CAB. IX

1Nish va dooinney jeh Benjamin, va’n ennym echey Kish, mac Abiel, mac Zeror, mac Bechorath, mac Aphiah, Benjamite, dooinney feer phooaral. 2As va mac echey va’n ennym echey Saul, reih dooinney aeg as aalin; as cha row mastey cloan Israel persoon ny stoamey na eh: veih e gheayltyn seose v’eh ny s’thollee na veg jeh’n pobble. 3As va assylyn Kish, ayr Saul, er n’gholl er-shaghryn; as dooyrt Kish rish Saul e vac, Gow nish mayrt fer jeh’n vooinjer, trog ort, as immee dy yeeaghyn son ny assylyn. 4As hie eh trooid slieau Ephraim, as er e hoshiaght trooid cheer Shalisha, agh cha row ad ry-gheddyn: eisht hie ad trooid cheer Shalim, as ayns shen cha row ad; as hie eh trooid cheer ny Benjamiteyn, agh cha row ad ayns shen. 5As tra v’ad er jeet gys cheer Zuph, dooyrt Saul rish e harvaant va mârish, Tar, as lhig dooin goll thie; er-aggle nagh nee son ny assylyn vees m’ayr imneagh, agh er ny son ain hene. 6As dooyrt eh rish, Cur-my-ner nish, ta ayns yn ard-valley shoh dooinney dy Yee, as t’eh ny ghooinney ooasle; cre-erbee t’eh dy ghra, te dy shickyr er ny chooilleeney: lhig dooin nish goll huggey: foddee dy der eh roïn yn raad lhisagh shin goaill. 7Eisht dooyrt Saul rish e harvaant, Agh cur-my-ner, my hem mayd cre t’ain dy hebbal da’n dooinney? son ta’n arran hug shin lhien son y raad baarit, as cha vel gioot ain dy hebbal da’n dooinney dy Yee: vel red erbee ain? 8As dreggyr y charvaant Saul reesht, as dooyrt eh, Cur-my-ner, t’aym’s ayns shoh yn chiarroo ayrn jeh shekel argid: shen ver-ym da’n dooinney dy Yee dy insh dooin nyn raad. 9(Ayns traa dy row ayns Israel, tra hie dooinney dy vriaght jeh Jee, shoh myr dooyrt eh, Tar-jee, lhig dooin goll gys y fakyder: son eshyn ta nish enmyssit phadeyr, v’eh roish nish enmyssit fakyder.) 10Eisht dooyrt Saul rish e harvaant, Feer vie; tar, lhig dooin goll: myr shen hie ad gys yn ard-valley, raad va’n dooinney dy Yee.

11As myr hie ad seose y chronk gys yn ard-valley, haink mraane aegey nyn guail, va goll magh dy hayrn ushtey, as dooyrt ad roo, Vel y fakyder ayns shoh? 12As dreggyr ad, as dooyrt ad, T’eh; cur-my-ner, t’eh reue: jean-jee siyr nish; son haink eh jiu gys yn ard-valley; son ta oural-feailley ec yn pobble dy hebbal jiu er yn ard-altar. 13Cha leah’s hig shiu stiagh ’syn ard-valley yiow shiu eh chelleeragh, roish my jed eh seose gys yn ynnyd ard dy ee: son cha jean y pobble gee derrey hig eh, er-yn-oyr dy vel eh dy oltaghey’n oural, as eisht ta ny goaldee gee. Jean-jee siyr eisht; son mysh y traa shoh yiow shiu eh. 14As hie ad seose gys yn ard-valley; as tra v’ad er jeet stiagh s’yn ard-valley, cur-my-ner, haink Samuel nyn guail, myr v’eh goll seose gys yn altar.

15Nish va’n Chiarn er hoilshaghey da Samuel er-lheh, yn laa roish my daink Saul, gra, 16Mairagh, mysh y traa shoh, ver-yms hood dooinney ass cheer Venjamin; as nee oo eshyn y ooilaghey dy ve captan er my phobble Israel, dy vod eh sauail my phobble ass laue ny Philistinee: son ta mee er yeeaghyn er my phobble, er-yn-oyr dy vel yn accan oc er jeet kiongoyrt rhym. 17As tra honnick Samuel Saul, dooyrt y Chiarn rish, Cur-my-ner yn dooinney mychione echey loayr mee rhyt: shoh eh nee reill harrish my phobble. 18Eisht hayrn Saul er-gerrey da Samuel ’sy yiat, as dooyrt eh, Insh dou, ta mee guee ort, c’raad ta thie yn fakyder. 19As dreggyr Samuel Saul, as dooyrt eh, Mish yn fakyder: gow seose roym gys yn ard-ynnyd; son nee shiu goaill beaghey mârym jiu; as mairagh lhig-ym y raad dhyt, as insh-ym dhyt ooilley ny t’ayns dty chree. 20As er son dty assylyn va caillit three laa er-dy-henney, ny bee ayns imnea erbee; son t’ad er ny gheddyn. As quoi er ta ooilley yeearree Israel? nagh nee ort’s te, as er ooilley thie dt’ayrey? 21As dreggyr Saul as dooyrt eh, Nagh nee Benjamite mee, jeh’n tribe sloo coontit ayns Israel? as nagh vel my chynney’s ny s’fardalee na ooilley kynneeyn tribe Venjamin? cre’n-fa eisht t’ou loayrt rhym’s er yn aght shoh? 22As ghow Samuel Saul as e harvaant, as hug eh lesh ad stiagh ’sy pharlar, as hug eh orroo soie seose gys kione y voayrd, mastey ny goaldee, va mysh jeih persoonyn as feed. 23As dooyrt Samuel rish y choagyrey, Cur lhiat yn ayrn shen jeh’n bee aarlit hug mee dhyt, mychione dooyrt mee rhyt, Cur dy lhiattee eh. 24As ghow’n coagyrey yn clingan, as ny v’er, as hoie ee eh roish Saul: as dooyrt Samuel, Cur-my-ner shen ny ta freilt! gow eh hood, as ee; son gys y traa shoh ve freilt dty chour, er-dyn traa dooyrt mee, Ta mee er chuirrey’n pobble. Myr shen ren Saul yn laa cheddin goaill beaghey marish Samuel.

25As tra v’ad er jeet neose veih’n ard-ynnyd gys yn ard-valley, va glare eddyr Samuel as Saul ayns ard-shamyr y thie. 26As dirree ad dy moghey: as haink eh gy-kione mysh brishey’n laa, dy deïe Samuel er Saul gys yn ard-shamyr, gra, Trog ort, dy voddym lhiggey’n raad dhyt. As dirree Saul, as hie ad ny-neesht magh, eshyn as Samuel, gys boayl er-lheh. 27As myr v’ad goll sheese ec kione yn ard-valley, dooyrt Samuel rish Saul, Abbyr rish y yuilley goll er e hoshiaght roïn, (as hie eh er e hoshiaght,) agh fuirree uss tammylt ayns shoh, dy voddym soilshaghey dhyt goo’n Chiarn.