CAB. V

1As ghow ny Philistinee arg Yee, as hug ad lhieu eh veih Eben-ezer gys Ashdod. 2Tra ghow ny Philistinee arg Yee, hug ad lhieu eh stiagh ayns chiamble Dagon, as hoie ad eh liorish Dagon.

3As tra dirree deiney Ashdod dy moghey laa-ny-vairagh, cur-my-ner, va Dagon er duittym er e eddin gys y thalloo kiongoyrt rish arg y Chiarn: as ghow ad Dagon, as hoie ad eh seose reesht ayns e ynnyd. 4As tra dirree ad yn moghrey er-giyn, cur-my-ner, va Dagon er duittym er e eddin gys y thalloo kiongoyrt rish arg y Chiarn; as va kione Dagon as e ghaa laue brisht jeh er sole y dorrys; cha row agh bun Dagon er-mayrn. 5Shoh’n oyr nagh vel saggyrtyn Dagon, ny feallagh erbee elley ta cheet stiagh thie Dagon, cur cass er sole dorrys thie Dagon ayns Ashdod, gys y laa t’ayn jiu. 6Agh va laue y Chiarn trome er cummaltee Ashdod; as ren eh ad y stroie, as woaill eh ad lesh ny pileyn, eer Ashdod as e ardjyn. 7As tra honnick deiney Ashdod dy nee shoh myr ve, dooyrt ad, Cha bee arg Yee Israel ny sodjey mârin, son ta’n laue echey trome orrin, as er Dagon y jee ain. 8Hug ad er-y-fa shen fys, as haggil ad ooilley chiarnyn ny Philistinee huc, as dooyrt ad, Cree nee mayd lesh arg Yee Israel? As dreggyr ad, Lhig da arg Yee Israel ve er ny choyrt lesh mygeayrt gys Gath. As hug ad lhieu arg Yee Israel mygeayrt gys shen. 9As ve myr shen, lurg daue ve er choyrt lhieu eh mygeayrt, dy row laue’n Chiarn noi’n ard-valley lesh paitt trome: as woaill eh deiney’n ard-valley, chammah beg as mooar, as va bleaynyn oc ayns nyn gurpyn.

10Shen-y-fa hug ad arg Yee gys Ekron. As haink eh gy-kione, myr haink arg Yee gys Ekron, dy deïe ny Ekroniteyn magh, gra, T’ad er chur lhieu mygeayrt arg Yee Israel hooinyn, dy stroie shin as y pobble ain. 11Myr shen hug ad fys, as haggil ad ooilley chiarnyn ny Philistinee, as dooyrt ad, Cur-jee ersooyl arg Yee Israel, as lhig da goll reesht gys e ynnyd hene, nagh jean eh shin hene, as y pobble ain y stroie: son va cragh baaish trooid ooilley’n ard-valley; va laue Yee feer trome orroo. 12As ny deiney nagh dooar baase v’ad bwoailt lesh ny chingyn: as va eam yn ard-valley feer atchimagh.