CAB. XIV

1Nish va laa dy row, dy dooyrt Jonathan mac Saul rish y dooinney aeg e armyder, Tar, as lhig dooin goll harrish gys garrison ny Philistinee, ta er y cheu elley. Agh va shoh gyn-yss da e ayr. 2As va Saul ’sy chione elley jeh Gibeah, fo billey-pomegranate ayns Migron: as va earroo’n pobble va mârish mysh shey cheead dooinney; 3As myrgeddin Ahiah mac Ahitub, braar I-chabod, mac Phinehas, mac Eli, saggyrt y Chiarn ayns Shiloh, coamrit lesh yn ephod. As cha dennee yn pobble dy row Jonathan er n’immeeaght.

4As eddyr ny raaidyn coon ghow Jonathan dy chosney harrish gys gard ny Philistinee, va carrick ard brishtagh er dagh cheu: as va ennym y derrey yeh Bozez, as ennym y jeh elley Seneh. 5Va oaie yn derrey yeh lesh y twoaie jeeragh er Michmash, as yn jeh elley lesh y jiass jeeragh er Gibeah. 6As dooyrt Jonathan rish y dooinney aeg e armyder, Tar, as lhig dooin goll harrish gys garrison ny chymmyltee shoh: foddee eh ve dy jean y Chiarn gobbraghey er nyn son: son te’n un chooid da’n Chiarn dy hauail liorish mooarane ny liorish beggan. 7As dooyrt yn armyder rish, Jean ooilley ny t’ayns dty chree; chyndaa raad sailt; cur-my-ner, ta mish mayrt cordail rish dty aigney. 8Eisht dooyrt Jonathan, Cur-my-ner, hed mayd harrish gys ny deiney shoh, as shin hene y hoilshaghey daue. 9My jir ad myr shoh rooin, Fuirree-jee derrey hig mayd hiu; eisht shass mayd raad ta shin, as cha jem mayd seose huc. 10Agh my jir ad myr shoh, Tar-jee seose hooin; eisht hed mayd seose: son ta’n Chiarn er livrey ad gys nyn laue; as bee shoh son cowrey dooin. 11As ren ad ny-neesht ad-hene y hoilshaghey da gard ny Philistinee: as dooyrt ny Philistinee, Cur-my-ner, ta ny Hebrewnee cheet magh ass ny tuill raad dollee ad ad-hene. 12As dreggyr deiney’n gharrison Jonathan as e armyder, as dooyrt ad, Tar-jee seose hooin, as jeeagh mayd red ennagh diu. As dooyrt Jonathan rish e armyder, Tar seose my yeï; son ta’n Chiarn er livrey ad gys laue Israel. 13As ren Jonathan drappal seose er e laueyn as er e chassyn, as e armyder ny yeï: as v’ad er nyn yiarey sheese roish Jonathan; as varr yn armyder geiyrt er. 14As y chied slaughter shen ren Jonathan as e armyder, ve mysh feed dooinney, ayns mygeayrt lieh acre hallooin, oddagh cubbyl dy ghew y hraaue. 15As va’n cheshaght-chaggee as ooilley’n pobble er-creau fud y vagheragh: va’n garrison as ny roosteyryn er-creau myrgeddin; as va craa-hallooin ayn: myr shen dy row craa feer atchimagh ny-vud oc. 16As yeeagh arreyderyn Saul ayns Gibeah jeh Benjamin, as cur-my-ner, va’n cheshaght lheïe ersooyl, as hie ad er nyn doshiaght bwoalley sheese yn derrey yeh yn jeh elley. 17Eisht dooyrt Saul rish y pobble va mârish, Gow-jee earroo’n sleih, dy yeeaghyn quoi t’er n’gholl voïn. As tra v’ad er ghoaill y coontey, cur-my-ner, cha row Jonathan as e armyder ayns shen. 18As dooyrt Saul rish Ahiah, Cur lhiat gys shoh arg Yee: (son va arg Yee ec y traa shen marish cloan Israel.)

