CAB. XXX

1As haink eh gy-kione, tra va David as e gheiney er jeet gys Ziklag er y trass laa, dy row ny Amalekiteyn er vrishey stiagh er ardjyn y jiass, as Ziklag, as er ghoaill Ziklag, as er lostey eh lesh aile; 2As v’ad er n’ghoaill ny mraane v’ayn nyn gappee: cha ren ad veg y varroo, mooar ny beg, agh hug ad lhieu ad ersooyl, as hie ad rhymboo.

3Myr shen haink David as e gheiney gys yn ard-valley, as cur-my-ner, ve losht lesh aile; as va ny mraane, ny mec, as ny inneenyn oc goit nyn gappeeyn. 4Eisht hrog David as y pobble va mârish seose nyn goraa, as cheayn ad, derrey nagh row pooar oc dy cheayney ny sodjey. 5As va daa ven Ghavid goit nyn gappee, Ahinoam veih Jezreel, as Abigail ben Nabal veih Carmel. 6As va David dy mooar seaghnit; son va’n pobble aarloo dy chlaghey eh, er-yn-oyr dy row cree ooilley’n pobble trimshagh, dy chooilley ghooinney son e vec, as e inneenyn: agh hug David e varrant ayns y Chiarn e Yee. 7As dooyrt David rish Abiathar y saggyrt, mac Ahimelech, Ta mee guee ort, cur lhiat hym yn ephod. As haink Abiathar lesh yn ephod er gys David. 8As hir David coyrle veih’n Chiarn, gra, Jem’s geiyrt er y cheshaght shoh? jean-ym berraghtyn orroo? As dreggyr eh, Immee, eiyr orroo; son nee oo son shickyrys berraghtyn orroo, as cosney reesht y slane spooilley. 9Myr shen hie David, eh-hene as y shey cheead dooinney va mârish, as haink ad gys yn strooan Besor, raad duirree paart jeu va faagit nyn lurg. 10Agh hie David geiyrt orroo lesh kiare cheead dooinney: (son duirree daa cheead dooinney nyn yeï, va cha tooillit nagh voddagh ad goll harrish y strooan Besor.)

11As haghyr ad er Egyptian ’sy vagher, as hug ad lhieu eh gys David, as hug ad arran da, as ren eh gee; as hug ad er giu ushtey. 12As hug ad peesh dy cheeak figgagh da, as daa ghossan dy raisinyn: as tra v’eh er ghoaill beaghey va e chree er ny niartaghey: son cha row eh er gheddyn veg y veaghey rish three laa as three oieghyn. 13As dooyrt David rish, Quoi lesh oo? as cre veih haink oo? As dooyrt eh, Ta mish dooinney aeg veih Egypt, sharvaant da Amalekite; as daag my vainshtyr mee, er-yn-oyr dy huitt mee ching three laa er-dy-henney. 14Ren shin brishey stiagh er cheer jiass ny Cherethiteyn, as er ardjyn Yudah, as er y jiass jeh Caleb; as losht shin Ziklag lesh aile. 15As dooyrt David rish, Vod uss y raad y yeeaghyn dou gys y cheshaght shoh? As dooyrt eh, Jean breearrey dou liorish Jee, nagh jean oo m’y varroo, ny m’y livrey gys laueyn my vainshtyr, as ver-ym lhiam oo gys y cheshaght shoh.

16As tra v’eh er chur lesh eh sheese, cur-my-ner v’ad skeaylt ooilley fud y vagheragh, gee, as giu, as daunsin, son boggey jeh’n spooilley mooar v’ad er n’ghoaill ass cheer ny Philistinee, as cheer Yudah. 17As woaill David ad veih brishey’n laa gys fastyr laa-ny-vairagh; as cha ren dooinney jeu scapail, agh kiare cheead dy gheiney aegey, varkee ersooyl er camelyn. 18As chossyn David ooilley ny va ny Amalekiteyn er chur lhieu ersooyl; as hooar David reesht e ghaa ven. 19As cha row monney dy choayl oc ayns nhee erbee, beg ny mooar, mec ny inneenyn, ny spooilley, ny nhee erbee v’er ny ghoaill voue: chossyn David back ooilley. 20As ghow David ooilley ny shioltaneyn as ny shellooyn, v’ad er scarrey veih’n maase elley v’oc, as dooyrt ad, Shoh spooilley Ghavid.

21As haink David gys y daa cheead dooinney, va cha tooillit nagh voddagh ad geiyrt er David, v’ad myrgeddin êginit dy aagail nyn yeï ec strooan Besor: as hie ad magh quail David, as ny deiney va mârish: as tra haink David er-gerrey da’n pobble, vannee eh ad. 22Eisht dreggyr ooilley’n vooinjer creoi-chreeagh, yn chloan shen dy Velial, hie marish David, as dooyrt ad, Er-yn-oyr nagh jagh ad mârin, cha der mayd daue ayrn erbee jeh’n spooilley ta shin er chosney, er-lhimmey da dy chooilley ghooinney e ven, as e chloan, dy vod ad goaill ad, as goll rhymboo. 23Eisht dooyrt David, Cha nee shen myr nee shiu, my vraaraghyn, lesh y chooid ta’n Chiarn er chur dooin, t’er choadey shin, as er livrey gys nyn laue yn cheshaght haink magh nyn ’oï. 24Son quoi eh oddys shassoo lhieu ayns y chooish shoh? agh corrym rish ayrn y dooinney ta goll gys y chaggey, vees yn ayrn echeysyn ta fuirriaght nyn yeï son gard er y chooid. 25As veih’n traa shen magh, ren eh shoh son slattys as oardagh ayns Israel, gys y laa t’ayn jiu.

26As tra haink David gys Ziklag, hug eh kuse jeh’n spooilley gys shanstyr Yudah, eer gys e chaarjyn, (gra, Cur-my-ner, gioot er nyn son, jeh spooilley noidyn y Chiarn;) 27Dauesyn va ayns Beth-el, as dauesyn va ayns jiass Ramoth, as dauesyn va ayns Jattir, 28As dauesyn va ayns Aroer, as dauesyn va ayns Siphmoth, as dauesyn va ayns Eshtemoa, 29As dauesyn va ayns Rachal, as dauesyn va ayns ard-valjyn ny Jerahmeeliteyn, as dauesyn va ayns ard-valjyn ny Keniteyn, 30As dauesyn v’ayns Hormah, as dauesyn v’ayns Chor-ashan, as dauesyn va ayns Athach, 31As dauesyn v’ayns Hebron, as gys dy chooilley ynnyd va David as e gheiney oayllagh dy haaghey.