CAB. XIX

1As loayr Saul rish Jonathan e vac, as rish ooilley e phobble, ad dy varroo David. 2Agh v’ec Jonathan mac Saul lane taitnys ayns David: as dinsh Jonathan da David, gra, Ta Saul m’ayr shirrey dy dty varroo: nish er-y-fa shen, ta mee guee ort, gow kiarail jeed hene derrey’n voghrey, as fuirree ayns ynnyd follit, as jean oo-hene y cheiltyn: 3As hem’s magh as shass-ym liorish my ayr ’sy vagher raad t’ou follit, as loayr-ym rish m’ayr my-dty-chione; as cre-erbee yioym magh insh-ym dhyt.

4As loayr Jonathan fockle mie son David rish Saul e ayr, as dooyrt eh rish, Ny lhig da’n ree peccah yannoo noi e harvaant, noi David; er-yn-oyr nagh vel eh er n’yannoo peccah dt’oï, as er-yn-oyr dy vel eh er hirveish oo dy firrinagh. 5Son hug eh e vioys ayns e laue, as varr eh yn Philistine, as dobbree’n Chiarn saualtys mooar son Israel: honnick oo-hene eh, as ghow boggey jeh; cre’n-fa eisht, nee oo aggair y yannoo noi fuill gyn-loght, dy varroo David gyn oyr? 6As deaisht Saul rish coraa Yonathan: as loo Saul, Myr ta’n Chiarn bio, cha bee eh er ny varroo. 7As deïe Jonathan er David, as dinsh eh da ooilley ny reddyn shen: as hug Jonathan lesh David gys Saul, as v’eh ayns yn eanish echey myr v’eh roïe. 8As va caggey ayn reesht: as hie David magh, as ren eh caggey rish ny Philistinee, as ren eh traartys mooar ny-vud oc; as roie ad er-chea voish. 9As va’n spyrryd olk veih’n Chiarn er Saul, myr v’eh ny hoie ayns e hie, as shleiy ny laue: as chloie David lesh e laue. 10As hir Saul dy woalley David eer gys y voalley lesh y shleiy; agh lheim eh dy lhiattee veih feanish Saul, as woaill eh yn shleiy stiagh ’sy voalley: as chossyn David ersooyl, as haue eh eh-hene yn oie shen. 11Hug Saul myrgeddin chaghteryn gys thie Ghavid, dy lhie fo-chlea er e hon, as dy varroo eh sy voghrey: as dinsh Michal ben Ghavid da, gra, Mannagh gow kiarail jeh dty vioys noght, mairagh bee oo er dty varroo.

12Er shoh lhig Michal David sheese trooid uinniag: as hie eh er-chea, as shoh myr scaap eh. 13As ghow Michal jalloo, as hug ee eh ayns y lhiabbee, as hug ee pillow dy gheaysh ghoair son bolstyr, as hug ee eaddagh harrish. 14As tra hug Saul chaghteryn dy ghoaill David, dooyrt ee, T’eh ching. 15As hug Saul ny chaghteryn reesht dy yeeaghyn David, gra, Cur-jee lhieu seose eh hym’s ayns y lhiabbee myr t’eh, dy voddym eh y varroo. 16As tra va ny chaghteryn er jeet stiagh, cur-my-ner, va jalloo ayns y lhiabbee, lesh pillow dy gheaysh ghoair son e volstyr. 17As dooyrt Saul rish Michal, Cre’n-fa t’ou myr shoh er my volley, as er lhiggey’n raad da my noid, dy vel eh er scapail? As dreggyr Michal Saul, Dooyrt eh rhym, Lhig dou goll; er-nonney marr-ym oo.

18Er shoh chossyn David ersooyl lesh e vioys, as haink eh gys Samuel ec Ramah, as dinsh eh da ooilley ny va Saul er n’yannoo rish: as hie eh-hene as Samuel, as ren ad cummal ayns Naioth. 19As ve inshit da Saul, gra, Cur-my-ner, ta David ee Naioth ayns Ramah. 20As hug Saul chaghteryn dy ghoaill David: as tra honnick ad y cheshaght dy adeyryn phadeyrys, as Samuel ny hassoo myr mainshtyr harrystoo, haink Spyrryd Yee er chaghteryn Saul, as ren adsyn phadeyrys myrgeddin. 21As tra ve inshit da Saul, hug eh chaghteryn elley, as ren adsyn myrgeddin phadeyrys: as hug Saul chaghteryn reesht y trass cheayrt, as ren adsyn myrgeddin phadeyrys. 22Eisht hie eh-hene myrgeddin gys Ramah, as haink eh gys y chibbyr vooar t’ec Sechu, as dênee eh, as dooyrt eh, C’raad ta Samuel as David? As dooyrt fer, Cur-my-ner, t’ad ec Naioth liorish Ramah. 23As hie eh gys Naioth liorish Ramah, as va Spyrryd Yee ersyn myrgeddin, as hie eh er e hoshiaght phadeyrys, derrey haink eh gys Naioth liorish Ramah. 24As cheau eh jeh e choamrey reeoil myrgeddin, as ren eh phadeyrys kiongoyrt rish Samuel er yn aght cheddin, as lhie eh sheese gyn coamrey ooilley’n laa shen, as ooilley’n oie shen. Shen-y-fa, jir ad, Vel Saul myrgeddin mastey ny phadeyryn?