CAB. XVII

1Nish haggil ny Philistinee cooidjagh nyn armeeyn gys caggey, as v’ad er nyn jaglym cooidjagh ec Shochoh, ta bentyn da Judah, as ren ad campal eddyr Shochoh as Azekah, ayns Ephes-dammim. 2As va Saul as deiney Israel er nyn jaglym cooidjagh, as ren ad campal liorish coan Elah, as hayrn ad magh ayns order-caggee noi ny Philistinee. 3As hass ny Philistinee er slieau er y derrey heu, as hass Israel er slieau er y cheu elley: as va coan eddyr ad.

4As hie champion magh ass camp ny Philistinee, enmyssit Goliath, jeh Gath, va nuy trieyn as reaish er yrjid. 5As va echey bayrn-caggee dy phrash er e chione, as v’eh coamrit lesh cooat-caggee; as trimmid e chooat queig thousane shekel dy phrash. 6As va boadrymyn prashey er e lurgaghyn, as plaityn prashey eddyr e gheayltyn. 7As va cass y shleiy echey myr garmin fidderagh, as va kione e shleiy towse shey cheead shekel dy yiarn: as va armyder gymmyrkey e scape, goll roish. 8As hass eh, as dyllee eh gys armeeyn Israel, as dooyrt eh roo, Cre’n feme ta rish ooilley yn ’vea shoh, shiu dy heet magh ayns order-caggee? Nagh nee Philistine mish, as shiuish sharvaantyn Saul? reih-jee dooinney ny mast’ eu, as lhig da cheet neose hym’s. 9My t’eh son caggey rhym, as mish y varroo, eisht bee mayd ny sharvaantyn euish: agh my yioyms y varriaght ersyn, as marroo eh, eisht bee shiuish ny sharvaantyn ainyn, as bee shiu fo nyn reill. 10As dooyrt y Philistine, Ta mee cur y-lane fo armeeyn Israel y laa shoh: cur-jee dooinney hym, dy vod mayd caggey ry-cheilley. 11Tra cheayll Saul as ooilley Israel goan y Philistine, huitt aggle mooar orroo, as chaill ad nyn gree.

12Nish va David mac yn Ephraimite shen jeh Beth-lehem-Judah, va’n ennym echey Jesse; as va hoght mec echey: as v’eh goit son shenn ghooinney ayns laghyn Saul. 13As hie three mec shinney Jesse, as deiyr ad er Saul gys y chaggey: as va ny enmyn oc, Eliab yn fer by-hinney; as y nah er, Abinadab; as y trass er, Shammah. 14As va David y fer saa: as deiyr y three mec shinney er Saul. 15Agh hyndaa David veih Saul, dy vochillagh kirree e ayrey ec Beth-lehem. 16As hayrn y Philistine er-gerrey moghrey as fastyr, as yeeagh eh eh-hene daue son da-eed laa. 17As dooyrt Jesse rish David e vac, Gow nish son dty vraaraghyn ephah jeh’n arroo greddanit shoh, as ny jeih bwilleenyn shoh, as roie gys y champ gys dty vraaraghyn. 18As cur lhiat ny jeih cabbaagyn shoh gys captan y thousane oc, as jeeagh kys ta dty vraaraghyn farrail, as cur lhiat cowrey voue. 19Nish va Saul, as adsyn, as ooilley deiney Israel, ayns coan Elah, aarloo son caggey rish ny Philistinee.

