CAB. IV

1As va aigney’n Chiarn er ny hoilshaghey liorish Samuel da ooilley Israel. Nish hie Israel magh dy chaggey noi ny Philistinee, ren ad campal liorish Eben-ezer; as ren ny Philistinee campal ayns Aphek. 2As hug ny Philistinee ad-hene ayns order-caggee noi Israel: as tra haink ad dy cheilley, va’n varriaght ec ny Philistinee er Israel; as varr ad jeh’n armee ’sy vagher mysh kiare thousane dooinney.

3As tra va’n pobble er jeet gys y champ dooyrt shanstyr Israel, Cre’n-fa ta’n Chiarn er woalley shin jiu roish ny Philistinee? lhig dooin cur fys son arg conaant y Chiarn veih Shiloh, tra hig eh hooin dy vod eh shin y hauail veih laueyn nyn noidyn. 4Er shoh hug yn pobble fys gys Shiloh, dy choyrt lhieu veih shen arg conaant y Chiarn dy heshaght-flaunyss, ta cummal eddyr ny cherubim: as va daa vac Eli, Hophni as Phinehas, ayns shen marish arg conaant Yee. 5As tra va arg conaant y Chiarn er jeet gys y champ, dyllee ooilley Israel lesh ard choraa, dy ren eer y thalloo craa lesh. 6As tra cheayll ny Philistinee feiyr yn yllagh, dooyrt ad, Cre’n yllagh mooar shoh ayns camp ny Hebrewnee? As hoig ad dy row arg y Chiarn er jeet gys y champ. 7As va aggle er ny Philistinee, son dooyrt ad, Ta Jee er jeet gys y champ. As dooyrt ad, Smerg dooinyn! son cha vel lheid y red er ve jeant roïe. 8Smerg dooin! quoi nee shin y livrey ass laue ny Jeeghyn niartal shoh? ad shoh ny Jeeghyn woaill ny Egyptianee lesh whilleen kerraghey ’syn aasagh. 9Bee-jee dunnal, as jean-jee gymmyrkey shiu-hene myr deiney, O shiuish Philistinee, nagh jig shiu dy ve fo keesh da ny Hebrewnee, myr v’adsyn diuish: ymmyrk-jee shiu-hene myr deiney, as lhig dooin caggey.

10As huitt ny Philistinee orroo; as va Israel er nyn mwoalley, as chossyn dy chooilley ghooinney gys e chummal hene; as va cragh feer vooar ny-vud oc, son huitt jeih thousaneyn as feed jeh coshee Israel. 11As va arg Yee goit; as va daa vac Eli, Hophni as Phinehas, er nyn marroo.

12As roie dooinney dy Venjamin veih’n chaggey, as haink eh gys Shiloh er y laa cheddin, lesh e choamraghyn raipit, as ooir er e chione. 13As tra haink eh, cur-my-ner, va Eli ny hoie er stoyl rish lhiattee’n raad, dy gheddyn naight: son va e chree er-creau son arg Yee. As tra va’n dooinney er jeet stiagh ’syn ard-valley lesh y naight, va yllaghey as eam trimshagh trooid ooilley’n ard-valley. 14As tra cheayll Eli feiyr yn eam, dooyrt eh, Cre’n feiyr boiragh shoh ta mee clashtyn? As haink y dooinney stiagh dy siyragh, as dinsh eh da Eli. 15Nish va Eli kiare-feed as hoght bleeaney jeig dy eash; as va e hooillyn moal, nagh voddagh eh fakin. 16As dooyrt y dooinney rish Eli, Mish eh haink jiu veih’n armee as ren cosney veih’n chaggey. As dooyrt eh, Kys t’ad er gholl er ayns shen, my vac? 17As dreggyr yn chaghter as dooyrt eh, Ta Israel er roie er-chea roish ny Philistinee, as myrgeddin ta baase mooar sleih, as ta dty ghaa vac, Hophni as Phinehas, myrgeddin marroo, as ta arg Yee goit. 18As haink eh gy-kione, cha leah’s denmys eh arg Yee, dy huitt eh jeh’n stoyl gour e ghrommey, rish lhiattee’n yiat, as vrish eh e wannal, as hooar eh baase; son v’eh ny henn ghooinney trome. As v’eh er vriwnys Israel da-eed bleïn.

19As va’n inneen-’sy-leigh echey, ben Phinehas, torragh, as er-gerrey da’n traa: as tra cheayll ee yn naight dy row arg Yee goit, as dy row’n ayr-’sy-leigh eck as e sheshey marroo, chroym ee ee-hene, as va pianyn troailt urree. 20As myr v’ee ayns raad y vaaish, dooyrt ny mraane va mâree, Bee er dty gherjaghey, son t’ou er n’ymmyrkey mac. Agh cha dug ee ansoor, chamoo hug ee geill da. 21Agh denmys ee yn lhiannoo I-chabod, gra, Ta’n ghloyr er n’immeeaght veih Israel: (er-yn-oyr dy row arg Yee goit, as er graih yn ayr-’sy-leigh eck as e sheshey:) 22As dooyrt ee, Ta gloyr Israel er n’immeeaght; son ta arg Yee goit.