CAB. II

1As vrish Hannah magh ayns arrane-moyllee, as dooyrt ee, Ta my chree goaill boggey ayns y Chiarn; ta my chione er ny hroggal seose ayns y Chiarn; my veeal foddym nish fosley dy loayrt rish my noidyn; er-yn-oyr dy vel mee goaill slane boggey ayns dty haualtys. 2Cha vel fer erbee casherick myr y Chiarn: son cha vel Chiarn erbee elley; chamoo ta creg erbee myr y Jee ain. 3Ny loayr-jee arragh lesh wheesh dy voyrn; ny lhig da mooaralys cheet magh ass nyn meeal: son ta’n Chiarn ny Yee dy hushtey, as liorishyn ta obbraghyn deiney er nyn dowse. 4Ta bow’ghyn ny deiney niartal er nyn mrishey, as t’adsyn va aarloo dy huittym, er nyn goamrey lesh niart. 5T’adsyn va lane er vailley ad hene magh son arran; as ta ny accryssee er nyn yannoo magh: myr shen dy vel yn ven ghennish er n’ymmyrkey shiaght; as ish va ymmodee cloan eck er choayl e bree. 6Veih’n Chiarn ta baase as bioys: t’eh coyrt lesh sheese gys yn oaie, as troggal seose. 7Ta’n Chiarn jannoo boght, as jannoo berchagh: t’eh cur fer sheese, as soiaghey seose fer elley. 8T’eh troggal seose y boght ass y joan, as goaill yn jeirkagh veih’n thorran, dy hoiaghey ad mastey princeyn as dy chur daue stoyl dy ghloyr son eiraght: son lesh y Chiarn ta pillaryn y thallooin, as t’eh er hoiaghey yn seihll orroo. 9Nee eh coadey cassyn e nooghyn, as bee ny mee-chrauee nyn dhost ayns dorraghys; son liorish niart cha vow dooinney erbee yn varriaght. 10Bee noidyn y Chiarn brisht dy peeshyn: veih niau nee eh taarnaghey orroo: nee’n Chiarn briwnys ardjyn sodjey magh y theihll; as ver eh niart da e ree, as troggee eh dy ard eairk 2:10 Pooar.e er-ooilit. 11As hie Elkanah gys Ramah gys e hie; as ren y lhiannoo shirveish gys y Chiarn fo Eli yn saggyrt.

12Nish va mec Eli mec Velial; cha row aggle y Chiarn orroo. 13As ve cliaghtey ny saggyrtyn cheddin dy yannoo rish y pobble, tra va dooinney erbee chebbal oural, haink sharvaant y taggyrt, choud’s va’n eill dy vroie, lesh aall three-meïr ayns e laue; 14As woaill eh eh ’sy phan, ny’n chettle, ny’n choirrey, ny’n phot; ooilley ny hrog yn aall, ghow’n saggyrt da hene: shoh myr ren ad ayns Shiloh, rish ooilley ny Israeliteyn haink gys shen. 15Myrgeddin roish my losht ad yn eeh, haink sharvaant y taggyrt, as dooyrt eh rish y dooinney va chebbal oural, Cur feill ry-hoi roastal son y taggyrt; son cha naillish feill vroie voïd, agh feill aw. 16As my yarragh dooinney erbee rish, Lhig da’n eeh ve hoshiaght er ny lostey, as eisht gow wheesh as sailt; er shoh yarragh eh rish, Cha nee; agh nish hene ver oo dou eh: as mannagh der oo, goym eh er niart. 17Myr shoh va peccah ny deiney aegey feer trome kiongoyrt rish y Chiarn; son hug sleih dwoaie da oural y Chiarn.

18Agh ren y lhiannoo Samuel shirveish gys y Chiarn, coamrit lesh ephod aanrit. 19As ren e voir cooat beg da, as hug ee lh’ee eh huggey dy chooilley vleïn, tra haink ee seose marish e sheshey dy hebbal yn oural-bleeaney.

