CAB. I

1Paul, as Silvanus, as Timotheus, gys agglish ny Thessalonianee, ta ayns Jee yn Ayr, as ayns y Chiarn Yeesey Creest: Grayse dy row hiu, as shee voish Jee nyn Ayr, as y Chiarn Yeesey Creest. 2Ta shin cur booise kinjagh gys Jee er nyn son eu ooilley, gimraa erriu ayns nyn badjeryn. 3Cooinaghtyn dy kinjagh er yn obbyr eu dy chredjue, as y tooilleil dy ghraih, as y surranse dy hreishteil ayns nyn Jiarn Yeesey Creest, ayns shilley Yee as nyn Ayr: 4Toiggal, chaarjyn ghraihagh, dy vel shiu reiht liorish Jee. 5Son cha daink y sushtal ainyn hiu ayns goo ny-lomarcan, agh myrgeddin ayns pooar, as ayns y Spyrryd Noo, as ayns slane shickyrys, myr ta fys eu kys ren shin gymmyrkey shin hene ny mast’ eu, er y choontey eu. 6As haink shiu dy ve eiyrtyssee orrin, as er y Chiarn, myr va shiu er ghoaill rish y goo ayns mooarane seaghyn, lesh boggey yn Spyrryd Noo: 7Myr shen dy row shiu sampleyryn dauesyn ooilley ta credjal ayns Macedonia as Achaia. 8Son veueish hie feiyr goo yn Chiarn magh, cha nee ny-lomarcan ayns Macedonia as Achaia; agh myrgeddin ayns dy chooilley voayl ta’n credjue euish ayns Jee er ny skeayley dy lhean, myr shen nagh lhiass dooin cheet harrish. 9Son t’ad-hene soilshaghey mychione ain, kys ghow shiu rooin tra haink shin hoshiaght ny mast’ eu, as kys hyndaa shiu gys Jee veih jallooyn, dy hirveish y Jee bio as firrinagh, 10As dy arkiagh son e Vac veih niau, t’eh er hroggal veih ny merriu, dy jarroo Yeesey t’er nyn livrey veih’n chorree ta dy heet.