CAB. XXVII

1As smooinee David ayns e chree, Neem’s foast keayrt ny keayrt ennagh tuittym liorish laue Saul: cha voddym ny share y yannoo na dy chosney cha leah’s oddym gys cheer ny Philistinee; as cha bee smooinaghtyn sodjey ec Saul orrym, dy hirrey er my hon ayns veg jeh ardjyn Israel: myr shoh nee’m scapail ass e laue. 2As hrog David er, as hie eh harrish lesh shey cheead dooinney va mârish gys Achish, mac Maoch, ree Ghath. 3As ren David cummal marish Achish ec Gath, eh-hene as e gheiney, dy chooilley ghooinney marish lught e hie, eer David as e ghaa ven, Ahinoam veih Jezreel, as Abigail veih Carmel, va ben Nabal. 4As ve inshit da Saul, dy row David er chosney gys Gath: as cha ren eh briaght ny-sodjey er e hon.

5As dooyrt David rish Achish, My ta mee nish er gheddyn foayr ayns dty hooillyn, lhig daue ynnyd-vaghee y chur dou ayns paart jeh ny baljyn-cheerey, dy voddym cummal ayns shen: son cre’n-fa yinnagh dty harvaant cummal liort’s ayns yn ard-valley reeoil? 6Eisht hug Achish Ziklag da yn laa shen: shen-y-fa ta Ziklag bentyn da reeaghyn Yudah gys y laa t’ayn jiu. 7As va’n traa ren David cummal ayns cheer ny Philistinee slane bleïn as kiare meeaghyn.

8As hie David as e gheiney seose, as vrish ad stiagh er ny Geshuriteyn, as ny Gezriteyn, as ny Amalekiteyn: son va ny ashoonyn cheddin son foddey dy hraa shenn chummaltee’n cheer, myr t’ou goll gys Shur, eer gys Egypt. 9As woaill David y cheer, as cha daag eh dooinney ny ben bio; as ghow eh ersooyl ny kirree, as ny dew, as ny assylyn, as ny camelyn, as ny coamraghyn, as hyndaa ad reesht, as haink ad gys Achish. 10As dooyrt Achish, Quoi noi hie shin magh jiu? As dooyrt David, Noi jiass Yudah, as noi jiass ny Jerahmeeliteyn, as noi jiass ny Keniteyn. 11As cha ren David dooinney ny ben y hauail bio dy yannoo skeeal jeh ayns Gath, gra, Er-aggle dy jinnagh ad shin y vrah, gra, Shoh myr ren David, as shoh myr vees y cliaghtey echey choud as vees eh cummal ayns cheer ny Philistinee. 12As chred Achish David, as smooinee eh rish hene, T’eh er chur er e phobble Israel dy choyrt slane dwoaie da; shen-y-fa bee eh my harvaant choud as vees eh bio.