20As ren Eli Elkanah as e ven y vannaghey, gra, Dy der y Chiarn dhyt sluight jeh’n ven shoh, son yn eeasaght t’ou er choyrt da’n Chiarn. As hie ad rhymboo gys nyn gummal hene. 21As yeeagh y Chiarn er Hannah, myr shen dy ren ee gientyn, as gymmyrkey three mec, as da inneen. As daase y lhiannoo Samuel fenish y Chiarn.

22Nish va Eli feer shenn, as cheayll eh jeh ooilley ny va e vec er n’yannoo rish ooilley Israel, as kys lhie ad marish ny mraane ren chaglym cooidjagh ec dorrys y chabbane-agglish. 23As dooyrt eh roo, Cre’n-fa ta shiu cur-rish lheid yn olk? son ta mee clashtyn jeh nyn ghrogh ghellal veih ooilley’n pobble shoh. 24Ah treih, my vec; cha nee goo mie erbee eh ta mee clashtyn jiu; ta shiu cur oyr da’n pobble dy hreigeil shirveish y Chiarn. 25My ta dooinney jannoo aggair da dooinney, nee’n briw reaghey’n chooish eddyr ad: agh my nee dooinney peccah noi’n Chiarn, quoi hig eddyr ad? Ny-yeih cha dug ad geill da coraa nyn ayr; shen-y-fa va’n Chiarn kiarit dy stroie ad. 26(As daase y lhiannoo Samuel, as v’eh ayns foayr chammah rish y Chiarn, as myrgeddin rish deiney.)

27As haink dooinney dy Yee gys Eli, as dooyrt eh rish, Shoh myr ta’n Chiarn dy ghra, Nagh row mish dy baghtal er ny hoilshaghey gys thie dt’ayrey, tra v’ad ayns Egypt fo laue Pharaoh? 28As ren mee eshyn y reih ass ooilley tribeyn Israel dy ve my haggyrt, dy hebbal er m’altar, dy lostey incense, dy ve coamrit lesh ephod ayns my enish? as dug mee da thie dt’ayrey ooilley ourallyn cloan Israel jeant lesh aile? 29Cre’n-fa ta shiu stampey fo-chosh 2:29 Soiaghey beg jeh — &c.my ourallyn as my hebballyn, ta mee er harey ayns my hie, as lowal da dty vec yn ooashley dy ve shirveishit roym’s, dy lhieeney shiu hene lesh y chooid share jeh ooilley ourallyn Israel my phobble? 30Shen-y-fa ta’n Chiarn, Jee Israel, gra, Dooyrt mee, dy jarroo, dy jinnagh dty hie’s, as thie dt’ayrey shirveish kiongoyrt rhym son dy bragh: agh nish ta’n Chiarn gra, Dy row shen foddey voym; son ver-yms ooashley dauesyn, ta coyrt ooashley dou as bee beg er ny hoiaghey jeusyn, ta soiaghey beg jeem’s. 31Cur-my-ner, ta ny laghyn cheet, dy giare-ym jeh dty roih, as roih thie dt’ayrey, nagh bee shenn ghooinney ayns dty hie. 32As nee uss noid y akin ayns my chabbane-agglish, lurg ooilley’n chenjallys ta Jee er hoilshaghey da Israel: as cha bee shenn ghooinney ayns dty hie son dy bragh. 33As y dooinney jeh dty luight nagh jean-yms giarey jeh veih my altar, bee eh son trimshey da dty chree: as yiow ooilley dty heeloghe baase ayns blaa nyn eash. 34As bee shoh son cowrey dhyt, hig er dty ghaa vac, er Hophni as Phinehas: ’syn un laa yiow ad nyn-neesht baase. 35As trog-yms seose dou hene saggyrt firrinagh nee cooilleeney shen ny ta ayns my chree, as my aigney: as neem’s thie shickyr y hroggal da, as nee eh shirveish fenish my er-ooilit dy kinjagh. 36As hig eh gy-kione, dy jig dy chooilley unnane vees er-mayrn jeh dty hie dy chroymmey huggey son peesh dy argid, as son greme dy arran, as dy jir eh, Cur dou red ennagh dy yannoo, ta mee guee ort, mysh oik y taggyrt, dy vod greme d’arran ve aym dy ee.