CAB. VI

1As va arg y Chiarn ayns cheer ny Philistinee shiaght meeaghyn. 2As deïe ny Philistinee er ny saggyrtyn as er ny fir-obbee, gra, Cre nee mayd rish arg y Chiarn? insh-jee dooin cre’n aght ver mayd eh gys e ynnyd hene. 3As dooyrt ad, My ver shiu ersooyl arg Yee Israel, ny lhig da goll follym; agh Bee-jee shickyr dy hebbal da oural-loght: eisht bee shiu er nyn lheihys, as nee shiu toiggal cre’n-oyr nagh vel e laue er ny scughey veue. 4Eisht dooyrt ad, Cre vees yn oural-loght ver mayd da? Dreggyr ad, Queig pileyn airhey, as queig loaghee airhey, cordail rish earroo chiarnyn ny Philistinee: son va’n un cherraghey erriu ooilley, as er ny chiarnyn eu. 5Shen-y-fa nee shiu cummey ’yannoo goll-rish ny pileyn, as caslys jeh ny loaghee ta cur mow yn thalloo; as ver shiu gloyr da Jee Israel: foddee dy jean eh scughey e laue veue, as veih ny jeeghyn eu, as veih’n cheer eu. 6Cre’n-fa eisht ta shiu creoghey nyn greeaghyn, myr ren ny Egyptianee as Pharaoh nyn greeaghyn y chreoghey? Tra v’eh er n’obbraghey dy yindyssagh ny mast’ oc, nagh lhig ad yn raad da’n pobble, as jimmee ad roue? 7Nish er-y-fa shen, jean-jee cart noa, as gow-jee daa voa vluight nagh row rieau fo’n whing, as cur-jee ny baa fo’n chart, as cur-jee lhieu ny lheiyee thie voue: 8As gow-jee arg y Chiarn, as cur-jee eh er y chart: as cur-jee ny jewellyn airhey, ta shiu dy hebbal da son oural-loght, ayns box rish lhiattee’n arg; as cur-jee eh ersooyl, dy vod eh goll voïn. 9As gow-jee tastey, my te goll seose rish raad ny ardjyn echey hene lesh Beth-shemesh, she eshyn eisht t’er choyrt yn kerraghey trome shoh orrin: agh mannagh gow eh yn raad shen, eisht bee fys ain nagh nee’n laue echeysyn ren shin y woalley; cha row eh agh lhag-haghyrt haink orrin.

10As ren ny deiney myr shen; as ghow ad daa voa vluight, as hug ad ad fo’n chart, as yeigh ad seose ny lheiyee oc ec y thie. 11As hug ad arg y Chiarn er y chart, as y box lesh ny loaghee airhey, as cummey ny pileyn. 12As hie ny baa jeeragh er nyn doshiaght gys Beth-shemesh, ghow ad y raad-mooar, geamagh myr v’ad goll, as cha hyndaa ad dy lhiattee gys y laue yesh ny’n laue hoshtal: as hie chiarnyn ny Philistinee geiyrt orroo gys oirr Veth-shemesh. 13As va deiney Veth-shemesh buinn y fouyr-churnagh ayns y choan: as hrog ad seose nyn sooillyn, as honnick ad yn arg, as ghow ad boggey dy akin eh. 14As haink y chart stiagh ayns magher Yoshua yn Beth-shemite, as hass eh ayns shen, raad va clagh vooar: as vrish ad fuygh yn chart, as heb ad ny booaghyn son oural-losht gys y Chiarn: 15Son va ny Leviteyn er ghoaill sheese arg y Chiarn, as y box va liorish, ayn va ny jewellyn dy airh, as hug ad er y chlagh vooar ad; as ren deiney Veth-shemesh chebbal ourallyn-losht as ourallyn-shee yn laa cheddin gys y Chiarn. 16As tra honnick queig chiarnyn ny Philistinee shoh, hyndaa ad reesht gys Ekron yn laa cheddin. 17As shoh ny pileyn airhey heb ny Philistinee son oural-loght gys y Chiarn; son Ashdod unnane, son Gaza unnane, son Ekron unnane: 18As ny loaghee airhey, cordail rish earroo ooilley ard-valjyn ny Philistinee va fo ny queig chiarnyn, chammah jeh ard-valjyn fencit as ny baljyn-cheerey, eer gys clagh vooar Abel, er ren ad soiaghey arg y Chiarn; yn chlagh cheddin ta er-mayrn gys y laa t’ayn jiu, ayns magher Yoshua yn Beth-shemite.

19As woaill eh jeh ny Beth-shemiteyn, son dy yeeagh ad stiagh ayns arg y Chiarn, three-feed as jeih deiney jeh jeih thousaneyn as da-eed. As ren y pobble dobberan, er-yn-oyr dy row’n Chiarn er woalley whilleen jeh’n pobble lesh baase dewil. 20As dooyrt deiney Veth-shemesh, Quoi oddys shassoo kiongoyrt rish y Chiarn Jee casherick shoh? as c’raad hed eh 6:20 yn Arg nish voïnyn?

21As hug ad chaghteryn gys cummaltee Kirjath-jearim, gra, Ta ny Philistinee er chur lhieu reesht arg y Chiarn; tar-jee sheese, as cur-jee lhieu eh seose hiu.