CAB. XX

1As chossyn David roish veih Naioth ec Ramah, as haink eh, as dooyrt eh rish Jonathan, Cre ta mee er n’yannoo? cre ta my loght? as cre ta my pheccah kiongoyrt rish dty ayr, dy vel eh shirrey my vioys? 2As dooyrt eh rish, Ny lhig eh Jee: cha bee uss er ny choyrt gy-baase: cur-my-ner, cha jean m’ayr nhee erbee y yannoo, lhig da ve mooar ny beg, nagh n’insh eh dooys: as cre’n-fa yinnagh m’ayr yn red shoh y cheiltyn voym? cha vel eh myr shen. 3As loo David ny-sodjey, as dooyrt eh, Ta fys ec dty ayr son firrinys dy vel mee er gheddyn foayr ayns dty hilley; as t’eh gra, Cha nhegin fys v’ec Jonathan er shoh, er-aggle dy bee eh trimshey da: agh cha firrinagh as ta’n Chiarn bio, cha vel agh kesmad eddyr mish as y vaase. 4Eisht dooyrt Jonathan rish David, Cre-erbee ta dt’annym dy yeearree, neem’s er dty hon. 5As dooyrt David rish Jonathan, Cur-my-ner, mairagh vees feailley’n eayst-noa, as cha lhisin’s failleil dy hoie ec y voayrd marish y ree: agh lhig dou goll dy cheiltyn mee-hene ’sy vagher derrey’n trass laa ’syn astyr. 6My ennys dty ayr nagh vel mee kionfenish, eisht abbyr, Ren David guee orrym dy jeean kied ’chur da dy roie choud’s Beth-lehem yn ard-valley echey hene: son ta feailley-bleeaney freilt ayns shen son y slane kynney. 7My jir eh, Te mie dy liooar; ta shee cour dty harvaant: agh my t’eh feer chorree, eisht foddee oo ve shickyr dy vel olk kiarit m’oï. 8Shen-y-fa nee oo dellal myr carrey rish dty harvaant; son t’ou er n’yannoo conaant fenish y Chiarn eddyr uss as dty harvaant: ny-yeih, my ta mee-chairys aynym, marr mee oo-hene; son cre’n-fa yinnagh oo m’y livrey gys dty ayr? 9As dooyrt Jonathan, Shen dy row foddey voïd: son dy beign shickyr jeh, dy beagh m’ayr soit er olk dt’oï, eisht vel oo smooinaghtyn dy geillin voïd eh? 10Eisht dooyrt David rish Jonathan, Quoi nee ginsh dou? ny cre my ver dty ayr ansoor barbagh dhyt?

11As dooyrt Jonathan rish David, Tar, as lhig dooin goll magh fud y vagheragh. As hie ad ny-neesht magh ’sy vagher. 12As dooyrt Jonathan rish David, O Hiarn Yee Israel, erreish dou v’er gheddyn magh aigney my ayrey traa erbee mairagh, ny nuyr, as cur-my-ner, my ta foayr ry-hoi David, as mannagh der-ym eisht fys hood, as shen y hoilshaghey dhyt. 13Dy jean y Chiarn myr shen as ny smoo rish Jonathan: agh my te ayns cree my ayrey dy yannoo olk dhyt, eisht neem’s shen y hoilshaghey dhyt, as oo y choyrt ersooyl, dy vod oo goll ayns shee: as dy row’n Chiarn mayrt, myr v’eh marish m’ayr. 14As cha jean oo ny-lomarcan, choud as ta mee foast bio, soilshaghey dou kenjallys y Chiarn, nagh bee’m er ny choyrt gy-baase; 15Agh myrgeddin cha jean oo lhaggaghey dty chenjallys gys my hie son dy bragh: eer lurg da’n Chiarn v’er yiarey jeh noidyn Ghavid, dagh unnane oc veih eaghtyr y thallooin. 16Myr shen ren Jonathan conaant rish thie Ghavid, gra, Lhig da’n Chiarn cooilleeney ’ghoaill er noidyn Ghavid. 17As hug Jonathan er David dy heet harrish e vreearrey reesht, er-yn-oyr dy bynney lesh eh: son dy bynney lesh eh myr e annym hene. 18Eisht dooyrt Jonathan rish David, Mairagh vees feailley’n eayst-noa; eisht bee uss ennit ass, er-yn-oyr dy bee dty stoyl follym: 19As lurg dhyt farkiagh three laa, eisht hed oo sheese dy tappee, as hig oo gys yn ynnyd raad v’ou follit roïe tra va’n chooish ayns laue, as nee oo fuirriaght liorish y chlagh Ezel. 20As neem’s three sideyn y lhiggey er y lhiattee echey, myr dy beign lhiggey er mark. 21As cur-my-ner, ver-yms guilley, gra, Immee, fow magh ny sideyn. My jir-ym rish y yuilley, Jeeagh, ta ny sideyn er cheu shoh jeed, trog ad; eisht tar uss: son ta shee, as cha vel assee dty chour, myr ta’n Chiarn bio. 22Agh my jir-ym shoh rish y yuilley, Jeeagh, ta ny sideyn er cheu elley jeed; eisht jean cosney royd; son she’n Chiarn t’er choyrt oo ersooyl. 23Agh mychione y chooish t’ou uss as mish er loayrt jeh, cur-my-ner, dy row’n Chiarn ny eanish eddyr shin son dy bragh.

