CAB. XXII

1Jimmee David er-y-fa shen roish veih shen, as chossyn eh gys yn ooig Adullam: as tra cheayll e vraaraghyn, as lught-thie e ayrey shoh, hie ad sheese huggey. 2As ren dy chooilley ghooinney va tranlaasit, ny fo feeaghyn, ny sou-aigney, ad-hene y haglym huggey; as v’eh ny chaptan orroo: as va mârish mysh kiare cheead dooinney.

3As hie David veih shen gys Mizpeh ayns Moab, as dooyrt eh rish ree Voab, Lhig da my ayr as my voir, ta mee guee ort, cheet gys shoh, dy ve mêriu, derrey vees fys aym cre nee Jee er my hon. 4As hug eh lesh ad kiongoyrt rish ree Voab: as ren ad cummal mârish ooilley yn traa va David chea son sauchys.

5As dooyrt y phadeyr Gad rish David, Ny fuirree ayns yn ooig shoh; cosne royd, as immee gys cheer Yudah. Eisht hie David roish, as haink eh gys keyll Hareth. 6Tra cheayll Saul dy row briaght er David, as er ny deiney va mârish, (nish va Saul ec y traa shoh ’sy cheyll liorish Ramah, lesh e shleiy ny laue, as ooilley e gheiney mygeayrt-y-mysh;) 7Eisht dooyrt Saul rish e gheiney hass mygeayrt-y-mysh, Clasht-jee nish shiuish Venjamiteyn, Der mac Jesse da dagh unnane eu magheryn, as garaghyn-feeyney, as jean eh shiu ooilley nyn gaptanyn-thousane, as nyn gaptanyn-keead; 8Dy vel shiu ooilley ayns coyrle follit m’oï, as nagh vel veg jiu soilshaghey dou dy vel my vac er n’yannoo conaant rish mac Jesse, as nagh vel unnane eu ta chymmoil orrym, ny ginsh dou dy vel my vac er ghreinnaghey my harvaant m’oï, dy lhie farkiagh er my vioys, myr ec y traa shoh?

9Eisht dreggyr Doeg yn Edomite, (va mainshtyr bochillyn Saul,) as dooyrt eh, Honnick mee mac Jesse cheet gys Nob, gys Ahimelech mac Ahitub. 10As ren eh briaght jeh’n Chiarn er e hon: as hug eh oltaghey-bea da, as myrgeddin cliwe Gholiath yn Philistine. 11Eisht hug y ree fys er Ahimelech y saggyrt mac Ahitub, as ooilley thie e ayrey, ny saggyrtyn va ayns Nob: as haink ad ooilley fenish y ree. 12As dooyrt Saul, Vel oo clashtyn rhym, uss vac Ahitub: As dreggyr eh, Ta mee ayns shoh, my hiarn. 13As dooyrt Saul rish, Cre’n-fa ta shiu ayns coyrle follit m’oï, uss as mac Jesse, ayns dy vel oo er hirveish eh lesh arran, as lesh cliwe, as er vriaght jeh Jee er e hon, dy irree-magh m’oï, dy lhie cooyl-chlea er my hon, myr te ec y traa shoh? 14Eisht dreggyr Ahimelech y ree as dooyrt eh, As quoi mastey ooilley dty harvaantyn ta cha firrinagh as David, ta mac-’sy-leigh yn ree, as shirveish oo dy arryltagh, as ta ooasle ayns dty hie? 15Ren mee eisht briaght jeh Jee er e hon? dy row shen foddey voym. Ny lhig da’n ree cur nhee erbee gys lieh e harvaant, ny lieh ooilley thie my ayrey: son cha row fys ec dty harvaant er veg jeh ooilley shoh, ny sloo ny ny smoo. 16As dooyrt y ree, Bee uss dy shickyr er ny choyrt gy-baase, Ahimelech, oo-hene, as ooilley thie dty ayrey.

17As dooyrt y ree rish y ghard va mygeayrt-y-mysh, Chyndaa-jee er saggyrtyn y Chiarn, as marr-jee ad, er-yn-oyr dy vel y laue oc lesh David, as son dy row fys oc tra hie eh er-chea, as cha dinsh ad dou eh. Agh cha jinnagh sharvaantyn y ree sheeyney magh laue dy huittym er saggyrtyn y Chiarn. 18As dooyrt y ree rish Doeg, Chyndaa uss, as tuitt er ny saggyrtyn. As hyndaa Doeg yn Edomite, as huitt eh er ny saggyrtyn, as varr eh er y laa shen kiare-feed as queig persoonyn va ceau coamrey casherick. 19As woaill eh Nob ard-valley ny saggyrtyn lesh foyr y chliwe, chammah deiney as mraane, cloan as oikanyn, dew, as assylyn, as kirree, lesh foyr y chliwe.

20As ren fer jeh mec Ahimelech, mac Ahitub, enmyssit Abiathar, cosney ersooyl, as hie eh lurg David. 21As dinsh Abiathar da David, kys va Saul er varroo saggyrtyn y Chiarn. 22As dooyrt David rish Abiathar, Va fys aym er y laa shen, tra va Doeg yn Edomite ayns shen, dy jinnagh eh son shickyrys ginsh da Saul: mish oyr baaish ooilley persoonyn thie dty ayrey. 23Fuirree uss mârym, ny bee aggle ort; son eshyn ta shirrey dy ghoaill ersooyl my vioys, t’eh shirrey’n vioys ayd’s: agh mârym’s bee oo ayns sauchys.