20As dirree David dy moghey, as daag eh ny kirree marish bochilley, as ghow eh, as hie eh, myr va Jesse er choyrt currym er; as haink eh gys jeeig y champ, myr va’n armee goll magh dy ghoaill magher, as troggal yn yllagh-caggee. 21Son va Israel as ny Philistinee tayrn dy cheilley ayns order-caggee, armee noi armee. 22As daag David e charriads fo laue fer dy ghoaill kiarail jeh, as roie eh gys y vagher-caggee, as haink eh, as vannee eh e vraaraghyn. 23As myr v’eh loayrt roo, cur-my-ner, haink y champion, yn Philistine veih Gath, Goliath e ennym, veih armee ny Philistinee, as hug eh y-lane foue, myr ren eh roïe: as cheayll David eh. 24As tra honnick ooilley sheshaght Israel y dooinney, roie ad er-chea veih, as v’ad dy mooar agglit. 25As dooyrt deiney Israel, Vel shiu er vakin y dooinney shoh t’er jeet seose? son shickyrys dy chur y-lane fo Israel t’eh er jeet: yn dooinney er-y-fa shen varrys eh, nee’n ree eh y chooilleeney lesh mooarane berchys, as ver eh da e inneen, as nee eh thie e ayrey seyr ayns Israel. 26As loayr David rish ny deiney hass liorish, gra, Cre vees jeant son y dooinney varrys yn Philistine shoh, as scughys yn scammylt shoh veih Israel? son quoi’n Philistine chymmyltagh shoh, dy goghe eh er dy choyrt y-lane fo armeeyn y Jee bio. 27As dreggyr y pobble eh lurg yn aght shoh, gra, Shen myr vees y dooinney cooilleenit varrys eh.

28As cheayll Eliab e vraar shinney yn glare va eddyr eh as ny deiney; as va corree Eliab er ny ghreesaghey noi David, as dooyrt eh, Cre hug uss ayns shoh? as quoi marish t’ou er n’aagail ny reygyryn shen dy chirree ayns yn aasagh? Shione dou dty voyrn, as mee-reiltys dty chree: cha row chyrrys ayd ayns shoh, agh dy akin y chaggey. 29As dooyrt David, Cre ta mee er n’yannoo? Nagh vel oyr er y hon?

30As hyndaa eh veihsyn, dy loayrt ny goan cheddin rish fer elley: as dreggyr y pobble eh myr dooyrt ad roïe. 31As tra cheayll ad goan Ghavid, haink ad harrystoo fenish Saul; as hug eh fys er e hon.

32As dooyrt David rish Saul, Ny lhig da dooinney erbee ve lhag-chreeagh kyndagh rishyn: gowee dty harvaant ayns laue dy chaggey rish y Philistine shoh. 33As dooyrt Saul rish David, Cha vel uss son goll noi’n Philistine shoh dy chaggey rish: son cha vel oo agh dooinney aeg, agh t’eshyn ny ghooinney-caggee veih e aegid. 34As dooyrt David rish Saul, Va dty harvaant freayll kirree e ayrey, as haink lion, as muc-awin, as ghow dagh fer jeu eayn ass y chioltane. 35As hie mee er nyn eiyrt’s, as woaill mee ad, as livrey mee ny heayin ass nyn meeal: as tra hyndaa ad orrym, ghow mee ad er y scoarnagh, as woaill mee, as varr mee ad. 36Varr dty harvaant chammah yn lion, as y vuc-awin; as bee’n Philistine chymmyltagh shoh myr unnane jeusyn, fakin dy vel eh er choyrt y-lane fo armeeyn y Jee bio. 37Dooyrt David ny-sodjey, Yn Chiarn ren mish y livrey ass croag y lion, as veih croag y vuc-awin, eshyn nee m’y livrey ass laue yn Philistine shoh. As dooyrt Saul rish David, Gow er dty hoshiaght, as y Chiarn dy row mayrt.