19As haink eh gy-kione choud’s va Saul loayrt rish y taggyrt, dy ren y tharmane va ayns sheshaght-caggee ny Philistinee troggal as goaill niart ny syrjey as ny syrjey: as dooyrt Saul rish y taggyrt, Cum dty laue. 20As ren Saul as ooilley’n pobble va mârish ad-hene y haglym cooidjagh, as haink ad gys y chaggey: as cur-my-ner, va cliwe dagh dooinney noi e heshey, as va cragh dewil ny-vud oc. 21As ny Hebrewnee va marish ny Philistinee roish y traa shen, hie seose mâroo gys y champ, hyndaa adsyn myrgeddin dy ve er cheu ny Israeliteyn va marish Saul as Jonathan. 22Myrgeddin ooilley deiney Israel, va er cheiltyn ad-hene ayns slieau Ephraim, tra cheayll ad dy row ny Philistinee er roie er-chea, deiyr adsyn myrgeddin chion orroo ’sy chaggey. 23Myr shoh ren y Chiarn Israel y hauail yn laa cheddin: as hie ad er nyn doshiaght caggey choud’s Beth-aven.

24As va deiney Israel fo seaghyn yn laa shen: son dy row Saul er choyrt y pobble fo sarey chion, gra, Cursit dy row’n dooinney ghoys monney erbee dy veaghey derrey’n astyr, dy voddym cooilleeney ’ghoaill er my noidyn: myr shen cha ren veg jeh’n pobble goaill greme dy veaghey. 25As haink ooilley’n pobble gys keyll, raad va mill er y thalloo. 26As tra va’n pobble er jeet stiagh ’sy cheyll, cur-my-ner, ren y vill shilley; agh cha dug dooinney erbee e laue gys e veeal: son va’n pobble fo aggle yn mollaght. 27Agh cha geayll Jonathan dy row e ayr er choyrt y pobble fo’n sarey, shen-y-fa heeyn eh magh baare y lorg v’echey ayns e laue, as hum eh eh ayns kere-volley, as hug eh e laue gys e veeal; as va e hooillyn er nyn niartaghey. 28Eisht dreggyr fer jeh’n pobble, as dooyrt eh, Hug dt’ayr yn pobble fo sarey chion, lesh breearrey, gra, Cursit dy row’n dooinney ta goaill veg y veaghey yn laa shoh. As va’n pobble faiynt. 29Eisht dooyrt Jonathan, Ta my ayr er voirey’n cheer: jeeagh-jee, ta mee guee erriu, kys ta my hooillyn er nyn niartaghey, neayr’s vlasht mee kuse jeh’n vill shoh. 30Nagh foddey bare dooin, dy beagh y pobble jiu er n’ee dy arryltagh jeh spooilley nyn noidyn t’ad er ghoaill? nagh beagh nish cragh foddey smoo mastey ny Philistinee? 31As woaill ad ny Philistinee yn laa shen veih Michmash derrey Aijalon: as va’n pobble slane tooillit. 32Er shoh roie’n pobble er y spooilley, as ghow ad kirree, as dew, as lheiyee, as ren ad y varroo ad er y thalloo: as d’ee yn pobble jeu lesh yn uill.

33Eisht dinsh ad da Saul, gra, Cur-my-ner, ta’n pobble jannoo peccah noi’n, Chiarn, ayns dy vel ad gee yn eill lesh yn uill. As dooyrt eh, Ta shiu er n’yannoo dy aggairagh: rowl-jee nish hym ayns shoh 14:33 Son altar —clagh vooar. 34As dooyrt Saul, Immee-jee mastey’n pobble, as abbyr-jee roo, Cur-jee lhieu hym gys shoh dy chooilley ghooinney e ghow, as dy chooilley ghooinney e cheyrrey, as marr-jee ad ayns shoh, as ee-jee; as ny jean-jee peccah noi’n Chiarn ayns gee lesh yn uill. As hug ooilley’n pobble lhieu dy chooilley ghooinney e ghow mârish yn oie shen, as ren ad y varroo ad ayns shen. 35As hrog Saul altar gys y Chiarn: shen va’n chied altar hrog eh gys y Chiarn.

