CAB. V

1Agh mychione ny traaghyn as ny imbaghyn, vraaraghyn, cha vel feme scrieu hiu. 2Son ta fys dy mie eu hene, dy vel laa yn Chiarn cheet myr maarliagh ’syn oie. 3Son tra jir ad, Shee as sauchys; eisht hig toyrt-mow orroo doaltattym, myr ta pian cheet er ben tra t’ee er-troailt; as cha jean ad scapail. 4Agh cha vel shiuish, vraaraghyn, ayns dorraghys, dy jinnagh y laa shen berraghtyn erriu myr maarliagh. 5Ta shiuish ooilley cloan y toilshey, as cloan y laa: cha vel shinyn jeh’n oie, ny jeh’n dorraghys. 6Ny lhig dooin er-y-fa shen cadley myr ta feallagh elley; agh lhig dooin ve er nyn arrey as sheelt. 7Son t’adsyn ta cadley, cadley ’syn oie; as t’adsyn t’er-meshtey, er-meshtey ’syn oie. 8Agh lhig dooinyn ta jeh’n laa, ve sheelt, coyrt orrin yn breast-plate dy chredjue as graih, as son bayrn-caggee, yn treishteil dy haualtys. 9Son cha vel Jee er phointeil shin gys corree; agh dy chosney saualtys liorish nyn Jiarn Yeesey Creest, 10Hur baase er nyn son, edyr shin ve dooisht ny nyn gadley, dy vod shin ve bio cooidjagh mârishyn. 11Shen-y-fa jean-jee gerjaghey shiu hene, as niartaghey yn derrey yeh yn jeh elley, dy jarroo myr ta shiu dy yannoo. 12As ta shin guee erriu, vraaraghyn, dy choyrt geill dauesyn ta laboragh nyn mast’ eu, as ta harrystiu ayns y Chiarn, as coyrlaghey shiu; 13As dy yannoo ard-soiagh jeu ayns graih er coontey nyn obbyr: as bee-jee ec shee nyn mast’ eu hene. 14Nish ta shin guee erriu, vraaraghyn, cur-jee raaue dauesyn ta mee-reiltagh, jean-jee gerjaghey adsyn ta lhag-chreeagh, ymmyrk-jee lesh ny annooinee, bee-jee surransagh rish dy chooilley ghooinney. 15Jeeagh nagh jean veg j’iu cooilleeney olk son olk da dooinney erbee: agh dy bragh eiyr-jee er shen ta mie, chammah nyn mast’ eu hene, as rish dy chooilley ghooinney. 16Gow-jee dy bragh boggey. 17Gow-jee padjer dy kinjagh. 18Ayns dagh stayd cur-jee booise: son shoh aigney Yee ayns Creest Yeesey mychione eu. 19Ny jean-jee mooghey yn Spyrryd. 20Ny jean-jee beg y hoiaghey jeh phadeyrys. 21Prow-jee dy chooilley nhee: cum-jee shickyr shen ta mie. 22Freill-jee shiu hene veih dy chooilley chaslys dy olkys. 23As dy jean y Jee hene dy hee shiu dy slane y chasherickey: as ta mee guee gys Jee dy bee’n slane spyrryd, as annym, as callin eu er ny reayll gyn loght, gys cheet nyn Jiarn Yeesey Creest. 24Firrinagh t’eshyn ta geamagh erriu, nee myrgeddin shen y chooilleeney. 25Vraaraghyn, gow-jee padjer er nyn son. 26Jean-jee ooilley ny braaraghyn y vannaghey lesh y phaag dy hee. 27Ta mee cur currym erriu liorish y Chiarn, dy bee’n screeuyn shoh er ny lhaih da ooilley ny braaraghyn casherick. 28Grayse nyn Jiarn Yeesey Creest dy row mêriu. Amen.