CAB. XXV

1As hooar Samuel baase: as va ooilley ny Israeliteyn er nyn jaglym cooidjagh, as ren ad dobberan er e hon, as doanluck ad eh er-gerrey da e hie ec Ramah. As hrog David er, as hie eh sheese gys faasagh Paran. 2Nish va dooinney ayns Maon, as e state-hallooin ayns Carmel; as va’n dooinney feer verchagh, son va echey three thousaneyn dy chirree, as thousane goayr: as v’eh lommyrt e chirree ayns Carmel. 3Nish va ennym y dooinney Nabal, as ennym e ven, Abigail: as v’ee ben chreeney as tushtagh, as feer aalin: agh va’n dooinney creoi, mooaralagh, as tranlaasagh ayns e ghellal, as v’eh jeh kynney Chaleb.

4As cheayll David ’syn aasagh, dy row Nabal lommyrt e chirree. 5As hug David magh jeih deiney aegey, as dooyrt David rish ny deiney aegey, Immee-jee seose gys Carmel, as gow-jee gys Nabal, as bannee-jee eh ayns m’ennym. 6As myr shoh nee shiu gra rishyn ta beaghey ayns palchys, Shee dy row ort hene, as shee dy row gys dty hie, as shee da ooilley ny t’ayd. 7As nish ta mee er chlashtyn dy vel lommyrtee ayd: nish cha ren shin yn assee sloo da dty vochillyn, chamoo va veg y choayl oc, ooilley’n traa v’ad liorin ayns Carmel. 8Fênee jeh dty gheiney aegey, as inshee ad dhyt. Shen-y-fa lhig da ny deiney aegey aym’s foayr ’gheddyn ayns dty hilley; (son ta shin er jeet er laa mie;) cur, ta mee guee ort, da dty harvaantyn, as da dty vac David, ayrn jeh ny ta fo dty laue. 9As tra haink deiney aegey Ghavid, loayr ad rish Nabal cordail rish ooilley ny goan shen ayns ennym Ghavid, as cha dooyrt ad arragh.

10As dreggyr Nabal sharvaantyn Ghavid, as dooyrt eh, Quoi David? as quoi mac Jesse? Ta ymmodee sharvaantyn er ny laghyn shoh ta cosney roue, as faagail nyn mainshtyr. 11Jean-yms eisht my arran as my ushtey ’ghoaill, as my vaase ta mee er varroo son my lommyrtee, dy choyrt shoh da deiney nagh vel fys aym quoi ad-hene? 12Myr shen hie deiney aegey Ghavid rhymboo, as haink ad, as dinsh ad da ooilley ny goan shen. 13As dooyrt David rish e gheiney, Cur-jee dy chooilley ghooinney e chliwe er e chryss. As hug ad dagh dooinney e chliwe er e chryss, as hug David myrgeddin er e chliwe: as hie seose marish David mysh kiare cheead dooinney; as duirree daa cheead marish y stoo.

14Agh dinsh fer jeh’n vooinjer da Abigail ben Nabal, gra, Cur-my-ner, hug David chaghteryn veih’n aasagh dy vannaghey nyn mainshtyr; as ren eh goltooaney ad. 15Agh va ny deiney feer vie rooin, as chamoo va coayl ny assee ain, ooilley’n traa v’ad mygeayrt-y-mooin ayns ny magheryn: 16V’ad myr voalley dooin chammah oie as laa, ooilley’n traa va shin lioroo freayll ny kirree. 17Nish er-y-fa shen, gow coyrle, as smooinee cre share dhyt jannoo: son ta olk kiarit noi nyn mainshtyr, as noi ooilley e hie: son t’eh lheid y mac shen dy Velial, nagh vod dooinney loayrt rish.

