CAB. XXVIII

1As haink eh gy-kione er ny laghyn shen, dy ren ny Philistinee chaglym ny armeeyn oc cooidjagh dy chaggey rish Israel. As dooyrt Achish rish David, Lhig da fys’ve ayd son shickyrys dy jed oo magh mârym gys y chaggey, oo-hene as dty gheiney. 2As dooyrt David rish Achish, Son shickyrys liorish shoh nee oo toiggal cre oddys dty harvaant y yannoo. As dooyrt Achish rish David, Er-y-fa shen neem’s uss ard-chaptan my ghard reeoil choud as vee’m bio.

3Nish va Samuel marroo, as va ooilley Israel er ghobberan er e hon, as ren ad eh y oanluckey ayns Ramah, yn ard-valley echey hene. As va Saul er n’eiyrt ass y cheer adsyn va cur-rish faishnys, as fir-obbee.

4As haggil ny Philistinee ad-hene cooidjagh, as hoie ad nyn gamp ayns Shunem: as haggil Saul ooilley Israel cooidjagh, as ren ad campal ayns Gilboa. 5As tra honnick Saul armee ny Philistinee huitt aggle er, as va e chree dy mooar er-creau. 6As tra ren Saul briaght jeh’n Chiarn, cha dreggyr y Chiarn eh, liorish ashlishyn, ny liorish Urim, ny liorish phadeyryn.

7Eisht dooyrt Saul rish e harvaantyn, Brie-jee magh dou ben ta spyrryd dy aishnys eck, dy voddym goll dy ghoaill coyrle j’ee. As dooyrt e harvaantyn rish, Cur-my-ner, ta ben ta spyrryd dy aishnys eck ayns Endor. 8As hug eh eh-hene ayns cummey elley, liorish caghlaa e choamrey, as hie eh as daa ghooinney mârish, as haink ad gys y ven ’syn oie; as dooyrt eh, Ta mee guee ort, jean faishnys dou liorish y spyrryd ainjyssagh t’aynyd, as cur ersyn girree neem’s genmys dhyt. 9As dooyrt y ven rish, Cur-my-ner, ta fys ayd cre ta Saul er n’yannoo, kys t’eh er stroie adsyn ta dellal ayns faishnys, as ny fir-obbee, ass y cheer: cre’n-fa eisht t’ou soiaghey ribbeh son my vioys, dy choyrt mee gy-baase? 10As loo Saul jee liorish y Chiarn, gra, Myr ta’n Chiarn bio, cha jig kerraghey erbee ort ayns y chooish shoh. 11Eisht dooyrt y ven, Quoi ver-ym lhiam seose hood? As dooyrt eh, Cur lhiat seose hym Samuel. 12As tra honnick y ven Samuel, deïe ee lesh ard choraa: as loayr y ven rish Saul, gra, Cre’n-fa t’ou er my volley? son she uss Saul. 13As dooyrt yn ree, Ny gow aggle: son cre honnick oo? As dooyrt y ven rish Saul, Honnick mee jeeghyn troggal ass yn ooir. 14As dooyrt eh r’ee, Cre’n cummey t’eh jeh? As dooyrt ee, Ta shenn ghooinney ooasle cheet seose, as cloagey er. As hug Saul my-ner dy nee Samuel v’ayn, as chroym eh lesh e eddin gys y thalloo, as ren eh biallys.

15As dooyrt Samuel rish Saul, Cre’n-fa t’ou er choyrt anvea dou, dy my ghoostey? As dreggyr Saul, Ta mee dy mooar seaghnit; son ta ny Philistinee jannoo caggey m’oï, as ta Jee er my hreigeil, as cha vel eh gansoor mee ny sodjey, edyr liorish phadeyryn, ny liorish ashlishyn: er-y-fa shen ta mee er n’eamagh ort, dy vod oo soilshaghey dou cre nee’m. 16Eisht dooyrt Samuel, Cre’n-fa eisht t’ou briaght jeem’s, fakin dy vel y Chiarn er dty hreigeil, as er jyndaa dy ve dty noid? 17As ta’n Chiarn er n’yannoo er y hon-syn myr loayr eh liorym’s: son ta’n Chiarn er raipey’n reeriaght ass dty laue, as er choyrt eh da dty naboo, eer da David: 18Er-yn-oyr nagh dug oo biallys da coraa yn Chiarn, chamoo ren oo cooilleeney’n jymmoose dewil echey er Amalek, er-y-fa shen ta’n Chiarn er n’yannoo yn red shoh rhyt’s, yn laa shoh. 19Nee’n Chiarn myrgeddin Israel as oo-hene y livrey gys laue ny Philistinee: as mairagh bee uss as dty vec mârym’s: nee’n Chiarn myrgeddin sheshaght-caggee Israel y livrey gys laue ny Philistinee. 20As va Saul cha agglit ec goan Samuel, dy huitt eh my-neealloo sheeynt er y thalloo, as cha row veg y vree ayn: son cha row eh er ghoaill monney dy veaghey son laa as oie.

21As haink y ven gys Saul, as honnick ee dy row eh dy mooar seaghnit, as dooyrt ee rish, Cur-my-ner, ta dty inney-veyl er chur biallys da dty choraa, as ta mee er choyrt my vioys ayns my laue, as er n’eaishtagh rish ny goan loayr oo rhym: 22Nish er-y-fa shen, ta mee guee ort, eaisht uss myrgeddin rish coraa dty inney-veyl, as lhig dou greme dy arran y hoiaghey kiongoyrt rhyt; as jean gee, dy vod oo ve er dty niartaghey tra t’ou goll er dty raad. 23Agh dob eh, as dooyrt eh, Cha jean-ym gee. Agh ren e harvaantyn marish y ven chionney er, as ghow eh yn choyrle oc. Myr shen dirree eh veih’n thalloo, as hoie eh er y lhiabbee. 24As va lheiy beiyht ec y ven ’sy thie, as ren ee siyr, as varr ee eh, as ghow ee flooyr, as ren ee fuinney arran ayns siyr: 25As hug ee eh er beealloo Saul as e harvaantyn; as ren ad gee. Eisht dirree ad seose, as hie ad rhymboo yn oie cheddin.