CAB. VIII

1As haink eh gy-kione tra va Samuel shenn, dy ren eh e vec briwnyn er Israel. 2Nish va ennym y fer shinney Joel, as va ennym e nah vac Abiah: v’ad shoh nyn mriwnyn ayns Beer-sheba. 3As cha ren e vec shooyl ayns e raaidyn; agh v’ad shêgin er cosney, as ghow ad giootyn, as ren ad cassey briwnys. 4As haggil ooilley shanstyr Israel ad-hene cooidjagh, as haink ad gys Samuel gys Ramah. 5As dooyrt ad rish, Cur-my-ner, t’ou uss shenn, as cha vel dty vec shooyl ayns dty raaidyn: cur dooin nish ree dy vriwnys shin myr t’ec dy chooilley ashoon elley.

6Agh va shoh dy mooar noi aigney Samuel, tra dooyrt ad, Cur dooin ree dy reill harrin. As ghow Samuel padjer gys y Chiarn. 7As dooyrt y Chiarn rish Samuel, Cur raad da coraa yn pobble ayns ooilley ny t’ad dy ghra rhyt: son cha nee uss t’ad er yiooldey voue, agh mish, veih reill harrystoo. 8Cordail rish ooilley ny obbraghyn t’ad er n’yannoo, er-dyn laa hug mee lhiam ad seose ad Egypt gys yn eer laa shoh, lioroo t’ad er my hreigeil, as er hirveish jeeghyn elley; myrgeddin t’ad jannoo rhyt’s. 9Nish er-y-fa shen, cur raad da nyn yeearree: agh ec y traa cheddin cur dty vriwnys dy foshlit nyn ’oï, as cur toiggal daue cre’n aght nee’n ree dellal roo vees reill harrystoo.

10As dinsh Samuel ooilley goan y Chiarn da’n pobble va shirrey ree er. 11As dooyrt eh, Shoh myr vees yn aght nee’n ree reill harrishdiu; nee eh goaill ny mec eu, as pointeil ad da hene, son e ainee, as dy ve ny markee echey, as paart jeu dy ve nyn goshee roish ny fainee. 12As nee eh goardrail da hene captanyn harrish thousaneyn, as captanyn harrish lieh-cheeadyn; as ver eh paart dy hraaue as dy chuirr e halloo, as dy vuinn e ouyr, as feallagh elley dy yannoo e ghreïnyn-caggee, as e ghreïnyn-fainee. 13As ny inneenyn euish nee eh goaill dy ve miljeyderyn, as dy ve coagyryn, as fuinneyderyn. 14As nyn magheryn nee eh goaill, as nyn garaghyn-feeyney, as ny garaghyn-olive eu, eer yn chooid share jeu, as ver eh ad da e harvaantyn. 15As nee eh goaill yn jeihoo ayrn jeh’n arroo, as jeh ny garaghyn-feeyney eu, as ver eh ad da ny fir-oik echey, as da e harvaantyn. 16As nee eh goaill nyn fir-vooinjerey, as nyn inneenyn-veyl, as ny deiney aegey ’stoamey eu, as nyn assylyn, as ver eh ad gys e obbyr hene. 17Gowee eh yn jeihoo ayrn jeh ny kirree eu: as bee shiu ny sharvaantyn echey. 18As nee shiu gaccan dy trome er y laa shen, kyndagh rish y ree vees shiu er reih; as cha der y Chiarn clashtyn diu er y laa shen.

19Ny-yeih, dob y pobble dy choyrt biallys da coyrle Samuel; as dooyrt ad, Cha jean eh mie; agh ree vees ain harrin; 20Dy vod shinyn myrgeddin ve myr ashoon elley; as dy vod nyn ree shin y vriwnys, as dy ve nyn leeideilagh, as dy reill ny caggaghyn ain. 21As cheayll Samuel ooilley goan y pobble, as hie eh harrystoo reesht ayns clashtyn y Chiarn. 22As dooyrt y Chiarn rish Samuel, Jean myr t’ad geearree, as cur ree daue. As dooyrt Samuel rish deiney Israel, Reue-jee dy chooilley ghooinney gys e ard-valley hene.