CAB. XXIII

1Eisht dinsh ad da David, gra, Cur-my-ner, ta ny Philistinee caggey noi Keilah, as t’ad spooilley ny magheryn arroo. 2Er-y-fa shen ren David briaght jeh’n Chiarn, gra, Jig eh lhiam goll, as bwoalley ny Philistinee shoh? As dooyrt y Chiarn rish David, Gow royd, as bwoaill ny Philistinee, as livrey Keilah. 3As dooyrt deiney Ghavid rish, Cur-my-ner, ta shin fo aggle raad ta shin ayns Judah: cre-woad smoo eisht my hed mayd gys Keilah noi armeeyn ny Philistinee. 4Eisht hir David reesht coyrle jeh’n Chiarn. As dreggyr y Chiarn eh, as dooyrt eh, Trog ort, gow sheese gys Keilah; son nee’m ny Philistinee y livrey gys dty laue. 5Myr shen hie David as e gheiney gys Keilah, as ren eh caggey rish ny Philistinee, as ghow ad ersooyl y maase oc, as ren ad cragh trome ny-vud oc. Myr shen haue David cummaltee Keilah. 6As haink eh gy-kione, tra hie Abiathar mac Ahimelech er-chea gys David ec Keilah, dy daink eh sheese as e choamrey casherick ny laue.

7As ve inshit da Saul dy row David er jeet gys Keilah: as dooyrt Saul, Ta Jee er livrey eh gys my laue; son t’eh jeight stiagh ayns balley lesh giattyn as boltyn. 8As deïe Saul er ooilley’n pobble cooidjagh gys caggey, dy gholl sheese gys Keilah, dy chruinnaghey stiagh David as e gheiney.

9As va fys ec David dy row Saul dy follit kiarail olk n’oï; as dooyrt eh rish Abiathar y saggyrt, Cur lhiat gys shoh yn ephod. 10Eisht dooyrt David, O Hiarn Yee Israel, ta dty harvaant son shickyrys er chlashtyn dy vel Saul shirrey cheet noi Keilah, dy stroie yn ard-valley kyndagh rhym’s. 11Jean deiney Keilah mish y livrey gys e laue? jig Saul sheese myr ta dty harvaant er chlashtyn? O Hiarn Yee Israel, ta mee guee ort, insh da dty harvaant. As dooyrt y Chiarn, Hig eh sheese. 12Eisht dooyrt David, Jean deiney Keilah mish as my gheiney y vrah gys laue Saul? As dooyrt y Chiarn, Nee ad oo y vrah.

13Eisht David as e gheiney, va mysh shey cheead, hrog ad orroo, as daag ad Keilah, as hie ad noon as noal son sauchys. As tra ve inshit da Saul dy row David er chosney roish veih Keilah, cha jagh eh er e hoshiaght. 14As ren David taaghey ny carrickyn lajer ’syn aasagh, as keiltyn eh-hene ayns slieau faasagh Ziph: as helg Saul eh dy chooilley laa; agh cha ren Jee eh y livrey gys e laue. 15As va fys dy mie ec David dy row Saul er jeet magh dy ghoaill e vioys: as va David ’sy cheyll ayns faasagh Ziph. 16As hie Jonathan mac Saul gys David ’sy cheyll, as ren eh e laue y niartaghey ayns Jee. 17As dooyrt eh rish, Ny bee aggle ort; son cha vow laue Saul my ayr magh oo: as bee uss y ree harrish Israel, as mish y fer sniessey dhyt: as er shoh ta fys ec Saul my ayr myrgeddin. 18As ren ad shoh ny-neesht conaant y yannoo fenish y Chiarn. As duirree David ayns y cheyll, as hie Jonathan gys e hie.

19Eisht haink ny Ziphiteyn seose gys Saul gys Gibeah, gra, Nagh vel David follaghey eh-hene mârin ayns ynnydyn lajer dy hauchys ’sy cheyll, ayns slieau Hachilah, my-yiass lesh Jeshimon? 20Nish er-y-fa shen, O ree, tar sheese lurg slane yeearree dt’annym, as nee mayd nyn baart dy livrey eh gys laue yn ree. 21As dooyrt Saul, Bannit dy row shiuish veih’n Chiarn; son ta shiu goaill chymmey jee’m, 22Immee-jee, ta mee guee erriu, brie-jee ny-sodjey, as fow-jee magh yn oayll echey, ny quoi t’er vakin eh ayn: son ta mee toiggal dy vel e ghellal feer chroutagh. 23Jean-jee briaght er-y-fa shen, as gow-jee baght jeh ooilley ny ynnydyn follit raad t’eh keiltyn eh-hene, as tar-jee reesht lesh fys shickyr hym’s, as hem’s mêriu: as my she shen dy vel eh erskyn hallooin, neem’s ronsaghey er e hon trooid ooilley thousaneyn Yudah. 24As hrog ad orroo, as hie ad gys Ziph roish Saul: agh va David as e gheiney ayns faasagh Maon, ayns y thalloo-rea my-yiass jeh Jeshimon. 25As hie Saul myrgeddin as e gheiney dy ronsaghey er e hon; as hooar David fys er: shen-y-fa haink eh sheese veih’n chreg, as duirree eh ayns faasagh Maon: as tra cheayll Saul shen, deiyr eh er David ayns faasagh Maon. 26As hie Saul er y derrey heu jeh’n clieau, as David as e gheiney er y cheu elley: as ren David siyr dy chosney ersooyl ayns aggle roish Saul; son baillish Saul as e gheiney David as e gheiney y chruinnaghey mygeayrt, dy ghoaill ad.

27Agh haink chaghter gys Saul, gra, Jean siyr, as tar royd; son ta ny Philistinee er vrishey stiagh er y cheer. 28Er shoh hyndaa Saul veih geiyrt er David, as hie eh noi ny Philistinee: er-y-fa shen, denmys ad yn ynnyd shen Sela-hammahlekoth.

29As hie David seose veih shen, as ren eh cummal ayns ynnydyn lajer En-gedi.