24Myr shen ren David follaghey eh-hene ayns y vagher: as tra va feailley’n eayst-noa er jeet, hoie’n ree sheese gys y voayrd. 25As hoie’n ree er e stoyl, myr v’eh cliaghtey, ec kione heose y vuird rish y voalley; as dirree Jonathan, as hoie Abner rish lhiattee Saul, as va stoyl Ghavid follym. 26Agh cha lhig Saul veg er y laa shen: son smooinee eh, Ta red ennagh er daghyrt da, cha vel eh glen; shickyr t’eh fo neu-ghlennid y leigh. 27As haink eh gy-kione, laa-ny-vairagh va’n nah laa jeh’n vee, dy row ynnyd Ghavid follym: as dooyrt Saul rish Jonathan e vac, Kys te nagh vel mac Jesse ec y voayrd mârin, edyr jea ny jiu? 28As dreggyr Jonathan Saul, Ren David dy jeean kied y hirrey orrym dy gholl gys Beth-lehem: 29As dooyrt eh, Lhig dou goll, ta mee guee ort, son ta oural-feailley ec y chynney ain ’syn ard-valley, as ta my vraar er my harey dy ve ayns shen; as nish, my ta mee er gheddyn foayr ayns dty hilley, lhig dou goll, ta mee guee ort, dy akin my vraaraghyn: Shoh’n oyr nagh vel eh er jeet gys boayrd y ree. 30Eisht va corree Saul brasnit noi Jonathan, as dooyrt eh rish, Uss vac ghooghyssagh y ven vee-viallagh, nagh vel fys aym dy vel oo jannoo stiagh rish mac Jesse gys y toyrt-mow ayd hene, as gys scammylt nearey dty voir? 31Son choud’s ta mac Jesse bio er eaghtyr y thallooin, cha bee oo er dty niartaghey ayns dty reeriaght: shen-y-fa, cur fys er, as lhiat hym eh, son bee eh dy shickyr er ny choyrt gy-baase. 32As dreggyr Jonathan Saul e ayr, as dooyrt eh rish, Cre’n-fa vees eh er ny stroie? cre’n foill t’eh er n’yannoo? 33As hilg Saul shleiy er dy varroo eh: liorish shoh va fys ec Jonathan dy row e ayr kiarit dy stroie David. 34Myr shen dirree Jonathan veih’n voayrd ayns jiarg-chorree, as cha duirree eh dy ghoaill veg y veaghey mâroo y nah laa jeh’n vee: er-yn-oyr dy row eh seaghnit son David, as dy row e ayr er choyrt lheid y scammylt er hene.

35As haink eh gy-kione ’sy voghrey, dy jagh Jonathan magh ’sy vagher ec y traa va pointit liorish David, as guilley beg mârish. 36As dooyrt eh rish y yuilley, Roie, fow magh ny sideyn ta mee dy lhiggey. As myr roie’n guilley, lhig eh side er y cheu elley jeh. 37As tra va’n guilley er jeet raad va Jonathan er lhiggey’n side, deïe Jonathan gys y yuilley, as dooyrt eh, Nagh vel y side cheu elley jeed? 38As deïe Jonathan lurg y yuilley, Jean siyr, dy tappee, ny fuirree. As hrog guilley Yonathan ny sideyn, as haink eh gys e vainshtyr. 39Nish va ooilley shoh gyn-yss da’n guilley: agh va fys ec David as Jonathan kys myr ve. 40As hug Jonathan e vhow as e hideyn da’n guilley, as dooyrt eh rish, Royd oo lhieu shoh gys yn ard-valley.

41As cha leah’s va’n guilley er n’immeeaght, hrog David veih’n ynnyd my-yiass, as huitt eh er e eddin gys y thalloo, as chroym eh eh-hene three keayrtyn; as ren ad paagey y cheilley, as cheayn ad cooidjagh, agh David smoo ren dobberan. 42As dooyrt Jonathan rish David, Immee royd ayns shee, fakin dy vel shin er n’yannoo breearrey ayns ennym y Chiarn, gra, Dy row’n Chiarn eddyr mish as uss, as eddyr my luight as y sluight ayd’s son dy bragh. As hrog eh er as hie eh roish; as hie Jonathan gys yn ard-valley.