36As dooyrt Saul, Lhig dooin goll sheese er-eiyrt’s ny Philistinee ’syn oie, as ad y spooilley derrey’n vadran; as ny lhig dooin dooinney jeu y aagail bio. As dooyrt ad, Jean myr s’mie lhiat. Eisht dooyrt y saggyrt, Lhig dooin ayns shoh tayrn er-gerrey gys Jee. 37As hir Saul coyrle er Jee, Jem seose er-eiyrt’s ny Philistinee? jean uss ad y livrey gys laue Israel? Agh cha dug eh ansoor da er y laa shen. 38As dooyrt Saul, Tayrn-jee er-gerrey ooilley shiuish ard-gheiney’n pobble: as lhig dooin briaght as fakin; quoi by-chyndagh rish y peccah shoh jiu: 39Son myr ta’n Chiarn bio, ta sauail Israel, ga dy beagh eh ayns Jonathan my vac, bee eh dy shickyr er ny choyrt gy-baase. Agh cha row dooinney mastey ooilley’n pobble hug ansoor da. 40Eisht dooyrt eh rish ooilley Israel, Bee-jee shiuish er y derrey heu, as beem’s as Jonathan my vac er y cheu elley. As dooyrt y pobble rish Saul, Jean myr s’mie lhiat hene. 41Eisht dooyrt Saul rish y Chiarn Jee Israel, Cur dooin cowrey cronnal. As haink y cowrey magh er Saul as Jonathan: agh va’n pobble er nyn seyrey. 42As dooyrt Saul, Tilg-jee lottyn eddyr mish as Jonathan my vac. As va Jonathan goit. 43Eisht dooyrt Saul rish Jonathan, Insh dou, cre t’ou er n’yannoo. As dinsh Jonathan da, as dooyrt eh, Cha ren mee agh blashtyn jeh kuse fardalagh dy vill er baare y lorg v’ayns my laue, as cur-my-ner, ta mee dy hurranse baase. 44As dreggyr Saul, Shoh as ny smoo dy der Jee orrym; mannagh bee oo er dty choyrt gy-baase, Yonathan. 45As dooyrt y pobble rish Saul, Bee Jonathan er ny choyrt gy-baase, ta er n’obbraghey lheid y varriaght mooar shoh ayns Israel? Ny lhig eh Jee: myr ta’n Chiarn bio, cha jean un renaig jeh e chione tuittym gys y thalloo; son t’eh er n’obbraghey marish Jee yn laa shoh. Myr shen ren y pobble Jonathan y hauail, nagh dooar eh baase. 46Eisht hie Saul seose veih geiyrt er ny Philistinee, as hie ny Philistinee gys nyn ynnyd hene.

47Myr shen ghow Saul yn reiltys harrish Israel, as ren eh caggey noi ooilley e noidyn er dy chooilley heu, noi Moab, as noi cloan Ammon, as noi Edom, as noi reeaghyn Zobah, as noi ny Philistinee: as cre-erbee yn raad hyndaa eh, hooar eh yn varriaght. 48As haggil eh sheshaght-caggee, as woaill eh ny Amalekiteyn, as ren eh Israel y livrey ass ny laueyn ocsyn va roïe er spooilley ad. 49Nish va mec Saul, Jonathan, as Ishui, as Melchi-shua: as shoh va enmyn y daa inneen echey; ennym yn unnane shinney Merab, as ennym yn unnane saa Michal: 50As va ennym ben Saul Ahinoam, inneen Ahimaaz: as va ennym captan e heshaght-chaggee, Abner mac Ner, naim Saul. 51As Kish va ayr Saul; as va Ner, ayr Abner mac Abiel. 52As va caggey dewil noi ny Philistinee ooilley laghyn Saul: as raad chronnee Saul dooinney trean erbee, ny dooinney dunnal, ghow eh ad son sidooryn fo hene.