38As ren Saul David y choamrey lesh eilley-caggee, as hug eh bayrn-caggee prashey er e chione; hug eh er myrgeddin cooat-caggee. 39As ren David e chliwe y chryssey gys e eilley-caggee, as ghow eh er dy hooyl lhieu; son cha row eh oayllagh er y lheid. As dooyrt David rish Saul, Cha voddym gymmyrkey ad shoh; son cha vel mee oayllagh orroo. As hug David jeh ad. 40As ghow David e lorg ny laue, as reih eh da queig claghyn runt ass y trooan, as hug eh ad ayns poagey-bochilley, ny spagey, v’echey mysh, as e sling ny laue, as hayrn eh er-gerrey gys y Philistine. 41As haink y Philistine er e hoshiaght, as hayrn eh er-gerrey gys David, as yn armyder gymmyrkey’n scape, goll roish. 42As yeeagh y Philistine mygeayrt, as tra honnick eh David, hoie eh beg jeh; son cha row eh agh ny scollag, as ruishagh, as dy eddin aalin. 43As dooyrt y Philistine rish David, Nee moddey mee, dy vel oo cheet hym lesh lorg? As ghwee yn Philistine da David liorish e yeeghyn. 44As dooyrt y Philistine rish David, Tar hym’s, as ver-yms dt’eill da eeanlee’n aer, as da maase y vagher. 45Eisht dooyrt David rish y Philistine, T’ou uss cheet m’oï lesh cliwe, as lesh shleiy, as lesh scape; agh ta mish cheet dt’oï’s ayns ennym y Chiarn dy phooaraghyn niau, Jee armeeyn Israel, t’ou uss er choyrt nyn-lane foue. 46Yn laa jiu nee’n Chiarn uss y livrey gys my laue; as neem’s oo y woalley, as goym dty chione jeed; as ver-ym kirp armee ny Philistinee yn laa jiu da eeanlee’n aer, as da beishtyn feïe y vagheragh; dy vod fys v’ec ooilley’n seihll dy vel Jee ayns Israel. 47As bee fys ec y slane sheshaght shoh nagh vel y Chiarn sauail lesh cliwe as shleiy: son ta’n caggey lesh y Chiarn, as nee eh shiuish y livrey gys ny laueyn ainyn. 48As haink eh gy-kione, tra hrog y Philistine er dy hayrn er-gerrey da David, dy ren David siyr, as roie eh lesh yn armee dy gholl quail y Philistine. 49As hug David e laue ayns e spagey, as ghow eh clagh ass, as sling eh eh, as woaill eh yn Philistine ayns glaare e eddin, dy ren y chlagh sinkeil ayns glaare e eddin; as huitt eh gour e vullee gys y thalloo. 50Myr shoh hooar David y varriaght er y Philistine lesh sling as lesh clagh, as woaill eh yn Philistine, as varr eh eh; agh cha row cliwe ayns laue Ghavid. 51Eisht roie David, as hass eh er y Philistine, as ghow eh e chliwe, as hayrn eh eh ass y fine, as varr eh eh, as yiare eh e chione jeh lesh. As tra honnick ny Philistinee dy row’n champion oc marroo, roie ad er-chea. 52As dirree deiney Israel as Judah, as dyllee ad, as deiyr ad er ny Philistinee, derrey haink ad gys y choan, as gys giattyn Ekron: as huitt ymmodee jeh ny Philistinee va lhottit er y raad gys Shaaraim, eer gys Gath, as gys Ekron. 53As hyndaa cloan Israel reesht veih geiyrt er ny Philistinee, as spooill ad ny cabbaneyn oc. 54As ghow David kione y Philistine, as hug eh lesh eh gys Jerusalem: agh hug eh yn eilley-caggee echey ayns e chabbane.

55As tra honnick Saul David goll magh noi yn Philistine, dooyrt eh rish Abner captan e heshaght-chaggee, Abner, quoi dy mac y dooinney aeg shoh? As dooyrt Abner, Myr ta dt’annym bio, O ree, cha nione dou. 56As dooyrt y ree, Brie uss, quoi dy mac y scollag shoh. 57As myr va David chyndaa lurg da v’er varroo yn Philistine, ghow Abner eh, as hug eh lesh eh fenish Saul, lesh kione y Philistine ny laue. 58As dooyrt Saul rish, Quoi dy mac oo, uss ghooinney aeg? As dreggyr David, Ta mish mac dty harvaant Jesse yn Beth-lehemite.