18Eisht ren Abigail siyr, as ghow ee daa cheead bwilleen, as daa haagh feeyney, as queig kirree aarlit, as queig towseyn dy arroo greddanit, as keead dossan dy raisinyn, as daa cheead baskad dy figgyn, as hug ee ad er assylyn. 19As dooyrt ee rish e sharvaantyn, Immee-jee er nyn doshiaght roym; cur-my-ner, ta mish cheet geiyrt erriu. Agh cha dinsh ee da Nabal e sheshey. 20As shen myr ve, as ee markiagh er yn assyl, myr haink ee sheese er lhiattee’n clieau, cur-my-ner, haink David as e gheiney sheese ny quail; as veeit ee ad. 21(Nish va David er ghra, Nagh row beggan aym dy yannoo dy reayll ooilley ny t’ec eh shoh ayns yn aasagh, myr shen nagh row wheesh as keyrrey dy choayl er: as t’eh er chooilleeney olk son mie. 22Myr shen as na smessey neesht dy jean Jee rish noidyn Ghavid, my aag-yms dooinney bio mygeayrt dty hie derrey soilshey’n voghrey.) 23As tra honnick Abigail David, ren ee siyr, as harlheim ee jeh’n assyl, as huitt ee er e eddin kiongoyrt rish David, as chroym ee ee-hene gys y thalloo. 24As huitt ee ec e chassyn, as dooyrt ee, Orrym’s, my hiarn, orrym’s lhig da kerraghey yn aggair shoh tuittym; as lhig da dty harvaant, ta mee guee ort, loayrt ayns dty chlashtyn, as eaisht rish goan dty harvaant. 25Ny lhig da my hiarn, ta mee guee ort, cur geill da’n dooinney shoh dy Velial, dy jarroo Nabal: son myr ta’n ennym echey, myr shen t’eh-hene; Nabal yn ennym echey, as ta ommijys mârish: agh mish dty harvaant cha vaik mee dty gheiney aegey, my hiarn, hug oo er y chaghteraght. 26Nish er-y-fa shen, my hiarn, myr ta’n Chiarn bio, as myr ta dty annym bio, fakin dy vel y Chiarn er dty lhiettal veih cheet dy gheayrtey fuill, as veih cooilleeney ’ghoaill lesh dty laue hene, nish lhig da dty noidyn, as adsyn ta shirrey olk y yannoo da my hiarn, ve myr Nabal. 27As nish yn cowrey shoh ta dty harvaant er chur lh’ee gys my hiarn, lhig da v’er ny rheynn er ny deiney aegey ta marish my hiarn. 28Leih dou, ta mee guee ort, loght dty harvaant: son nee’n Chiarn son shickyrys thie my hiarn y niartaghey: er-yn-oyr dy vel my hiarn caggey ayns lieh’n Chiarn, as cha vel olkys er ve cronnit aynyd ooilley dty laghyn. 29Ny-yeih, ta dooinney er droggal seose dy yannoo tranlaase ort, as dy helg dty annym: agh bee annym my hiarn kianlt ayns y bundeil dy vea marish y Chiarn dty Yee; agh er son anmeenyn dty noidyn, ad shen nee eh tilgey magh, myr clagh ass mean sling. 30As hig eh gy-kione, erreish da’n Chiarn v’er chooilleeney ooilley’n vieys t’eh er n’yialdyn da my hiarn, as er choyrt dhyt’s y reill harrish Israel, 31Nagh bee shoh son trimshey dhyt, ny laad er cree my hiarn, edyr dy vel oo er gheayrtey fuill gyn-loght, ny dy vel my hiarn er n’ghoaill cooilleeney ec e laue hene: agh lurg da’n Chiarn v’er ghellal dy mie rish my hiarn, eisht cooinee er dty harvaant.

32Eisht dooyrt David rish Abigail, Bannit dy row’n Chiarn Jee Israel, ta er choyrt oo my raad er y laa shoh; 33As bannit dy row dty choyrle; as bannit dy row hene, ta er my reayll jiu veih deayrtey fuill, as veih goaill cooilleeney ec my laue hene. 34Son dy firrinagh, myr ta’n Chiarn Jee Israel bio, ta er my reayll veih jannoo aggair dhyt, er-be dy ren oo siyr, as dy daink oo my whail, son shickyrys cha beagh fer hene jeh deiney Nabal faagit bio rish soilshey’n laa. 35Myr shen ghow David veih’n laue eck shen ny hug ee lh’ee; as dooyrt eh r’ee, Gow seose gys dty hie ayns shee: jeeagh, ta mee er n’eaishtagh rish dty choraa, as er n’yannoo soiagh jeed hene.

36As haink Abigail gys Nabal: as cur-my-ner, dreill eh gien ayns e hie myr gien reeoil; as va cree Nabal gennal, son v’eh feer veshtal: shen-y-fa cha dinsh ee veg da, ny sloo ny ny smoo, derrey’n voghrey. 37Agh haink eh gy-kione laa-ny-vairagh, tra va Nabal er jeet dy ve sheelt, as dy row e ven er n’insh da ny reddyn shoh, dy ren e chree gannooinaghey cheu-sthie jeh, as haink eh dy ve myr clagh. 38As haink eh gy-kione mysh jeih laa ny lurg, dy lhie’n Chiarn e laue er Nabal, dy dooar eh baase.

39As tra cheayll David dy row Nabal marroo, dooyrt eh, Bannit dy row’n Chiarn ta er n’ghoaill seose cooish my scammylt veih laue Nabal, as er lhiettal e harvaant veih olk: son ta’n Chiarn er hyndaa olkys Nabal er e chione hene. As hug David fys, lesh cheb gys Abigail, dy ghoaill ee son ben. 40As tra va chaghteryn Ghavid er jeet gys Abigail ec Carmel, loayr ad r’ee, gra, Ta David er chur shin hood’s, geearree ort dy ve e ven. 41As hass ee seose, as chroym ee e eddin gys y thalloo, as dooyrt ee, Cur-my-ner, lhig da dty inney-veyl ve sharvaant dy niee cassyn sharvaantyn my hiarn. 42As ren Abigail siyr, as hrog ee urree, as vark ee er assyl, marish queig mraane aegey mâree, as deiyr ee er chaghteryn Ghavid, as haink ee dy ve e ven. 43Ghow David myrgeddin mâree Ahinoam jeh Jezreel; as v’ad ny-neesht ny mraane-poost echey.

44Agh va Saul er choyrt Michal e inneen, ben Ghavid, da Phalti mac Laish, va veih Gallim.