CAB. XVI

1As dooyrt y Chiarn rish Samuel, Caïd nee oo dobberan son Saul, fakin dy vel mish er yiooldey rish veih reill harrish Israel? Lhieen dty eairk lesh ooil, as immee; ver-yms oo gys Jesse yn Beth-lehemite: son ta mee er chiarail dou hene ree mastey e vec. 2As dooyrt Samuel, Kys oddym goll? my chlinnys Saul jeh, nee eh m’y varroo. As dooyrt y Chiarn, Gow colbagh mayrt, as abbyr, Ta mee cheet dy hebbal oural gys y Chiarn. 3As jean Jesse y chuirrey gys yn oural, as soilshee-yms dhyt cre t’ayd dy yannoo: as nee oo eshyn y ooilaghey neem’s genmys dhyt. 4As ren Samuel myr loayr y Chiarn, as haink eh gys Beth-lehem: as va shanstyr y valley ayns imnea tra haink eh, as dooyrt ad, Vel oo cheet dy sheeoil? 5As dooyrt eh, Dy sheeoil: ta mee er jeet dy hebbal oural gys y Chiarn; jean-jee shiu-hene y chasherickey, as tar-jee mârym gys yn oural. As va Jesse as e vec er nyn gasherickey, as chuir eh ad gys yn oural.

6As haink eh gy-kione, tra v’ad er jeet, dy yeeagh eh er Eliab, as smooinee eh rish hene, Son shickyrys ta fer-ooilit y Chiarn kiongoyrt rish. 7Agh dooyrt y Chiarn rish Samuel, Ny jeeagh er e eddin, ny cre cha thollee t’eh; son dy vel mee er n’obbal eh; son cha vel y Chiarn fakin, myr ta dooinney fakin; son ta dooinney briwnys cordail rish ny t’eh fakin, agh ta’n Chiarn fakin y cree. 8Eisht deïe Jesse er Abinadab, as hug eh er goll kiongoyrt rish Samuel. As dooyrt eh, Chamoo ta’n Chiarn er reih eh shoh. 9Eisht hug Jesse er Shammah dy gholl shaghey. As dooyrt eh, Chamoo ta’n Chiarn er reih eh shoh. 10Reesht, hug Jesse er shiaght jeh e vec dy ve fenish Samuel. As dooyrt Samuel rish Jesse, Cha vel y Chiarn er reih ad shoh. 11As dooyrt Samuel rish Jesse, Nee ad shoh ooilley dty chloan? As dooyrt eh, Ta foast fer saa n’ad shoh, as cur-my-ner, t’eh bochillagh ny kirree. As dooyrt Samuel rish Jesse, Cur fys er e hon: son cha soie mayd gys y voayrd derrey hig eh. 12As hug eh fys er e hon, as hug eh lesh stiagh eh. Nish v’eh ruishagh, as dy eddin aalin, as stoamey dy yeeaghyn er. As dooyrt y Chiarn, Irree, jean eh y ooilaghey, son shoh’n dooinney. 13Eisht ghow Samuel yn eairk dy ooil, as ren eh eh y ooilaghey er-lheh veih e vraaraghyn: as haink Spyrryd y Chiarn er David veih’n laa shen magh. Myr shen dirree Samuel, as hie eh gys Ramah.

14Agh ren Spyrryd y Chiarn Saul y hreigeil, as v’eh seaghnit lesh spyrryd dy olkys veih’n Chiarn. 15As dooyrt sharvaantyn Saul rish, Cur-my-ner nish, ta spyrryd dy olkys veih Jee dy dty voirey. 16Lhig da nyn jiarn nish goardaghey dty harvaantyn, dy vriaght son dooinney schleioil dy chloie er y chlaasagh: as hig eh gy-kione, tra vees y spyrryd olk shoh ort veih Jee, dy jean eh cloie lesh e laue, as yiow couyr. 17As dooyrt Saul rish e harvaantyn, Fow-jee dou nish claaseyder mie, as cur-jee lhieu eh hym. 18Eisht dreggyr fer jeh ny sharvaantyn, as dooyrt eh, Cur-my-ner, ta mee er vakin fer jeh mee Jesse yn Beth-lehemite, dy vel eh cloieder schleioil, as dooinney feer dunnal, as dooinney caggee, as tushtagh ayns cooishyn, as persoon stoamey, as ta’n Chiarn mârish.

19Shen-y-fa hug Saul chaghteryn gys Jesse, as dooyrt eh, Cur hym’s David dty vac, ta marish ny kirree. 20As ghow Jesse lught assyl dy arran, as boteil feeyney, as mannan, as hug eh ad lesh David e vac gys Saul. 21As haink David gys Saul, dy hirveish eh: as v’eh ayns ard foayr rish; as haink eh dy ve ny armyder fo. 22As hug Saul fys gys Jesse, gra, Lhig da David, ta mee guee ort, 16:22 Ve fer jeh my gheiney —shassoo kiongoyrt rhym; son t’eh er gheddyn foayr ayns my hilley. 23As haink eh gy-kione, tra haink y doghan dy aigney seaghnit veih Jee er Saul, dy ghow David claasagh, as chloie eh lesh e laue: myr shen va Saul er ny ooraghey, as hooar eh couyr, as va fea echey veih’n drogh-spyrryd.