CAB. XXIX

1Nish hayrn ny Philistinee ooilley’n armee cooidjagh gys Aphek: as ren ny Israeliteyn campal liorish farrane ta ayns Jezreel. 2As hie chiarnyn ny Philistinee er nyn doshiaght lesh keeadyn as lesh thousaneyn: agh va David as e gheiney er cooyl yn armee marish Achish. 3Eisht dooyrt princeyn ny Philistinee, Cre t’ec ny Hebrewnee shoh dy yannoo ny mast’ ain? As dooyrt Achish rish princeyn ny Philistinee, Nagh nee shoh David sharvaant Saul ree Israel, ta er ve mârym ny laghyn shoh, eer bleeantyn, as cha vel mee er gheddyn foill erbee ayn, neayr’s haink eh dy ve foym gys y laa shoh? 4As va princeyn ny Philistinee jymmoosagh by-chyndagh rish; as dooyrt princeyn ny Philistinee rish, Chyndaa ersooyl y dooinney shoh, dy vod eh goll reesht gys yn ynnyd t’ou er phointeil da, as ny lhig da goaill y magher mârin, er-aggle dy jyndaa eh orrin ayns y chaggey: son cre’n choardail oddys eh yannoo rish e vainshtyr, agh lesh king ny deiney shoh? 5Nagh nee shoh’n David cheddin, my-e-chione ghow ad arrane ry-cheilley ayns daunsin, gra, Varr Saul e housaneyn, as David e yeih thousaneyn?

6Eisht deïe Achish er David, as dooyrt eh rish, Son shickyrys, myr ta’n Chiarn bio, t’ou er ny ve ynrick, gymmyrkey oo-hene myr sidoor mie, goll magh as stiagh mârym ’sy chaggey; son cha vel mee er gheddyn foill erbee aynyd, er-dyn traa haink oo hym gys y laa shoh: ny-yeih, cha vel ny chiarnyn booiagh jeed. 7Shen-y-fa nish, chyndaa, as gow royd ayns shee, nagh jean oo chiarnyn ny Philistinee y vrasnaghey.

8As dooyrt David rish Achish, Agh cre ta mee er n’yannoo? as cre’n foill t’ou er gheddyn ayns dty harvaant, choud as va mee mayrt gys y laa shoh, nagh voddym ve treishtit dy chaggey noi noidyn my hiarn y ree? 9As dreggyr Achish as dooyrt eh rish David, Ta fys aym dy vel oo mie ayns my hilley, myr ainle Yee: ny-yeih, ta princeyn ny Philistinee er ghra, Cha jean mie da goll mârin gys y chaggey. 10Shen-y-fa nish, irree traa mie moghrey, marish sharvaantyn dty vainshtyr ta mayrt: as cha leah’s hee shiu soilshey’n laa, Immee-jee rieau. 11Myr shen dirree David as e gheiney dy moghey dy gholl rhymboo, as dy hyndaa gys cheer ny Philistinee; as hie ny Philistinee seose gys Jezreel.