ad seose, as ren ad campal ayns Michmash, shiar veih Beth-aven. 6Tra honnick deiney Israel dy row ad ayns chennid, (son v’ad er choayl nyn gree,) eisht dollee yn pobble ad-hene ayns ooigyn, as ayns keylljyn, as ayns creggyn, as ayns sleityn, as ayns guaggyn. 7As chossyn paart jeh my Hebrewnee harrish Jordan gys cheer Ghad as Gilead. Agh son Saul v’eh foast ayns Gilgal; as va ooilley’n pobble er-creau geiyrt er.

8As duirree eh shiaght laa, cordail rish y traa va Samuel er phointeil da: agh cha daink Samuel gys Gilgal; as va’n pobble er nyn skeayley veih. 9As dooyrt Saul, Cur-jee lhieu hym gys shoh oural-losht as ourallyn-shee. As heb eh yn oural-losht. 10As haink eh gy-kione, cha leah’s v’eh erreish chebbal yn oural-losht, cur-my-ner, haink Samuel, as hie Saul magh ny whail ayns ooashley da.

11As dooyrt Samuel, Cre shoh t’ou er n’yannoo? As dreggyr Saul, Er-yn-oyr dy vaik mee dy row’n pobble skeayley voym, as nagh daink oo cheu-sthie jeh’n traa pointit, as dy row ny Philistinee er nyn jaglym cooidjagh gys Michmash; 12Er-y-fa shen dooyrt mee, Tuittee ny Philistinee nish orrym ec Gilgal, as cha vel mee er n’yannoo aghin gys y Chiarn: va mee êginit er-y-fa shen, as heb mee oural-losht. 13As dooyrt Samuel rish Saul, T’ou er n’yannoo dy ommijagh: cha vel oo er reayll yn sarey doardee’n Chiarn dty Yee dhyt; son nish veagh yn Chiarn er hickyraghey dty reeriaght ayns Israel son earishyn foddey beayn. 14Agh nish cha bee dty reill agh giare: ta’n Chiarn er reih da dooinney lurg e chree hene, as ta’n Chiarn er phointeil eh ny chaptan harrish e phobble, er-yn-oyr nagh vel oo er vreaylley shen ny ren y Chiarn dty harey. 15As hrog Samuel er, as hie eh seose veih Gilgal gys Gibeah jeh Benjamin. As ghow Saul earroo yn pobble va mârish, mysh shey cheead dooinney. 16As duirree Saul as Jonathan e vac, as y cheshaght va mâroo, ayns Gibeah jeh Benjamin: agh ren ny Philistinee campal ayns Michmash.

17As haink ny spooilleyderyn veih camp ny Philistinee, ayns three sheshaghtyn: hyndaa un sheshaght gys y raad ta leeideil gys Ophrah, gys cheer Shual: 18As ghow sheshaght elley yn raad gys Beth-horon: as sheshaght elley raad ny ardjyn lesh coan Zeboim gys yn aasagh.

19Nish cha row gaaue ry-gheddyn trooid ooilley cheer Israel; (son dooyrt ny Philistinee, Er-aggle dy jean ny Hebrewnee daue hene cliwenyn as shleiyghyn;) 20Agh hie ooilley ny Israeliteyn sheese gys ny Philistinee, dagh dooinney dy choyrt skain er e hock, as meer er e choulter, dy shleeu e heigh, as e chiebbey. 21Agh va file oc son ny kiebbaghyn, as son ny coulteryn, as son ny gollageyn, as son ny teighyn, as dy virraghey ny broddyn-immanagh. 22Myr shen haink eh gy-kione er laa’n chaggey, nagh row cliwe ny shleiy ry-gheddyn ayns laue veg jeh’n pobble va marish Saul as Jonathan: er-lhimmey jeh ny v’ec Saul as Jonathan e vac. 23As hie garrison ny Philistinee magh trooid raad sleitagh Michmash.